Skip to Content

O IES de Valga gaña o concurso Odisea de cultura clásica

Gañadoras da VI edición do concurso "Odisea"

O IES de Valga proclamouse campión galego no concurso Odisea de Cultura Clásica na súa VI edición. O grupo formado por Isabel Rita Catoira Senín, Lucía Fariña Potel e Carla Rodríguez Cordo, alumnas de Latín e Grego de primeiro de Bacharelato, que concursaron co nome grego Stratiatai, que significa “as guerreiras”, proclamouse campión nesta edición tras gañar tanto na fase local como na final galega.
A final realizouse no IES de Chapela, e dos cinco grupos finalistas pertencentes a centros de Redondela, Melide, Vila de Cruces e Oleiros, foi o único que deu con todas as respostas ás cuestións formuladas.
Este concurso, que se celebra anualmente, premia os coñecementos do alumnado sobre a Antigüidade Clásica, e nel formúlanse un número variábel de preguntas ás que se debe responder nun tempo limitado. Este ano o concurso está centrado no “Deporte en Grecia e Roma”, e participaron 243 grupos en todo Galicia. IES de Valga. A directora do IES de Valga, Dolores Rego Balsa lembra que o centro xa accedera en anteriores edicións á final galega, gañándoa en 2016 e sendo finalistas tamén na fase estatal, “o cal só pode ser froito do intenso traballo do alumnado participante e do magnífico labor do profesor Raúl Gómez Pato”.
O equipo gañador vai participar na final estatal, que se desenvolverá o vindeiro mércores día 19, en que competirá cos once grupos das outras autonomías finalistas.

Alumnado de 2º Bacharelato participou na XI Olimpíada de Xeoloxía

Alumnado de Xeoloxía de 2º Bacharelato na  XI Olimpiada de Xeoloxía

O mércores 12 de febreiro o alumnado de Xeoloxía de 2º Bacharelato participou na fase autonómica da XI Olimpíada de Xeoloxía. Foi organizada pola AEPECT (Asociación Española para la enseñanza de las Ciencias de la Tierra), a Sociedade Española de Xeoloxía e o Colexio Oficial de Xeólogos. Este evento tivo lugar en Santiago de Compostela, no Museo de Historia Natural da USC, e na Facultade de Bioloxía. O alumnado, ademais de realizar as diferentes probas, asistiu a unha conferencia sobre as turbeiras galegas.

Alumnado de Xeoloxía de 2º Bacharelato na  XI Olimpiada de Xeoloxía

O noso Centro participa en EDUGAL 2020

O IES Valga en EDUGAL 2020

O noso Centro participa desde esta maña no 9º Salón EDUGAL. Salón de Oferta de Educación e Formación de Galicia, Edugal, é un lugar de encontro para o alumnado, os profesionais do ensino, os centros de formación e as institucións educativas que exerce un papel de asesoramento e orientación ao alumnado á hora de escoller as súas opcións formativas de futuro. Promovido pola Asociación de empresarios da pequena e mediana empresa (Aempre) co apoio da Xunta de Galicia entre outras entidades, o 9º Salón Edugal reúne 56 expositores no Recinto Feiral de Pontevedra nos que estudantes e familias poden informarse desde hoxe e ata o día 14 de febreiro das diferentes opcións de formación que se ofertan en Galicia. Na cita están presentes a FP, a universidade, diferentes centros de ensino, fundación e empresas colaboradoras da FP Dual, entre outros.

O IES Valga mostra no seu stand a oferta educativa e as saídas profesionais do Ciclo Medio de Soldadura e Calderaría así como o do Ciclo Superior de Construcións Metálicas.

Alumnado de 2º ESO asiste á representación da obra "Lazarillo de Tormes"

Alumnado 2º ESO en Santiago

O mércores 12 de febreiro, o alumnado de 2º ESO asistiu á representación da obra de teatro "Lazarillo de Tormes". Alumnos e alumnas puideron ollar esta adaptación teatral da novela picaresca por execelencia, a da vida de Lazarillo de Tormes e das súas fortunas e adversidades, organizada por Transeduca. Esta función tivo lugar no auditorio do Colexio La Salle de Santiago de Compostela. Foron acompañados polo profesorado Carmen Pedreira, Hilda Gulías, Silvia Fernández e Modesto Fontán. A actividade foi organizada polo departamento de Lingua e Literatura Castelá.

Alumnado de 2º ESO en Santiago

Alumnado de 1º ESO asiste a unha charla sobre uso de internet e as redes sociais

Alumnado de 1º ESO na conferencia sobre o risco das novas tecnoloxías

O alumnado de 1º ESO asistiu na aula de audivisuais a unha charla sobre internet e redes sociais. A charla, titulada "riscos de seguridade nas novas tecnoloxías e as redes sociais" , está incluída dentro do Plan Director do Ministerio do Interior español para a convivencia e mellora da seguridade nos centros educativos e as súas contornas. Durante máis dunha hora, persoal da Garda Civil explicou ao alumnado como evitar situacións de risco persoal relacionadas co uso de internet e as redes sociais, sobre todo no caso de compartir fotos e vídeos. A actividade foi organizada pola departamento de Orientación.

Alumnado de 1º ESO na conferencia sobre o risco das novas tecnoloxías

Distribuir contido


by Dr. Radut