Invitado polo profesorado do Departamento de lingua galega do IES Plurilingüe Elviña, dentro da súa programación de actividades, acudiu ao noso salón de actos o recoñecido autor de Made in Galiza, Séchu Sende, para dar unha charla de dúas horas ao alumnado de 4º ESO, 1º e 2º de Bacharelato. Coa súa ben coñecida capacidade de fabular e as súas non tan coñecidas, pero igualmente admirables facultades mediúmnicas e telequinéticas -adeprendidas en parte, segundo a súa propia confesión durante a charla, nun cursiño por terras do Oriente marabilloso- sorprendeu e engaiolou aos rapaces. Tentouno tamén coa hipnose colectiva e, aínda que ninguén acabou catatónico (por sorte para todos!), é de esperar que as súas palabras e as súas historias espertaran en máis de un e de unha o desexo de falar sen prexuízos lingüísticos.
Din os sabios que "falando se entende a xente". Lamentablemente, como case todas as máximas sabias, poucas veces se aplica. Non así no noso centro, afortunadamente. E temos a demostración no marabilloso compromiso do alumnado voluntario do servizo de mediación, que sacrificou parte do seu tempo de lecer todos os mércores pola tarde para vir ao instituto na compaña do intrépido Alberto Alonso (xestor da mediación no noso centro) coa finalidade de traballar e mellorar a capacidade de encauzar os conflitos pola desexable vía da conciliación. Aí os tedes na foto posando para a ocasión. Noraboa a todas e todos eles...
Como ven sendo tradición (e as tradicións cómpre respetalas), chegado o outono, veñen tamén os seus sabores a encher os espazos do IES Elviña, e tamén os seus bandullos. O Departamento de dinamización, coa axuda inestimable de todos os membros do instituto (alumnado, familias, docentes e non docentes), organizou un ano máis a súa festa da outonía. Outros festexan o Nadal, a canícula, os campionatos mundiais de fútbol e outras cousas máis raras aínda: nós festexamos o outono, a estación dourada do ano (a cor das follas caedizas, da castaña que reventa no tépedo ourizo, do saboroso cogumelo, do alongado solpor de outubro e do mel da laboriosa abella, entre outras líricas orixes).
E como se festexa un bo outono?, perguntarán os apacibles lectores. Pois como vai ser! Somos galegos, non si?Pois comendo, que é xerundio.
O soto do IES Elviña festexando o seu outono
A xente do IES Elviña colaborando (a mellor parte foi dos que xantaron as viandas...)
Como cada ano, cada participante deu o mellor de si mesmo para traer o mellor exemplo das súas habilidades na cuciña, tentando non repetir, porque a graza está non só no xantar, senon na sorpresa do que se lle ocorreu este ano aos "chefs" do turno. E así, xunto coas inevitables castañas cocidas e asadas (e que ricas que están!) ou coa frescaxe da granada, correron por aí tartas de chocolate (e de chocolates), de améndoas e de marmelada, galletas de manteiga, de nata e de bombón (dignas do paladar de Willy Wonka), biscoitos de froitas e de tona (entonado ficou quen os degustaba), pasteliños de doce de leite ou de sweet cream (en poucas ocasións foi o centro máis plurilingüe...), pastas recheas de noz coa aromática dozura do anís e, por se non chegase xa con todo isto, o caldo da venerable Galiza e as fabes das Asturias apareceron tamén para quencer os corpos e alegrar as ánimas, que boa falta lles facía.
Coma sempre fantástico o traballo dos voluntarios e das voluntarias
Poesía con sabor de outono no primeiro tempo lecer
Coma parte literaria da xornada, para abrir boca, no andar da pranta baixa do centro durante o primeiro recreo Fernando Álvarez ofreceuse a ler para todos os presentes o poema de Rosalía de Castro"Miña casiña, meu lar" (Libro IV de Follas Novas, "Da terra"), no que, tras da violenta requisitoria contra a mesquindade humana para o pobre e o vencido, agóchase tamén un canto emocionado á honradez do fogar campesiño, simbolizado no sinxelo alimento que é o sal da vida.Que a ninguén lle falte!
