Skip to Content

Animación á lectura

Lecturas en Nadal

Como é habitual nestas datas, dende a biblioteca elaboramos unha guía de lecturas de Nadal con suxestións e  ideas  para os Reis Magos  e que así, entre os agasallos que deixarán dentro de poucos días aos nosos nenos e nenas, non falte un bo libro.

Obradoiro de Banda Deseñada con Abraham Carreiro

Dentro da programación de actividades en torno á Banda Deseñada, realizamos un obradoiro de Cómic. O ilustrador Abraham Carreiro foi o condutor desta experiencia.

Ao alumnado do primeiro e terceiro ciclo de primaria, Abraham deulles unhas nocións básicas sobre as características deste xénero narrativo: tipos viñetas e bocadiños, sobre como conseguir plasmar expresións nas personaxes, onomatopeias... Despois os nenos e nenas realizaron as súas propias creacións.

Cos rapaces do segundo ciclo Abraham realizou unha pequena animación. Os nenos tiveron que dar movemento a unha personaxe realizando  debuxos progresivos que eran fotografados e volcados nun programa informático. Tamén foron eles os que lle puxeron as voces e sons. O resultado foi moi simpático, a pesar do pouco tempo que tiveron para realizalo. Ver animación

 

Para rematar con estas actividades en torno á Banda deseñada, acabamos de convocar un concurso no que poden participar todos os nenos e nenas de primaria. As bases na seguinte ligazón.

Animádevos a participar! Tedes ata o 19 de decembro para a entrega dos vosos traballos.

Con Tintín ao cine

Seguimos coas actividades en torno ao Cómic que estamos a desenvolver este trimestre no cole.

Esta semana adicamos os recreos do comedor a un ciclo de cine sobre  Banda Deseñada. As personaxes saén das publicacións  e cobran vida nas películas que presentamos. Comezamos con Mortadelo e Filemón, Asterix e Obelix e pasando por superheroes como Batman e Spiderman, remataremos cunha proxección de Tintín.

No noso cole o cine ten moito "tirón"!

VISITA DE PEDRO REY, COLECCIONISTA DA OBRA DE TINTÍN

Neste trimestre estamos traballando o cómic e tivemos a sorte de contar coa visita do maior coleccionista da obra de Tintín, Pedro Rey.

Contounos anécdotas e vivencias que xiran arredor desta aficción, ademáis de recomendarnos que vaiamos a ver a exposición sobre Tintín que está no Pazo de Fonseca, en Santiago.

Informounos que foi o primeiro en crear un blog sobre este personaxe e que, na actualidade, é unha referencia para todos os seguidores das aventuras de Tintín.

Finalmente, chegou o turno das preguntas, respondendo a todas aquelas curiosidades que espertou nos cativos.

Moitas grazas, Pedro, por transmitirlle ao noso alumnado a túa paixón polo mundo do cómic.

Ligazón á entrada no blog de Pedro

O club de Lectura

Comeza a andar o club de lectura deste curso. Os alumnos participantes son do terceiro ciclo, nenos e nenas aficionados á lectura e que queren compartir o lido cos seus compañeiros. A profe que coordina o club é María Montes.

O primeiro libro escollido foi "Os vellos non deben namorarse" de Castelao. Despois da lectura compartiron o que esta obra de teatro lles transmitiu e tamén recibiron a visita de Noemí Pazó, nai de alumnos do centro e profe de Literatura, que lles falou de Castelao e da gran importancia deste escritor dentro da literatura galega.

Un conto de medo polo Samaín

O alumnado de Educación Infantil acudiu o 30 de outubro á Biblioteca ao visionado dun conto de medo: A Bruxa Regañadentes de OQO Editora.

 

Posteriormente, a profe Susana abriu a MALETA DOS LIBROS e contou o conto de: A FIGUEIRA DE PELOSTORTOS.

 

Foi terroríficamente divertido!!!

Cine de Medo no Samaín

Como xa ven sendo tradición no colexio, a semana do Samaín celebramos un ciclo de películas de medo. Proxectaranse no recreo do comedor dúas arrepiantes historias: Frankenweenie de Tim Burton e El alucinante mundo de Norman.

O libro da semana

Cada semana os nenos e nenas de Infantil e primeiro ciclo de Primaria van á biblioteca con moita ilusión para descubrir cal é o libro que lles agarda na "maleta dos libros". Unha narración moi especial que espertara a súa imaxinación e lles trasladara a mundos fantásticos.

O conto desta semana foi "O Grufalo" , a historia dun ratiño moi listo,  escrita por Julia Donaldson (vídeo do conto).

Lecturas para o verán

Dende a biblioteca recomendamos lecturas para o verán relacionadas co Proxecto de investigación que realizaremos o próximo curso no centro en torno ao tema de "Outros países, outras culturas".

Aproveitade as vacacións para disfrutar coa lectura e viaxar dende as páxinas dun libro!

Descargar a guía

Falando de Roberto Vidal Bolaño na radio

Alumnos e alumnas de cuarto e de sexto do noso centro serán os protagonistas dun programa de radio que se emitirá o día das Letras Galegas, 17 de maio, sobre a figura de Roberto Vidal Bolaño.

Os alumnos de cuarto participaron na creación dun vídeo no que se fai un percorrido pola vida e obra deste gran dramaturgo e que podedes ver dende a seguinte ligazón (ver vídeo). No programa radiofónico presentan o traballo biográfico que fixeron para a realización deste biodocumental. 

As nenas de sexto representaron un dos diálogos da obra "O Touporroutou da Lúa e do Sol" que, xunto cos seus compañeiros de clase, dramatizaron no colexio.

O programa emitirase o día 17 de maio, de 12:30 a 13:30h. na Cope (no 97.1 de FM).

(escoitar programa)


Distribuir contido


by Dr. Radut