14/01/2023

Deixamos aquí a reportaxe emitida onte no Telexornal de TVE sobre a obra de teatro en inglés á que asistiu o noso alumnado de 3º e 4º de ESO. Grazas especiais ao alumnado que participou saíndo a escena e incluso respondendo ás preguntas de TVE (que tamén abordou a súa profe Irene).

Unha unidade móbil da TVG no Feal o pasado domingo

23/04/2010

A directora do Feal, Mª Dolores Vizoso, estivo toda a fin de semana do 17 e 18 de abril de garda no centro, e cansa de non acadar unha solución rápida para o problema irlandés/islandés, decidiu convocar a todas as familias dos afectados para unha rolda de prensa que tivo lugar o domingo ás 18:30 no noso centro. As imaxes foron emitidas nos informativos da TVG e de Tele 5:

• Telexornal da TVG, 18/04/2010
  
• Informativos Tele 5, 18/04/2010

Nota: a TVG non atopou as imaxes de Dublín en YouTube, se non na nosa web; a lástima foi que non tivéramos un vídeo con máis calidade.

O día seguinte (19 de abril), unha morea de medios apostouse na entrada do centro para cubrir a noticia. Sería imposible recoller aquí todo o emitido por televisión.

29/03/2010

O pasado 26 de marzo, a canle 31 de Ferrol (que de momento non entrou na TDT) emitiu unha reportaxe sobre a nosa biblioteca exipcia dentro do seu programa cultural Caleidoscopio. Podes ver o vídeo:

1. en YouTube (tamaño grande)
2. na Galería do Feal (tamaño pequeno)

Fai clic para ver o vídeo

24/01/2010

O noso centro xa levaba un tempo sen saír na tele. O Feal apareceu no telexornal do mediodía do pasado 21 de xaneiro, con motivo da folga no ensino contra o borrador do novo decreto do galego. O pequeno vídeo que achegamos inclúe os dous fragmentos que houbo con imaxes do Feal (separados por unha cortiniña da TVG); o primeiro foi na cabeceira e o segundo algo máis adiante. Nos dous fragmentos, a TVG cometeu o erro de presentar ao presidente da nosa ANPA como mestre.

Fai clic para ver o vídeo

31/05/2009

Este domingo levamos unha sorpresa vendo o Telediario: Eloy Castro, un ex-alumno que aínda estaba en 4º de Diversificación hai dous cursos, apareceu falando dende Afganistán onde está pasando unha temporada como militar. Esperamos que á volta da operación pase polo Feal para contarnos a súa experiencia.

Fai clic para ver o vídeo

26/04/2009

O pasado venres 24 de abril, o alcalde de Narón xunto coa Concelleira de Educación visitaron o noso centro.

En primeiro lugar, comunicaron ao equipo directivo e a ANPA as melloras que o Concello ten previstas a curto prazo no recinto do Feal (valado, aparcadoiro, parque infantil e zonas verdes).

A continuación, en compañía de representantes da Federación Española de Sociedades Filatélicas, Correos e a nosa comunidade educativa, pasaron a clausurar a exposición de selos que estivo con nós durante esta semana. Achegamos o vídeo emitido no Canal 31 de Ferrol o mesmo venres, e tamén podedes ver algunha imaxe adicional na Galería. Foi este un acto máis solemne e protocolario do que estamos acostumados no Feal.

28/03/2009

Xa faláramos nesta web do "V Encontro coa Zanfona Contemporánea" que tivo lugar en Narón a mediados de marzo. O que non sabiamos é que a Televisión de Galicia transmitira en directo a visita do noso alumnado de Primaria a Aldea Nova durante estas actividades. Foi no programa "A revista" do venres 13 de marzo. Unha vez máis, un tirón de orellas a toda a xente que o sabía e non avisou a esta web.

No vídeo que podedes ver pinchando na foto, a protagonista é a nosa alumna Uxía Muíño, pero hai máis caras coñecidas. Houbo outra conexión con menos protagonismo do noso alumnado. Tamén podedes ver algunhas fotos adicionais na Galería.

Adrián Carballo e o burro Zapatero

06/03/2009

Unha das persoaxes máis carismáticas do Feal, o alumno de 3º de ESO Adrián Carballo, apareceu no programa "Criaturas" da Televisión de Galicia do pasado 4 de marzo.

Achegamos un vídeo que concentra todas as partes do programa relacionadas con Adrián, aínda que segue sendo bastante longo. Tamén está dispoñible nos "Vídeos 2009" da Galería.

Ademais, podedes ver o programa enteiro na web da TVG. Neste caso, as intervencións de Adrián están repartidas nos seguintes tempos:

• 00:57
• 04:27
• 10:37
• 18:03
• 24:38

12/05/2008

No programa "Plató abierto" de Localia Ferrol do 12 de maio, emitiuse unha longa entrevista con Salvador Basoa para tratar o problema da admisión de alumnado en Infantil. Achegamos un vídeo cun fragmento da mesma que podedes ver facendo clic na foto. Unha vez máis, temos que agradecer o gran compromiso do presidente da ANPA co noso centro.

15/02/2008 

A este paso teremos que poñer en marcha un canal temático de televisión dedicado íntegramente ao Feal. A Televisión de Galicia entrevistou ao presidente da nosa ANPA Salvador Basoa e á nosa xefa de estudos de Primaria Eva Bouza para coñecer a situación real do noso centro. As imaxes foron emitidas o 15 de febreiro en Galicia Noticias ás 20:15 e son como unha segunda parte de estas outras.

Foi unha lástima que cando chegaron os periodistas non houbera actividade no Feal, pero hai que agradecer moito aos dous entrevistados a súa valentía e soltura ante as cámaras. Tamén felicitamos ao cámara polo ben que retratou O Feal. Só tedes que facer clic nas fotos para ver o vídeo.