Saltar navegación.
Inicio
Narón (A Coruña)

Música

Xurxo Souto no Feal

Xurxo Souto no Feal

02/06/2018

O pasado luns 28 de maio tivemos a visita do polifacético Xurxo Souto. O autor da Oda ó futbolín e tantas outras pezas festivas, ofreceu unha intensa charla ao alumnado de 2º de ESO A, centrada na historia do rock en galego.

Unha sesión non foi suficiente para o seu torrente verbal, pero quedámonos co seu entusiasmo contaxioso, e coa idea de que os adolescentes non deberían ser meros espectadores do mundo cultural, senón tamén protagonistas, creando música, vídeos, literatura, aparellos... e o que faga falta. Grazas, Xurxo!

Xurxo Souto no Feal

 

Álex López coa súa guitarra

22/12/2017

O noso alumno de 4º de ESO Alejandro López Yáñez, trouxo onte a súa guitarra eléctrica co seu ampli, e estivo tocando para os seus compañéir@s na aula de Música. No vídeo, podedes velo cunha peza de Sleeping with sirens ("If I'm James Dean, you're Audrey Hepburn"). Se no fondo só aparecen dúas compañeiras, é porque o resto prefería non verse en Internet. Moitas grazas a Álex pola súa iniciativa!

O ritmo de 4º de ESO no Auditorio de Ferrol

01/07/2017

Tiñamos este vídeo no conxelador desde o pasado 25 de abril, cando parte do noso alumnado de 4º de ESO (dirixido por Alba Alonso) participou no Encontro de Música celebrado no Auditorio de Ferrol.

O vídeo non se publicou ata agora porque estaba previsto repetir esta actuación no festival de fin de curso, e finalmente non foi posible.

VI Encontro de Música no auditorio de Ferrol

VI Encontro de Música

Fai clic para ampliar a foto

14/05/2017

O pasado martes 25 de abril, o alumnado de 3° e 4° de ESO coa materia de Música asistiu ao VI Encontro de Música no auditorio de Ferrol. Alí gozou dun concerto no que actuaron os diferentes centros participantes (de toda Galicia), e o noso estaba representado polo grupo de 4° de ESO con Música, que sorprendeu cunha divertida actuación de ritmo. Despois do concerto, todos os participantes pasárono en grande nos obradoiros programados: beat box, hip hop, técnica vocal e percusión, para rematar cun xantar común no Odeón. Foi un gran día no que aprenderon música, puideron gozar de diferentes actuacións musicais, e coñecer a xente nova.

As profesoras acompañantes (Alba Alonso e Eva Loureiro) queremos destacar o bo comportamento do alumnado e felicitar á organización do encontro, así como sinalar o alto nivel musical e o bo facer dos compañeiros/as na materia de Música.

E grazas á Asociación Asomúsica, que foi a que fixo posible este encontro. Agora a polo VII!!

VI Encontro de Música

Fai clic para ampliar a foto

Love is in the air

Love is in the airFai clic para ampliar a foto

13/02/2017

O amor... sen dúbida a temática máis empregada polos músicos nas súas cancións. Podemos atopar cantos ao amor platónico, ao desamor, hai cancións alegres, amargas... centos delas que cantan a tódolos sentimentos que provoca o amor. Aquí tes un novo xogo, adiviña cal é a mensaxe das cancións do mural e poderás gañar un premio!! Anímate e participa!

Nota: Graciñas ao alumnado de 4° de ESO que colaborou na realización do mural.

Alba Alonso

Música pola Paz

Paz 2017Fai clic para ampliar a foto

30/01/2017

Aínda que a temática máis empregada polos cantantes é o amor, hai un bo número deles que escribiron ou interpretaron cancións de paz. Esta semana celebramos o día da paz cun xogo. No corredor da segunda planta de Secundaria, hai un mural con cancións, títulos e artistas que cantaron pola paz. Úneos correctamente e poderás gañar un premio! O xoves no recreo escoitaremos as cancións na aula de Música e o venres publicaranse os/as gañadores/as. Anímate!

