Curso 2014-15

FESTA VOZ NATURA 2015

O sábado, 6 de outubro, acudimos ao parque ACEA de AMA en Culleredo (A Coruña) para participar na gran festa de fin de curso do programa VOZ NATURA. Como era a primeira vez que íamos á citada festa, estabamos un pouco nervosos, pero dispostos a participar na maioría das actividades e visitar a exposición dos traballos realizados por todos os centros participantes.   

A chegada ao parque: pais/nais, nenos/as, irmás/irmáns, profes... preparados para pasar un día xenial!!!

 

 Participando nas diversas actividades e repoñendo forzas para continuar...

Visitamos a exposición dos traballos realizados polos distintos centros participantes... pareceunos fantástico o traballo realizado por todos eles. 

Alí tamén estaba a nosa exposición cun resumo en carteis e murais do traballo feito:

 

E por fin chegou o momento máis esperado, a entrega do premio concedido ao noso centro: mellor blog da comunidade VOZ NATURA do curso 2014-15.

 

Grazas a VOZ NATURA polo premio concedido e parabéns tamén aos demais premiados e en xeral, a todos os participantes do programa polo gran labor que realizan cada ano!!!. 

TREN TERMAL

Unha das actividade complementarias  do Programa SI! é a viaxe no tren turístico que percorre a ruta das termas, dende a Praza Maior de Ourense ata as pozas de Outariz, pasando pola zona termal da Chavasqueira, Muíño da Veiga... O luns 18 de maio realizaron esta viaxe  os pequenos/as de 4º de Educación Infantil e o martes 19,  os de 5º e 6º, tamén de infantil. O principal obxectivo desta actividade é o de concienciar aos nenos/as no respecto e coidado da natureza, ademais do goce que supón para eles o disfrutar dunha xornada ao aire libre nun entorno natural.

 

 (Máis información no blog do horto escolar. Premede nas imaxes para acceder a el)

ESTAMOS DE NORABOA

 

ESTAMOS DE NORABOA!!! O noso colexio acaba de recibir o premio  ao MELLOR BLOG DE VOZ NATURA DO CURSO 2014/ 2015.

"DO HORTO AO PRATO. O XARDÍN DOS SENTIDOS" é o título do noso blog onde se reflicten todas as actividades do horto escolar e do proxecto VOZ NATURA, ao que nos unimos por primeira vez este curso. Damos as grazas ao xurado e ao equipo de VOZ NATURA polo premio concedido e tamén felicitamos aos blogs finalistas e en xeral, a todos os blogs da gran comunidade que forma o programa VOZ NATURA.

 

 

(Fai clic na imaxe para acceder á nova na edición dixital de La Voz de Galicia)

TRABALLANDO NO HORTO

Esta semana na nosa sección habitual do horto escolar facemos unha chamada ás familias dos nenos/as de Educación Infantil para que se anoten e participen connosco na festa de Voz Natura que se vai celebrar o vindeiro 6 de xuño no parque Acea de Ama (Culleredo-A Coruña). A viaxe realizarase en autobús que correrá a cargo do colexio, o acceso ás instalacións é gratuíto, así coma todas as actividades que alí se ofertan: inchables, talleres, xogos, competicións deportivas, exhibicións, actuacións...  Haberá postos de comida en todo o parque. 

ANIMÁDEVOS E PARTICIPADE CONNOSCO NA FESTA DE 

Se premedes no seguinte enlace podedes ver no blog do horto escolar as actividades realizadas o pasado venres, entre elas a colocación das "casiñas" ...

DO HORTO AO PRATO. O XARDÍN DOS SENTIDOS

TRABALLANDO NO HORTO

Xa está aquí a nosa noticia semanal sobre o horto escolar, que agora, coa chegada do bo tempo, está en plena actividade.

1-O venres, 17 de abril, os pequenos/as de 5º de infantil sementaron chícharos:

 

2- E os cativos/as de 4º e 5º de infantil, plantaron unhas bonitas petunias para "seguir poñendo guapa a nosa escola"

(Preme nas imaxes para ver as fichas a maior tamaño)

E mirade como van medrando as nosas colleitas:

 

XADREZ, APRENDER A APRENDER

Este pasado domingo, 12 de abril, o xornal LA VOZ DE GALICIA, publicou unha reportaxe sobre o proxecto XADREZ, APRENDER A APRENDER, proxecto piloto promovido polo Concello de Ourense, que coordina o xadrecista Joaquín Bello (vinculado á Escola de Xadrez do Liceo), e que ten lugar  nun limitado número de colexios  da nosa cidade, sendo o noso un deles. Na primeira parte da reportaxe analízanse os obxectivos do plan, como se está desenvolvendo a experiencia, a que nenos/as vai dirixido, os posibles resultados a longo prazo... Nunha segunda parte, reprodúcese unha pequena entrevista con Joaquín Bello e remata cunha pequena reseña sobre o material utilizado.

