Este 18 de abril o alumnado de 1°ESO do noso instituto con algún profesorado fixemos unha visita á cidade de Pontevedra. Gozando dun día marabilloso, realizamos un roteiro polo centro histórico desta fermosa vila.
Este roteiro organizouse, sobre todo, cun enfoque cronolóxico. Partiuse da ponte do Burgo, ás beiras do río Lérez, de orixe romana, onde puidemos ver a reprodución do miliario e de restos arqueolóxicos. O seguinte aspecto foi introducirnos polo rueiro medieval, contemplando algunhas casas desa procedencia.Tamén a denominación antiga das rúas testemuñan aquela etapa, do mesmo xeito cós restos da muralla ou pegadas de torreóns. Logo admiramos a basílica de Santa María, sobre todo a súa fachada occidental, levantada no seculo XVI pola Confraria de Mareantes, cando o porto tiña grande importancia económica, principalmente grazas á pesca da sardiña e ao comercio de viño e outros produtos. Posteriormente fomos facendo un grato percorrido por certos puntos significativos da historia local (coincidente nas grandes liñas coa historia de Galicia): algo da evolución urbanística do século XIX, como a zona da Alameda, os edificios institucionais (concello, deputación, actual instituto, actual faculdade Belas Artes...), rúas de nova apertura. Tamén fixemos parada diante do Teatro Principal, aproveitando un gran cartel que del penduraba coa imaxe de Maria Victoria Moreno, para lembrarmos que esta é a escritora das letras galegas do 2018. Igualmente contemplamos varias esculturas en diversas prazas: por exemplo, a de Teucro, o fundador mítico da cidade, ou algunhas de Castelao, o político, escritor e debuxante do Partido Galeguista que, nacendo en Rianxo, viviu moitos anos en Pontevedra antes de que a ditadura de Franco puxese fin violentamente á etapa republicana.
Outras paradas explicativas feitas foron a casa onde viviu o escritor Valle Inclán e as ruinas da igrexa medieval de San Domingos.
Tras un pequeno descanso, asistimos ao Museo de Pontevedra, a un percorrido guiado (en dous grupos) pola prehistoria (paleolítico, neolítico, idade dos metais) e historia antiga (castrexo, romanización, algo dos suevos) de Galicia. Puidemos ver e entender o gran patrimonio que temos no noso país nas distintas etapas e a súa importancia para coñecelo. Restos diferentes, monumentos, xoias, pezas de arte, utensilios para a vida, invocacións a deuses e deusas, achádegos... toda unha sorte a de ver, aprender e valorar a nosa historia.
Grazas ao Museo e ás dúas guías que nos acompañaron, nos explicaron e atenderon ás nosas preguntas. |  
|
