Actividades

O alumnado de 4º ESO e Ciclos Básicos de Formación Profesional asistiu a unhas charlas-obradoiro de Primeiros Auxilios, impartidas polo Grupo de Emergencias Supramunicipal (GES) do concello de Valga e polas profesoras Esther de Andrés e Mar Tejero. Nelas pretendíase achegar ao alumnado a formación necesaria para poder prestar primeiros auxilios en caso de urxencia. A charla estivo dividida en dúas partes, unha teórica e outra práctica. Nela tratáronse temas como: a aplicación da reanimación cardio pulmonar (RCP), a actuación frente a hemorraxias, queimaduras, fracturas e feridas en xeral, así como a súa abordaxe tanto na vida profesional como persoal do alumnado. Esta actividade tivo lugar na Biblioteca do noso centro. A actividade foi organizada polo departamento de FOL en colaboración co departamento de Educación Física.

Este pasado 28 de novembro vense de celebrar a segunda  das “Xornadas de achegamento á Economía Social”  organizadas polo Departamento de Formación e Orientación Laboral.
O  obxectivo destas xornadas é coñecer outras formas de emprender, coa creación de empresas de Economía Social, fundamentadas  na primacía das persoas e o fin social frente ao capital, e nas que os beneficios da actividade retornan ás persoas integrantes.
Puideron comprender o funcionamento das empresas que forman parte da Economía Social, como as de inserción, centros especiais de emprego,.....e outras, facendo especial fincapé nas particularidades da fórmula cooperativa e das sociedades laborais como modelo empresarial máis axeitado para emprender na actualidade, con vantaxes e axudas específicas para elas, ademáis de achegarse a experiencias reais de emprendemento con exemplos de entidades de éxito en Galicia.
A actividade, que tivo lugar na aula de Informática, en horario de 09.35 a 11.15 horas,  tivo como destinatarios aos grupos de  2º de CM de Soldadura e Caldeiraría e 2º de CS de Construcións Metálicas, ámbolos dous de  réxime ordinario, que estiveron acompañados polas súas profesoras Yolanda Carbia e Nuria Casal.
A relatora foi  Ana Olveira Blanco, da  Rede Eusumo, Economía Social de Galicia, da que forma parte como cooperativista en Abeluria Coop, empresa que naceu coa misión de impulsar e consolidar entidades e proxectos de economía social nomeadamente cooperativas, sociedades laborais e asociacións con actividade económica. É ademáis  investigadora do Centro de Estudos Cooperativos da USC e presidenta de Espazocoop Unión de Cooperativas.

O 15 de novembro celebrouse a primeira das “Xornadas de achegamento á economía social”  organizadas polo Departamento de Formación e Orientación Laboral.
O  obxectivo principal é  facer fincapé nas vantaxes e particularidades da fórmula cooperativa e das sociedades laborais como modelo empresarial máis axeitado para emprender na actualidade, dar a coñecer o modelo cooperativo e asociativo e achegar experiencias reais de emprendemento con exemplos de entidades de éxito en Galicia.
A actividade que tivo lugar nas instalacións do noso centro en horario de 16.00 a 18.00 horas,  tivo como destinatarios aos grupos de  2º de CM de Soldadura e Caldeiraría, de réxime Dual e modular e 2º de CM de Mecanizado, de réxime Dual.
A relatora foi  Ana Olveira Blanco, cooperativista en Abeluria Coop, entidade socia da  Rede Eusumo, Economía Social de Galicia;  investigadora do Centro de Estudos Cooperativos da USC e presidenta de Espazocoop Unión de Cooperativas.