Skip to Content

Actividades, APA, Novas

BOAS NOVAS PARA O ALUMNADO DO IESP ELVIÑA

O Delegado Territorial da Xunta de Galicia na Coruña, D. Gonzalo Trenor, visitou hoxe o IES Plurilingüe Elviña para compartir coa comunidade educativa a próxima dotación dunha pista polideportiva cuberta no espacio do patio.

As novas instalacións contribuirán moi positivamente á actividade do centro desde o vindeiro curso, poñendo en valor todo o potencial do maior espazo do centro, e arranxando as áreas desgastadas polo paso do tempo. O alumnado desfrutará de mellores medios para a práctica deportiva e outras actividades de exterior e de vida saudable, e de áreas de acollemento máis seguras e confortables en todas condicións meteorolóxicas durante o lecer.

A iniciativa enmárcase dentro das actuacións contempladas no Plan de Nova Arquitectura Pedagóxica, e conta co apoio do Fondo Europeo de Desenvolvemento Rexional, no programa operativo FEDER Galicia 2014–2020. Engádese a outras iniciativas en curso da Xefatura Territorial da Coruña contribuintes á modernización das instalacións do centro.

Podese ler máis información nas canles oficiais de comunicación e nos medios de prensa que se fixeron eco no mesmo día, como a La Voz de Galicia, El Ideal Gallego e Cadena Cope.

Patio IESP Elviña

CONVOCATORIA DO FONDOLIBROS 2021-22

FONDO SOLIDARIO
DE LIBROS DE TEXTO (ESO)

(Resumo)

Aberto prazo para a presentación de solicitudes de participación no
Fondo solidario de libros de texto para cursos de ESO (2021-2022)

Descargar información

*          *          *

PRAZO
do 21 de maio ao 22 de xuño

LUGAR
na Secretaría do centro ou a través da sede electrónica da Consellería de Educación (con certificación dixital)

 

DOCUMENTACIÓN NECESARIA

  • Fotocopia do DNI ou NIE de todos os membros da unidade familiar para resolver posibles dúbidas nos datos dos formularios.
     
  • Documentación complementaria (a que lle corresponda a cada un):


a) Copia do libro de familia ou equivalente onde figuren todos os membros computables. No caso de que non haxa Libro de familia, que o pai e ani ou titor ou titores carezan de DNI e NIE, certificado de convivencia, volante de convivencia ou informe dos servizos sociais ou de órgano equivalente do concello onde resida a familia.

b) En caso de separación ou divorcio, ademais deberán achegar a sentenza xudicial e/ou convenio regulador onde conste a atribución da custodia do menor. 

c) Certificación do grao de discapacidade do/a alumno/a ou calquera membro da familia, recoñecido por un órgano que non pertenza á Xunta de Galicia.

d) Documentación xustificativa da situación de violencia de xénero no ámbito familiar.

e) Resolución xudicial de incapacitación con patria potestade prorrogada ou rehabilitada.

f) Resolución administrativa ou xudicial acreditativa da situación de acollemento ou do certificado do centro de menores, para o alumnado en sitación de tutela ou garda da Xunta de Galicia.

 

DEVOLUCIÓN DOS LIBROS DESTE CURSO

A devolución dos libros deberá efectuarse antes do 7 de xullo (agás alumnado con materias pendentes para setembro, que poderá facer a devolución ata o 10 de setembro). Os últimos días de clase prepararase unha xornada de devolución.

CUALIFICACIÓNS 2ª AVALIACIÓN

REMATE DA 2ª AVALIACIÓN
E CUALIFICACIÓN DO ALUMNADO

     O IES Plurilingüe Elviña, en consonancia coas recomendacións da Consellería de Educación, Universidade e FP, manterá o calendario previsto de peche da segunda avaliación compartido con alumnado e familias ao inicio de curso. Polo tanto, o persoal docente, na medida do posible coas limitacións actuais, completará o seu labor de avaliación a tempo para proceder á difusión das cualificacións parciais ás familias a partir do venres 3 de abril, tal e como estaba previsto.


Aspectos da excepcionalidade do proceso
de avaliación pola alerta sanitaria

  • Cómpre ter presente en todo momento o contexto de excepcionalidade sin precedentes da situación actual, que pode esixir modificacións -aínda nesta mesma semana- para adaptarse a novos acontecementos e/ou novas instrucións das autoridades educativas.

  • Conforme ás instrucións das autoridades educativas, para a cualificación das materias terase en conta exclusivamente o traballo desenvolvido polo alumnado ata o 13 de marzo, momento de suspensión da actividade presencial.