(Se premedes na imaxe podedes ler esta interesante reportaxe)

Aquí tedes unhas fotos tomadas este luns, 13 de abril, dos pequenos/as na clase de xadrez:

TRABALLANDO NO HORTO

Grazas ao bo tempo que estamos tendo, a actividade no noso horto escolar vai cada día en aumento. Nesta pasada semana foron varias as actividades que realizamos:

1- O mércores, 8 de abril, os alumnos/as de 3º de primaria estiveron dándolle unhas voltas á zona das tuias (mirtos), plantadas no mes de novembro. Arrincaron as malas herbas, regaron e limparon en xeral o seu contorno.

2- O venres, os cativos/as de 4º de infantil estiveron sementando lirios e dalias para seguir "poñendo guapa a nosa escola"

3- Os pequenos/as de 5º e 6º de infantil  plantaron leitugas e tomates

 (Premede na imaxe para acceder á ficha completa)

Ah!! Tamén puxeron unhas estupendas "guías" para os tomates:

TRABALLANDO NO HORTO: SEMENTANDO XUDÍAS E ALGO MÁIS...

O último venres antes das vacacións de Semana Santa os alumnos/as de 5º e 6º de educación infantil e os de 3º B de educación primaria estiveron no horto realizando dúas tarefas:

1º- Primeiro observaron as nosas plantacións e á vista de certos perigos... colocaron algunhas trampas moi ecolóxicas.

(Preme na imaxe para visualizala a maior tamaño)

2º- Estiveron sementando xudías, logo na clase repasaron as súas propiedades e beneficios e,  os pequenos/as de infantil estiveron facendo uns bonitos traballos... adiviñades con que...?

(Preme na imaxe para visualizala a maior tamaño)

SEMANA DA ÁRBORE E DA AUGA

O día 21 de marzo celebrouse o DÍA INTERNACIONAL DOS BOSQUES e o 22 de marzo o DÍA MUNDIAL DA AUGA, dúas datas que no noso cole recordamos dun xeito especial pois un dos obxectivos que pretendemos é o de concienciar aos nosos alumnos/as no coidado e respecto do medio ambiente. 

Este curso sumámonos á iniciativa promovida pola Deputación Provincial de Ourense denominada:

 

Semana Escolar da Árbore e a Auga

No centro recibimos unha serie de materiais didácticos para traballar a importancia dos bosques e da auga. A partir dun libro (cunha historia de ficción, onde se relacionan os ciclos da auga e das árbores, facendo fincapé na mitoloxía, na riqueza forestal e nas augas termais da nosa provincia), os nenos/as realizarán diferentes actividades ao longo desta semana.

 

Tamén recibimos catro exemplares de acivro para plantar no recinto escolar. Este martes, 24 de marzo, fixemos a plantación. Cada acivro foi apadriñado por un curso ou grupo de alumnos/as os cales lle puxeron un nome. Despois de plantalo e de regalo por primeira vez, colocaron ao lado de cada árbore un cartel co seu nome. Agora cada grupo será o encargado do seu coidado.

                                                

                                

                                                              

 

 

 

 

 

 

 

 

 

 

TRABALLANDO NO HORTO: SEMENTANDO PATACAS

Este venres, 13 de marzo, os pequenos/as de Educación Infantil estiveron moi ocupados pola mañá: uns estiveron plantando patacas no horto escolar e outros estiveron con Sergio, un avó, que lles contou que cando el era pequeno non tiña xoguetes e ensinoulles como se poden aproveitar elementos da natureza para xogar e facer xoguetes. Coma sempre na clase completaron o traballo realizado no horto e aprenderon moitas cousas sobre as patacas e as súas propiedades. 

(Preme na imaxe para ver a ficha a tamaño completo)

Aquí tedes aos pequenos/as con Sergio aprendendo a facer xoguetes e xogar con elementos da natureza: remolacha, carozos de millo, guizos, belotas...

Powered by Drupal - Design by artinet