Ademais da escape room do día 23, desde a Biblioteca propúxose e levouse a bo fin unha actividade desas que fan gracia: un concurso de "quen é quenno IES Elviña?". Unha vintena de profes e profas e máis algún membro ben coñecido do persoal non docente rebuscaron entre as súas fotos de pequechos e trouxeron unha imaxe da súa tenra infancia. A actividade tiña o seu aquel de literatura, pois a principal pista para recoñecer aos retratados era unha lembranza literaria... Aí tivestes en todos os recreos da semana ao alumnado (e ao profesorado) do insti escachando coa risa na tentativa de recoñecer nos trazos do pasado as enrugas do presente...
Xa sabiamos que pechar xente polos sitios é divertido e ademais está de moda. Pois nada, se o di a moda, que é unha señora que sabe moi ben o que di, que iamos facer nós, homes e mulleres deste malfadado século XXI decadente e sen imaxinación? Pois facer una escape room (para sermos máis chic temos que pronuncialo "esqueip rum", pero con u longo, ou sexa "ruum", coma fai un motor aceso). E como, cando se trata de estar á última, en Elviña somos os que máis, decidimos pechar ao alumnado de 3º de ESO na Biblioteca o día do libro (parece lóxico: día do libro, Biblioteca...). Porén, paradoxicamente a intringulis do asunto estaba en escapar dela... Que ninguén nolo tome mal, de todo canto se pode facer nunha biblioteca, unha escape (lembrade, léese esqueip) évos cousa ben inocente. A fin de contas, o mesmo Cervantes chimpoulle lume á biblioteca do seu andante cabaleiro. Nós aínda non chegamos a tanto...
Pero sexamos serios, que este é o segundo parágrafo (1). Do que se trataba neste caso é de achar as combinacións dos catro broncíneos cadeados que pechaban as solemnes portas da Biblioteca. Catro probas, a cal máis retorcida, levaban ao alumnado ás desexadas combinacións a través da lectura e consulta de libros, da resolución de acertixos, da pericia matemática, da orientación espacial (nisto axudaron as meigas pequenas, ou sexa, as brúxulas), da habilidade para resolver puzzles ou para decodificar criptogramas... De todo se fixo para que o paso dos rapaces e rapazas pola Biblio do noso centro fose entretido. Conseguiuse? Dígano as imaxes, que valen máis que mil palabras (pero só cando están mal escritas, non como estas, que fiz as máis apostas que puiden achar (2)). O demais será silencio.
(1) Os amables lectores saberán desculpar ao redactor desta reseña: a lectura estragoulle o siso, como lle pasou a Don Quijote e a Raskolnikov. Por outra banda, a tarde anterior estivo a ler a Larra e non pode dubidarse que se lle pegou algo o estilo do ilustre autor (espérase que non o temperamento). Se alguén cre que pode confiar en que volte á razón, cousa é de esperar que se acade co tempo ou coa penitencia (como lles pasou aos dous personaxes mencionados), ata entón, toca entoar aquilo do canto terceiro do Dante: lasciate ogni speranza...
(2) Xa para rematar: hai que agradecer á historia da literatura universal todos os préstamos intertextuais (i.e. citas, quotations, furtos) que andan espallados por esta reseña. Grazas lle sexan dadas a Juan Manuel, a Dante, a Cervantes, a Dostoievski, a Larra, a Darío, a Homero, ao bardo de Avon e aos restantes non mencionados. Xuramos que os plaxios, se os hai, non son conscientes (¡Ni gato ni perro de aquella color!). Ou, confirmando as verbas de Azorín sobre a broma de d'Annunzio, "lo que no es tra(d)ición es (pl)agio". Ou foi Baroja? Non quero acordarme...
O día 30 de xaneiro celebramos o Día da Paz. O equipo de dinamización da Biblioteca puxo da súa parte para facer visible o compromiso da comunidade educativa de Elviña coa non violencia. O mal tempo non permitiu moitas alegrías fóra do centro (lamentablemente non houbo saída ao patio nin concentración, coma o ano pasado), pero dentro do insti... ¡ai, dentro do insti!... houbo compromiso dabondo: víronse vídeos, fixéronse murais e cada un, deixou a súa pegada na loita pola paz.
Mesmo o martes pola tarde pasaron polo instituto algunhas ratiñas non pouco presumidas que engadiron as súas pegadas ás dos nosos rapaces. Cando a ocasión é boa, benvidas sexan...
Os ratos que viñeron do Alborada
Desta vez, o noso Carlochos fixo vídeo da xornada, coa súa habitual pericia de director e mesmo guionista. Deixamos o enlace coa súa canle de Youtube e engadimos uns versos de Blas de Otero (a poesía, esencial humanidade na palabra enchida de senso e emoción, arma poderosa dos pacíficos) pertencentes ao seu libro Pido la paz y la palabra (1954).
Creo en la paz. He visto altas estrellas, llameantes ámbitos amanecientes, incendiando ríos hondos, caudal humano hacia otra luz: he visto y he creído.
