Actividades Espazo maker

Os rapaces de 2º ESO A estiveron a fabricar chapas identificativas co logo do grupo de investigación ao que pertencen, que lucirán nas batas de laboratorio. Unha vez escollidas as imaxes de Curie e Newton pasaron á acción: fabricaron chapas de alfinete como auténticos profesionais, iso si, sen perder a vertente divertida. Decidiron o deseño, repartiron o traballo e había que velos usando a máquina de facer chapas, poderían crear unha produtiva empresa de merchandising.  

Aproveitando esta actividade estiveron coñecendo curiosidades destes dous científicos aos que homenaxean e participaron en concursos sobre a súa vida e as súas investigacións. A loita foi dura xa que tiñan moitos coñecementos sobre Marie e Isaac e ó final todos gañaron aínda que só houbese un vencedor.

Os alumnos e as alumnas de 6º de primaria do centro adscrito CEIP Plurilingüe Manuel Murguía puxeron en práctica os seus dotes detectivescos localizando impresións dixitais. No laboratorio de Ciencias Naturais trataron con po de carbón, e unha minuciosidade propia de Sherlock Holmes, o material de vidro para buscar as impresións dixitais escondidas. Pero non acabaron aí as súas ansias detectivescas, no laboratorio de Química traballaron como auténticos CSI usando iodo para o revelado das pegadas e seguindo todo o procedemento dun laboratorio de criminalística (bata de laboratorio, lentes e campá extractora incluída).

Toda a rapazada gozou desta busca de pegadas, e os que non somos tan rapaces tamén, e esperamos con ansia compartir máis actividades no espazo maker.

O IES Plurilingüe Elviña está de noraboa!

     O noso centro ven de obter un dos dez Espazos Maker que a Consellería de Educación sacou a concurso a través da Convocatoria da súa Dirección Xeral de Educación, Formación Profesional e Innovación Educativa. Con esta concesión o noso instituto súmase ao moi selecto grupo de institutos de toda Galicia (só dez ata o momento) que contan cun espazo destas características. Os "Espazos Maker" foron creados co desexo de dotar aos centros de ensino dunha aula completamente acondicionada para o desenvolvemento de actividades de carácter científico-tecnolóxico (actividades STEM nas súas siglas inglesas: Science, Tecnology, Engineering e Mathmatics).
     Certamente, é un motivo de orgullo para o centro esta noticia, que supón a recompensa para case un ano de esforzo no deseño e composición do proxecto de traballo co que o IES Elviña participou na convocatoria. Parabéns á súa principal responsable e a todo o persoal que se implicou na súa realización. O agradecemento de todo o centro tamén a todos os que, desde fóra, sexa co bo consello ou cos bos desexos, colaboraron tamén e alentaron a súa consecución.

     A partir de hoxe, abriremos unha xanela na nosa web para as actividades e novidades deste novo e flamante espazo de traballo. Vémonos!