Anuncios

PREMIO PARA O ALUMNADO DO IES PLURILINGÜE ELVIÑA

     A Fundación Mulleres fixo públicos os premios do seu concurso de banda deseñada "Nin racista, nin machista! Mocidade feminista!" e, cal non será a sorpresa, que os tres primeiros premios foron outorgados a dúas rapazas e un rapaz do noso centro. Sorte? Non, sorte non, calidade dos traballos e das ideas gañadoras. Parabéns aos gañadores e aos demais participantes, e moi especialmente, á súa profesora de plástica, a nosa compañeira Ángeles Novás, venturosamente xubilada, que animou a participar ao seu alumnado de debuxo de 3º e 4º de ESO. 

	1º premio: Sophia (3º ESO)    "Un mundo coloroso"    Afonda Sophia na semellanza entre as persoas e    as ceras de cores: todos podemos ser diferentes,    pero as diferencias fan o mundo máis fermoso.
	2º premio: Paula (4º ESO)    "Máis forte ca xenreira"     A muller ten que loitar contra os estereotipos     machistas: as veces a aparente forteza exterior     agocha moita dor e sufrimento.
	3º premio: Alen (3º ESO)     "Oruga"     Hai moita xente empeñada en dicirlle aos demais o     que teñen que ser: pero cada un de nós sabemos     o que queremos ser...

Remate de etapa e orientación

     Atendendo á necesidade de informar e orientar coas máximas garantías que sexan posibles ao alumnado que remata ciclo dentro da educación secundaria obrigatoria e post-obrigatoria, o Departamento de Orientación do IES Plurilingüe Elviña, dirixido pola docente Ana Rivera, organizará entre os días 2 e 6 de marzo unha Semana de Orientación Académica e Profesional no IES Plurilingüe Elviña destinada ao alumnado de 4º de ESO e Bacharelato.

      Durante esa semana, o alumnado destes cursos asistirá a charlas informativas impartidas por representantes de diversas institucións locais, autonómicas e nacionais sobre as saídas académicas e profesionais dos estudos de secundaria.

      Entre as institucións invitadas nesta ocasión haberá representación das universidades galegas, de varias facultades privadas, centros de FP e doutras institucións públicas.

     Ademais, o martes día 3 de marzo a partir das 17:00 horas e ata as 19:00, abrirase a todo o alumnado destes grupos e ás súas familias unha sesión conxunta de mesas abertas na que os representantes de cada institución invitada informarán aos interesados que se acerquen. Todas as persoas que desexen asistir serán benvidas.

     No seguinte enlace poderán consultar o cartaz informativo e os horarios das sesións.

Festival de fin de trimestre

O día 20 de decembro remataron as aulas do ano 2019. Triste circunstancia que celebramos cun alegre festival, no que cantamos e bailamos, como correspondía coa xornada. O plantel do festival deste ano non desmereceu, de feito, máis de un (e de unha) quedou abraiado coa calidade das voces e das interpretacións musicais. No IES Elviña hai talento á esgalla.

Felicidades para o ano novo

     E despois do festival, chega o fin de ano! Como non podía ser menos, celebrámolo tomando as uvas noutro programa especial da Elviña Broadcasting Corporation. Que vostedes o desfruten!