Actividades no centro

Actividades no centro

Revista o Serodio

Podedes descargar o segundo número do Serodio deste curso. Ten contidos variados e actuais. Un agradecemento expreso para o alumnado e profesorado colaborador. Animamos, unha vez máis,  á participación nesta iniciativa normalizadora da lingua.

DÍA DE ROSALÍA. UN CALDO DE GLORIA PARA CELEBRAR O SEU ANIVERSARIO

Mañá celebramos no centro o Día de Rosalía e seguindo a iniciativa da Fundación Rosalía de Castro imos elaborar un “Caldo de Gloria”, inspirado no poema “Miña casiña, meu lar”. Repartirase este caldo durante o recreo (11:30 a 12:10) na entrada cara ao Edificio Novo. Leranse varios poemas da autora ao comezo do acto e logo as actividades continuarán na Biblioteca con música e recitados. Estades todas e todos convidados a celebrar connosco o aniversario da poeta.

No poema de “Miña casiña, meu lar” podedes atopar a receita por se o queredes elaborar vós e facer que as redes sociais lle renda homenaxe a Rosalía. Para iso é preciso facer un Caldo de Gloria -tedes a receita na páxina-, ler un poema de Rosalía e compartir unha foto nas redes sociais cos seguintes cancelos (hashtags): #CaldodeGloria #DíadeRosalía.

Animádevos!

"MULLERES EN ACCIÓN. VIOLENCIA ZERO" no noso Instituto.

O noso Instituto acolleu o pasado mércores 7 deste mes de febreiro un importante acto do programa "Mulleres en acción. Violencia Zero", deseñado pola Deputación de Pontevedra. Consistiu nunha "acción poética" titulada "Cofre de maquillaxe" a cargo de Olalla Cociña. Esta poeta e xornalista, con esta intervención, amosou claramente que a arte, neste caso a literatura e o audiovisual, é unha ferramenta de sensibilización e concienciación contra a violencia machista. Evidenciou o poder da poesía como berro de denuncia fronte a unha realidade dramática como é o feminicidio e o patriarcado. Cómpre concienciarnos  de que a loita contra o machismo en todas as súas manifestacións é unha base principal para a construcción dunha sociedade máis xusta e igualitaria. En relación con isto, lembramos que hai convocada a xornada reivindicativa de "Mulleres en Folga" para o 8 de marzo, Día Internacional da Muller Traballadora.

Agradecemos ao Concello das Neves que contasen co noso centro para a realización deste acto e á Deputación de Pontevedra, a través do seu Servizo de Igualdade, esta colaboración. Tamén tivemos a ledicia de contarmos, entre as persoas asistentes, xunto ao alumnado e profesorado, a representantes de ambas institucións, coa presenza do alcalde, Xosé Manuel Rodríguez Méndez, e da presidenta do organismo provincial, Carmela Silva.

 

Recital musical a cargo de GHZ, Pedrido e DUKE SAM

O 21 de decembro, despois do primeiro trimestre de curso, marcado fundamentalmente polos lumes, celebrouse no Auditorio do Concello das Neves (a quen agradecemos que nos cedesen o local e a súa colaboración) un recital musical a cargo de GHZ, Pedrido e DUKE SAM Interpretaron varias pezas de rap, cunhas letras cheas de contido social, moi actuais e ben nutridas de crítica ao tempo que nos toca vivir: a situación da corrupción, o capitalismo cruel que padece a xente, a explotación da clase traballadora, as discriminacións, as guerras etc. Todo este repertorio fíxonos pasar un momento para, ademais de pasalo ben, poder reflexionar... Noraboa ao trío!

Acto contra a violencia de xénero

O  venres 24 de novembro celebrouse un acto en Usos Múltiples contra a violencia de xénero. Protagonizado polo alumnado, o grupo de pandereteiras interpretaron un par de pezas musicais: "Muiñeira loitadora" e "Muiñeira reivindicativa", compostas para a ocasión polo profesor de Música Anxo Abalde. A alumnas e profesor lles agradecemos o magnífico traballo. É fundamental que desde o ensino público, e desde o conxunto da sociedade, tomemos conciencia e asumemos un rol de denuncia e combate contra a violencia machista. E tamén que rexeitemos na teoría e na práctica as dinámicas patriarcais que queren facer da muller unha persoa submisa. Debemos perseguir unha sociedade máis xusta e igualitaria.
Distribuir contido