Achéganse os días finais do primeiro trimestre e as luces do Nadal acéndense no noso instituto. Ao mesmo tempo que se adorna o rostro da fachada cunha nova e flamante porta de cristal, engalánanse tamén os andares e os espazos públicos do centro para festexar o fin de tremestre e a chegada do tempo das Saturnalia-Janucá-Nadal. Acumúlanse as actividades e celebracións no IES Elviña nestas datas: patinaxe sobre xeo, visita á casa-museo de Valle-Inclán en Vilanova de Arousa, exposición de tarxetas postais, preparación de "cookies" non informáticas, exposición de murais sobre os dereitos humanos, actividades da Biblioteca... En fin, que neste frenesí de fin de trimestre, entre exame e exame, avaliación e avaliación, aínda hai tempo para as celebracións.
A nosa "Árbore de biblionadal"
Empecemos pola Biblioteca. A intrépida bibliotecaria Alba Lorenzo, adicou un tempiño co alumnado de 3º de ESO para acondicionar a seriosabiblio de acordo coas datas que corren. Como, polo visto, Santa Claus tamén pasará pola nosa biblioteca, deixouse unha árbore de libros para que se entreteña este orondo visitante nórdico. En fin, que, desde a biblioteca do IES Elviña, se desexan felices festas e que o vindeiro 2019 veña con moitas lecturas para todos e todas!
O instituto vestido de invernía
Pois o dito, que como chega o solsticio de inverno toca encher todo de espumillóns verdes, árbores con boliñas de cores e todo iso. Aí van as fotos.
Christmas & Cookies
Outros que se sumaron ás celebracións son os rapaces e as rapazas e o profesor e a profesora (hai que ser inclusivos e inclusivas) do grupo de Actividades plurilingües do luns á tarde. Así que, co aquel da viciñanza do Nadal, o grupo fixo unha actividade consistente en cociñar unha receita tradicional inglesa, os Gingerbread cookies. Metidos novamente a cociñeiros despois do Thanksgiving, adeliñaron os ingredientes da masa e déronlles forma, coa calor da lareira (i.e. forno) déronlles tamén vida (They are alive!), e despois as degustaron (ou sexa, que as comeron, pero finamente) mentres cantaban a Christmas Carol (galego común: panxoliña) The twelve days of Christmas. Máis fotos para o delight da vista.
Árbore e postais de Nadal
E, para rematar, a nosa árbore, montada este ano polo alumnado de PMAR coa inestimable dirección de Gemma López. Grazas a todos polo traballo.
O venres pasado, día 23 de novembro, o profesorado e alumnado do IES Elviña abriu un oco nas súas tarefas cotiás para amosar o seu compromiso coa loita pola dignidade da muller, conmemorando deste xeito a Xornada internacional contra a violencia machista que se celebrou o domingo 25. Desta vez, unha serie de sinxelos actos de protesta e compromiso foron as contribucións simbólicas (humildes e sinceiras) do noso instituto a esta noble e tan necesaria loita.
Así, durante a mañá do luns 19 e do mércores 21, todos os grupos asistiron á proxección de varios vídeos de concienciación e crítica sobre a situación de desamparo da muller maltratada. Eses mesmos grupos, escolleron os seus propios lemas para confeccionar un vídeo-protesta a partir deles (coa sempre amable colaboración de Carlos, compañeiro de traballos e director de cinema do insti).
Desde a Biblioteca do centro, asemade, preparouse unha selección de lecturas e de filmes que teñen por tema a violencia sobre a muller. A selección acompañouse tamén dun mural con poemas, imaxes e textos destinados a espertar a reflexión do alumnado.
O venres, ademais, o alumnado de 1º e 2º de ESO e parte do profesorado aproveitaron os dez minutos de miragroso sol entre os insistentes chaparróns da mañá (e da tarde, e da noite...) para facer no patio do centro un lazo humán contra as violencias machistas. Aí estiveron profas, profes, rapazas e rapaces coas mans ben moradas (de friaxe non, sí de compromiso) gardando o preceptivo minuto de silenzo polas moitas mulleres (unha xa sería dabondo!) que a cotío sofren a gratuíta violencia do sexo oposto. Unha aperta de ánimo a todas elas desde o IES Elviña.
As imaxes e vídeos contidos nesta páxina web corresponden ás actividades desenvolvidas dentro da Programación anual de actividades do noso centro polo noso alumnado. Todas as familias e responsables legais do alumnado que aparece nelas asinaron coa matrícula un permiso específico para permitir a difusión destas imaxes a través da web do instituto ou a través das contas en espazos web e en redes sociais que son de titularidade do IES Plurilingüe Elviña. Asimesmo, familias e responsables están tamén informados do seu dereito de revogar esa autorización de uso de imaxe. Lémbrase que a descarga destes materiais visuais e o seu uso por terceiros fóra do estrito marco dos espazos e funcións permitidos pola autorización citada (isto é, a difusión meramente informativa das nosas actividades complementarias e extraescolares a través da páxina web oficial do centro e a través das contas das que o centro é titular) son ilegais, poden e deben ser denunciados. O IES Plurilingüe Elviña non se fai responsable do uso que se poida facer destas imaxes por terceiros fóra do ámbito dos espazos web que son da súa titularidade.