Arrimei ò pote ô lume con augua para quentar; mentras escarabellaba na cinza, vin relumbrar un ichavo d'a fertuna... ¡Miña Virxe d'o Pilar! Correndiño, correndiño o fun en sal a empregar; máis contenta qu'unhas páscoas volvín a port'a pechar e na miña horta pequena unhas berzas fun catar. Con un pouco d'unto vello qu'o ben soupen aforrar,
e c'a fariniña munda, xa tiña para cear. Fixen un caldo de groria que me soupo que la mar; fixen un bolo d'o pote qu'era cousa de envidiar; despois qu'o tiven comido, volvín de novo a rezar; e despois qu'houben rezado puxen a roupa a secar, que non tiña fío enxoito d'haber tanto em mollar; n'antramentras me secaba púxenme logo a cantar...
Por último, o vídeo da xornada, editado por Carlochos:
A mañá menceu chuventa e escura. Aínda sen a mortal friaxe dos días que virían despois, semellaba que a luz non tiña nen gañas nen forza para atravesar os suxos vidros da fiestra. Os supervivintes do exame de Bioloxía fuxían das aulas aterridos polo berros que chegaban do soto. Unha ducia de espíritos apareceron entón no primeiro andar, amarelos e lentos, vagarosos como as brétemas que chegan coas maruxías de novembro, e enfilaron, con decisión, ata a Biblioteca arrastrando as cadeas, deixando polo camiño algún anaco de carne, un par de ósos cariados (que atoparon as señoras da limpeza detrás da porta de audiovisuais) e catro pozas de sangue fresco fronte a sala de profesores... Ben sabían os espíritos o que lles agardaba na Biblioteca do IES Elviña: as lecturas máis horrendas, os laídos máis calafriantes, as torturas máis crueis (ollos arrincados, meigas fóra, demos vermellos de lingua babexante, coitelos afiados, pústulas e apostemas...) Pois nada, que o alumnado do clube de lectura, como cada ano por estas datas, adicoulles aos atentos espíritos desta Santa Compaña elviñense, a lectura duns poucos contos de medo, banquete delicioso para as ánimas atormentadas polos anxos infernais.
Velaquí o espantosa que foi a lectura do conto das DÚAS ASASINAS...
Cousa é de todos sabida: o máis descoñecido é sempre o que temos máis perto. Por iso, veulles ao maxín aos nosos profes de galego a idea de levar ao alumnado de 4º ESO a unha actividade destinada a coñecer a nosa cidade, esta Coruña nosa tan maltratada ultimamente de ventos, saraibas e choivas, que ben semella miragre non afunda unha noite no Atlántico (e se cadra esteamos xa afundidos sen sabelo...). Pois por se quedaba Coruña por coñecer, pareceulle a Xurxo Souto montar o seu Universo coruñento, espectáculo virtual no que pasa revista ás anécdotas, aos mitos, ás historias do pasado que se agochan baixo as rúas e prazas que todos os días percorremos. A "festa", integrada no Plan Proxectade toponimia desenvolvido polo Departamento de lingua galega do IES Elviña, celebrouse no Centro Ágora o pasado mércores día 13 de novembro e estivo aderezada con cancións coruñesas de toda a vida e co ben coñecido humor do vocalista dos Diplomáticos. É de desexar que os nosos alumnos tornasen máis sabios do que marcharon. Velaquí algunhas fotiños do evento...
As imaxes e vídeos contidos nesta páxina web corresponden ás actividades desenvolvidas dentro da Programación anual de actividades do noso centro polo noso alumnado. Todas as familias e responsables legais do alumnado que aparece nelas asinaron coa matrícula un permiso específico para permitir a difusión destas imaxes a través da web do instituto ou a través das contas en espazos web e en redes sociais que son de titularidade do IES Plurilingüe Elviña. Asimesmo, familias e responsables están tamén informados do seu dereito de revogar esa autorización de uso de imaxe. Lémbrase que a descarga destes materiais visuais e o seu uso por terceiros fóra do estrito marco dos espazos e funcións permitidos pola autorización citada (isto é, a difusión meramente informativa das nosas actividades complementarias e extraescolares a través da páxina web oficial do centro e a través das contas das que o centro é titular) son ilegais, poden e deben ser denunciados. O IES Plurilingüe Elviña non se fai responsable do uso que se poida facer destas imaxes por terceiros fóra do ámbito dos espazos web que son da súa titularidade.
Séchu Sende contra os prexuízos lingüísticos
