Música

     Como xa comezamos o curso, xa comezan as actividades didácticas (pois claro!). A semana pasada, a nosa compañeira Alba, encargada da Biblioteca a partir deste curso, acompañou ao alumnado de 1º de ESO para presentar aos rapaces o espazo dos libros no centro dun xeito lúdico. E o venres día 5 de outubro inaugurouse o salón de actos neste curso cun concerto do guitarrista arxentino Augusto Gabriel Ayala. O concerto, cortesía da asociación Pórtico das artes, tiña como base o traballo cos ritmos da América latina (chamamé, tango, chacarera, zamba...). O alumnado desfrutou dunha hora de concerto entre palmas rítmicas e comentarios didácticos do músico.

 Augusto Gabriel Ayala. Datos biográficos e profesionais

     Guitarrista nado na cidade de Concordia (Entre Ríos, Arxentina) o 4 de outubro de 1998. Nela comezou a tocar desde idade moi temperá. Tivo como primeiro mestre ao seu pai, que lle contaxiou a súa paixón pola música.
     Participa habitualmente en festivais prestixiosos, tal Guitarras do mundo, festivais de tango independente e o Ciclo de Música do Litoral, ademais doutras actividades en centros culturais e teatros de toda Arxentina.
     Ten gravacións no sello discográfico Epsa Music como solista de guitarra. Asimesmo, a súa actividade como concertista é moi variada en moi diversos lugares do mundo (Brasil, España, Turquía e Francia, entre outros).
     Mostra da súa actividade e da súa calidade como intérprete este vídeo da súa canle de Youtube.

Wagner e o IES Elviña

O pasado venres día 16 de marzo, o alumnado de música de 4º de ESO acudiu, como ven sendo tradición, aos ensaios públicos dados pola Orquesta Sinfónica de Galicia. Nesta ocasión a orquesta estivo dirixida polo prestixioso director barcelonés Josep Pons, quen ofreceu ao alumnado dos centros coruñeses un programa de obras de Richard Wagner, o revolucionario operista alemán do século XIX. O alumnado foi ao Palacio da Ópera acompañado pola nosa benquerida compañeira Gemma López e pasaron un bo rato coa música do xenio de Leipzig.

     Os rapaces e rapazas de 3º de ESO estiveron este xoves 9 de Novembro no Palacio da Ópera da cidade para acudir a un ensaio didáctico da Orquestra Sinfónica de Galicia. Alí puideron escoitar a Sinfonía nº 9 "From the new world" do compositor checo Antonin Dvorak. A obra estivo dirixida polo prestixioso director israelí Eliahu Inbal. Foron acompañados polas nosas compañeiras Gemma López e Isabel Carballada.