  • As imposicións inherentes á situación actual fan imposible satisfacer na súa totalidade o contemplado nas programacións didácticas. O profesorado dos departamentos, como máximos especialistas por materia e en ausencia de instruccións adicionais, poderán flexibilizar as previsións que figuran nas programacións para facer a interpretación máis axeitada en cada caso, e que mellor represente a adquisición de competencias demostrada polo alumnado ata o momento de suspensión das clases

  • O IES deixa constancia de que as restriccións da actividade ordinaria postas en vigor polo actual estado de alerta sanitaria condicionan as posibilidades do persoal docente no momento de cualificar por aspectos tales como a dificultade de acceso físico á información almacenada no centro, os problemas de redes na actividade telemática nos fogares ou mesmo as posibles convalecencias por enfermidade, por exemplo. Estes feitos dificultan cualificar con precisión ata un punto que non atoparía paralelismo nun contexto habitual.

  • No que atinxe ao punto anterior é obrigado lembrar que as instruccións impostas polas autoridades sanitarias prevalecen hoxe por hoxe sobre calquera outra consideración. O persoal da comunidade docente concede que ten que sacrificar o seu compromiso co celo educativo ante obxectivos más trascendentes, como o risco de multiplicación de contaxios, coas súas consecuenicas na posible perda de vidas humanas e de extensión no tempo ou nos termos do período de confinamento actual

  • As cualificacións serán, como sempre, consultables a través da aplicación móbil Abalar, canle recomendada, a partir do venres día 3 de abril ás 14:00 horas. Os titores farán o seu maior esforzo por facer chegar a través medios telemáticos, o boletín de cualificacións a todas as familias que non consten como usuarias da app Abalar móbil.

  • As familias deben facer unha interpretación das cualificacións recibidas consecuente con todo o anterior. Asúmese que vai ser moi difícil que resulten unha representación do traballo desenvolvido igual de fidedigna que nun contexto de normalidade. Nese senso, debe subliñarse que as cualificacións da 2ª avaliación teñen un carácter primordialmente informativo, e son de menor relevancia formal que a cualificación ordinaria de xuño ou a extraordinaria de setembro (que son as únicas que computan legalmente). As posibles dúbidas ou observacións das familias serán tratadas caso a caso polos titores tras da reincorpoación ao traballo presencial, e poden ser de momento remitidas ao correo corporativo do centro

  • A forma de proceder aquí descrita é susceptible de evolucionar en calquera momento para adaptarse a novos acontecementos que a todos nos poidan afectar


Continuidade do labor docente
e compromiso de traballo telemático

Insistimos no compromiso do centro coa continuidade do labor educativo por múltiples canles mentres perdure a suspensión de actividade presencial, principalmente mediante a aula virtual do IES. A comunidade docente desexa felicitar ao alumnado polo ímpetu inquebrantable de traballo que abrumadoramente está a mostrar desde o pasado día 13 de marzo, pese ás circunstancias adversas.

Nunha concesión allea ao núcleo da nosa actividade, xustificada polo inusual da situación, en nome de toda a comunidade educativa do IES Plurilingüe Elviña reiteramos os nósos ánimos a todas as familias, a todas as persoas convalecentes e os seus achegados, e aos representantes dos distintos colectivos que intensifican o seu traballo para revertir a situación á normalidade o antes posible.

PARENTALIDADE POSITIVA

CURSO DE PARENTALIDADE POSITIVA NO CENTRO CÍVICO MUNICIPAL DE MONELOS

    Ata o 31 de xaneiro está aberto o prazo de inscrición para un Curso de parentalidade positiva organizado desde o Centro cívico municipal de Monelos. O obradoiro está dirixido a pais, nais, representantes legais, nenos e nenas interersados. Desenvolverase os xoves entre o 6 de febreiro e o 30 de abril e se traballarán estratexias educativas que melloren o clima de convivencia dentro da familia.

     Os interesados deben inscribirse enviando un email cos seus datos (nome, apelidos, teléfono) á dirección ccmonelos@coruna.es

RECEPCIÓN DE FAMILIAS COS TITORES

     Un curso máis, dirixímonos ás familias para informar de que o vindeiro martes día 9 de Outubro ás 18:30 horas terá lugar no noso centro a habitual recepción das familias do alumnado cos titores. Nesta reunión o profesorado titor informará das horas de titoría e de numerosas cuestións de interese sobre a organización do centro, características dos grupos e moitos outros asuntos de importancia para o bo desenvolvemento dos estudos ao longo do curso que comeza.

      Nin que dicir ten que a dirección do IES Elviña e todo o seu profesorado consideran de esencial importancia para a educación dos rapaces e rapazas a comunicación fluída coas familias, por iso, é sempre recomendable a asistenza a este acto de posta en común entre titores e pais.

Distribuir contido


by Dr. Radut