Actividades no centro

Actividades no centro

Acto co alumnado de 2º de Bacharelato e 2º de Ciclo

Este luns 19 celebramos o acto de homenaxe ao alumnado que remata 2º de Bacharelato e de Ciclo. Por primeira vez no noso instituto compartimos todo este alumnado e todo o persoal do centro, xunto coas familias, un evento tan emotivo e especial. Nun salón de actos cheo, abriu a sesión o director dando a benvida a todas as persoas presentes. A continuación falaron  o titor de 2º Ciclo e un representante deste alumnado, e logo a titora de 2º Bacharelato e un alumno do grupo, para evocaren  momentos vividos, situacións, algunha anécdota... e seren conscientes da nova etapa que se abre, sempre con ilusión e esperanza.Agasallos entregados aos alumnos

Concentración en solidariedade con Portugal

Ao comezo do recreo deste luns 19 de xuño concentrámonos na escalinata do Instituto para gardar un minuto de silencio en solidariedade con Portugal, o país irmán, polos terribles momentos que está a sufrir debido aos lumes que levan causado destrución e morte. Este acto significa tamén un berro contra o monocultivo do eucalipto, que está na orixe da desfeita do ecosistema e que é a base dunha política forestal antisocial que só obedece a intereses económicos de certas empresas madeireiras, segundo recollen certos medios e estudos. O noso alumnado, o noso centro educativo reivindica a recuperación das nosas especies frondosas autóctonas, o que é propiamente o bosque atlántico, como unha das medidas que contribúen a coidar o medioambiente. Seguiremos sempre a demandar a protección do patrimonio natural e a reivindicar a biodiversidade. NON AO TERRORISMO INCENDIARIO!!!Alumnado e profesorado concentrado na escalinata

Benvidas e benvidos!!!

O martes 6 de maio, visitaron o noso centro as alumnas e alumnos de 6º de EP dos colexios das Neves e Arbo. Ás dez da mañá, e acompañados polos seus profesores, o equipo directivo do instituto recibiunos. Logo en UUMM, o director, a xefa de estudos, o vicedirector e a orientadora informáronos de aspectos do seu interese, relacionados coa futura e próxima incorporación ao noso centro.

O alumnado percorreu as dependencias do centro. Visitaron a aula de 1º de ESO onde a profesora Monste impartía lingua castela e logo unha de 2º onde a profesora Emilia impartía inglés. Seguidamente, e divididos en dous grupos, accederon a diversas dependencias. No laboratorio de Química, foron recibidos por Nuria onde observaron varios experimentos; con Carmela, no laboratorio de Bioloxía, viron a través dos microscopios diversas plantas. Finalmente, antes de saíren ao recreo, pasaron pola aula de plástica onde Roberto lles mostrou algunhas das creacións que nela se realizan.
Alumnado no laboratorio

Acto informativo a nais/pais/titores legais do alumnado que accede a 3º ESO para o vindeiro curso

O pasado luns día 5 celebrouse en Usos Múltiples unha concorrida reunión para comentar por parte da Dirección e  o Departamento de Orientación do noso centro, as distintas opcións que se lle presenta ao alumnado de 3º de ESO e as repercusións nos estudos posteriores.
Valórase moi positivamente a alta presenza de nais/pais/titores legais que practicamente enchía o salón. Para o noso instituto resulta moi gratificante comprobar o grande interese e participación que amosaron os presentes na reunión. Tamén se evidenciou o desconcerto diante da situación de incerteza que a nivel normativo/lexislativo se está a dar no sistema educativo actual, situación causada pola implantación da LOMCE.
Desde o equipo directivo agradecemos publicamente a través desta páxina a presenza e participación das familias asistentes ao acto. Este é un dos camiños a seguir para mellorar a calidade do ensino público.

Xornada acollemento para alumnado libre de FP.

O vindeiro venres 26 ás 11:30 terá lugar a sesión de acollemento de alumnado libre de formación profesional, na sala de usos múltilples do IES Pazo da Mercé. Esta xornada é de obrigada asistencia para o alumnado matriculado por libre no ciclo de Sistemas Microinformáticos e Redes, segundo se recolle na orde do 5 de abril de 2013, pola que se regulan as probas para a obtención dos títulos de técnico e de técnico superior de ciclos formativos de formación profesional.

Distribuir contido