Alba Alonso

P.S. Grazas ao alumnado de 3º e 4º que colaborou na realización do mural.

Visita aos estudios de gravación "Mans" e á embotelladora coruñesa de Coca-Cola

Mans

26/03/2015

O departamento de Música de Secundaria organizou unha saída coruñesa para o noso alumnado de 3º de ESO (xunto cunha pequena representación de 4º), que tivo lugar esta mañá.

O principal obxectivo era visitar os estudios de gravación Mans onde, por exemplo, foi gravada a banda sonora da aínda non estreada El desconocido (rodada na Coruña e protagonizada por Luís Tosar). As explicacións foron bastante técnicas, pero interesantes.

A continuación, a saída completouse cunha visita á embotelladora coruñesa de Coca-Cola, onde é posible ver parte das liñas de produción, aínda que desde un lugar un pouco apartado. Esta visita rematou cun animado debate sobre a composición do famoso refresco.

Podedes ver algunha imaxe adicional na nosa Galería.

Mans

Sexto encontro coa zanfona contemporánea en Narón

14/03/2010

Este evento zanfoneiro parece que xa está claramente consolidado en Narón. O sexto encontro celebrarase de novo en Aldea Nova entre o 18 e o 21 de marzo. Se vos achegades, tamén teredes a oportunidade de saudar a Paloma García, a nosa querida ex-profesora de Música. Aínda que a continuación facemos un resumo do programa, tedes máis información en www.folque.com

  • Xoves, 18 de marzo, 11 h: Sesión didáctica para escolares.
  • Venres, 19 de marzo, 20:30 h: Concerto: "Zanfona e voz" con Mini e Mero, Projecto ['trepia] e Duo Corps Vibrants.
  • Sábado, 20 de marzo: Curso intensivo con Isabelle Pignol e Palco Aberto ás 22 h.
  • Domingo, 21 de marzo: Curso intensivo con Isabelle Pignol.

Quinto encontro coa zanfona contemporánea en Narón

Zanfona contemporánea 2009

Paloma García, 12/03/2009

O Encontro coa Zanfona Contemporánea cumpre un lustro. Logo de catro edicións xa se consolida como referente deste instrumento milenario. Anos anteriores achegáronse a Narón algúns dos mellores tocadores de Europa: Valentin Clastrier, Gilles Chabenat, Marc Egea, ou os galegos Anxo Lois Pintos e Óscar Fernández.

Nesta edición, que se celebrará entre o 13 e o 15 de marzo  alternando entre Sedes e o auditorio municipal, miramos de novo ao lugar que máis zanfoneiros concentra, ao máis vangardista e con máis viva tradición: o centro  de Francia. O mestre convidado é un deses novos valores: Grégory Jolivet.

Xarnege, quinteto transfronteirizo de Euskadi e Gascuña, compartirán palco na noite do venres ás 20:30 h.

Como novidade, presentaremos o Encontro na Feira do Trece na parroquia de Sedes. O dúo Sobre Rodas (Luís Correa “O Caruncho” e Carlos do Viso) será o responsable de que a zanfona volva a escoitarse na feira, na romaría.

Ademais…

Para escolares:

  • Concerto didáctico do dúo Sobre Rodas.
  • Panel de experiencias do obradoiro musical do Centro de Artesanía e Deseño de Lugo por Luciano Pérez, herdeiros do pioneiro obradoiro que fundou Faustino Santalices, quen recuperou este instrumento en Galicia no século XX.

Para todas e todos:

  • Concerto Grégory Jolivet + Xarnege, no Auditorio, venres ás 20:30 h.
  • Relatorio do investigador da Asociación Ibérica de la Zanfona, Xulio García Bilbao, Aldea Nova, sábado ás 19:00 h.
  • Palco aberto en Aldea Nova, sábado ás 21:00 h.

Enderezos electrónicos

  • Equipo directivo: cpi.feal@edu.xunta.es
  • ANPA: o.buxato.anpa.o.feal@gmail.com
  • Coordinación da web: web.feal@gmail.com
Distribuir contido