Saúde Integral (SI)

HÁBITOS SAUDABLES: COIDAMOS O NOSO CORAZÓN

O 22 de xaneiro unha nova sobre o centro volveu a aparecer no xornal LA REGIÓN, concretamente na súa sección XORNAL ESCOLAR. Un equipo da canle de televisión local TELEMIÑO achegouse ao colexio para observar as actividades que realizan os máis pequenos dentro do programa SI (SAÚDE iNTEGRAL) que, como xa sabedes, levamos a cabo dende a súa posta en marcha polo Concello de Ourense en colaboración coa fundación SHE do doctor Valentín Fuster.

Cada semana os nenos e nenas realizan actividades sobre hábitos saudables, centrados sobre todo no coidado da saúde cardiovascular, e que se basa en tres principios: alimentación saudable, exercico físico e control das emocións.  

Os nenos e nenas pasárono estupendamente mentres os filmaban realizando as actividades, tamén respostaron ás preguntas que lles fixeron e cos seus comentarios explicaron como debemos coidar o noso corazón. 

 

Moitas das actividades que realizan os máis pequenos fanse en colaboración coas súas familias. Aproveitamos para dar as grazas a todas as familias que colaboran e se implican nesta e noutras tarefas, a colaboración entre casa e colexio xa saben que é fundamental.  

Nuns recunchos do colexio temos a exposición sobre almorzos e merendas saudables que realizaron os pequenos nas súas casas. Na seguinte presentación podedes velas e tamén momentos da gravación do programa XORNAL ESCOLAR. 

Tamén podedes ver o vídeo do programa que se emitiu na canle de televisión local TELEMIÑO:

 

OBRADOIRO: DA ALIMENTACIÓN Á NUTRICIÓN

Como informamos nunha anterior entrada, dentro das actividades promovidas polo PROGRAMA SI!! (SAÚDE INTEGRAL), terían lugar uns obradoiros sobre alimentación dirixidos á profesores e pais/nais. 

Celebrado xa o obradoiro realizado polo profesorado, agora queremos invitarvos á celebración do obradoiro dirixido a vós, pais e nais, e que axudará á mellor comprensión da saúde e dos motivos polos cales temos que coidar dela.

 

OBRADOIRO: DA ALIMENTACIÓN Á NUTRICIÓN 

MARTES, 19 DE NOVEMBRO ás 18:30 no centro 

ESPERAMOS CONTAR COA VOSA PARTICIPACIÓN!!! 

PROGRAMA SI - CURSO 2019-20

Igual que xa comezamos co programa de VOZ NATURA, xa comezamos tamén a traballar co PROGRAMA SI, SAÚDE INTEGRAL, que recordamos:  "é un programa de intervención escolar dirixido a nenos e nenas de 3 a 16 anos cun claro obxectivo: demostrar que a adquisición de hábitos saudables dende a infancia reduce os riscos das enfermidades cardiovasculares e mellora a calidade de vida na idade adulta".

E tamén coma en anos anteriores comezamos coa carta que o Doctor Fuster vos envía ás familias para animarvos a colaborar co programa:

Unha das novidades deste curso é a realización duns obradoiros de formación, para profesores e tamén para pais e nais. 

O pasado 1 de outubro xa tivo lugar no centro o taller dirixido ao profesorado: "AUTOXESTIÓN EN SAÚDE: DA ALIMENTACIÓN Á NUTRICIÓN". Impartido pola doctora Estefanía Zardoya Cabo, médica especialista en medicina de familia e comunitaria e coach polo ICC., combinando teoría con práctica e auto-reflexión. Estes foron algúns dos obxectivos propostos:

- Tomar consciencia do proceso da nutrición. Pasar de vivir para comer a comer para vivir.

- Reflexionar sobre os coñecementos sobre nutrición: proporcionar puntos claves con evidencia científica.

- Información actualizada sobre conceptos básicos en nutrición.

- Axudar a integrar os coñecementos na nosa vida cotiá. 

  (Nota sobre o obradoiro no xornal La Región o 2-10-2019)

 

Agora queda pendente de realizar o obradoiro dirixido aos pais e nais. En canto coñezamos a data de celebración seredes avisados. Contamos convosco, a vosa participación é fundamental para que continuedes nas casas cos hábitos saudables que dende a escola queremos inculcar aos nenos e ás nenas. 

Lembrade entrar tamén na páxina web do programa: https://www.programasi.org/. Alí atoparedes materiais e recursos que vos axudarán a fomentar un estilo de vida saudable. 

 As claves de acceso para as familias:

 Usuario: FAM32008458

 Contrasinal:   FAM32008458NS

 

·        

VISITA DE CARDIO

O pasado 1 de abril recibimos no colexio a visita de CARDIO, a mascota do programa SI! (Saúde Integral), programa, que como xa sabedes, levamos a cabo dende fai sete anos. Cardio quixo pasar unha xornada divertida cos pequenos e pequenas de infantil cos que cantou e bailou, fíxose un montón de fotos e deulles un montón de abrazos. Logo obsequiounos cunhas lambetadas saudables. Que ben o pasaron todos!!

Recordade que o PROGRAMA SI! é un programa de intervención escolar dirixido a nenos e nenas dende 3 ata 16 anos con un claro obxectivo: demostrar que a adquisición de hábitos saudables dende a infancia reduce os riscos das enfermidades cardiovasculares e mellora a calidade de vida na idade adulta. Son catro os pilares básicos sobre os que se asenta este programa, promovido polo doctor Fuster mediante a Fundación SHE:

  • Hábitos saudables de alimentación.
  • Fomento da actividade física.
  • Coñecemento do corpo humano.
  • Xestión das emocións. 

 Deixámosvos os enlaces as guías do programa de educación infantil e de educación primaria:

- GUÍA EDUCACIÓN INFANTIL

- GUÍA EDUCACIÓN PRIMARIA 

 

CURSO 2018-19

Un ano máis continuamos desenvolvendo o PROGRAMA SI (SAÚDE INTEGRAL) promovido polo doctor Valentín Fuster a través da Fundación SHE.

Este ano xa están implicados todos os cursos, tanto de Educación Infantil, como de Educación Primaria (recordamos que empezamos no curso 2012-2013 cos pequenos e pequenas de 6º de Educación Infantil que agora xa están en 6º de Educación Primaria!!). Un amplo percorrido onde fomos aprendendo, tanto na escola coma nas casas (mediante os boletíns, retos e actividades que íamos enviando), que a saúde é cousa de todos e que un estilo de vida saudable, dende os primeiros anos da nosa vida, favorecerá a prevención de enfermidades cardio-vasculares e mellorará a nosa saúde en xeral. 

Para comezar esta nova andaina, hoxe deixámosvos a Guía Si, onde teredes toda a información sobre o programa para axudarvos a entender mellor o seu sentido e a súa filosofía.

 

PROGRAMA SI! CURSO 2016-17

Un ano máis seguimos avanzando co programa SI! (Saúde Integral), agora os cursos implicados no mesmo xa son: 4º, 5º e 6º de Educación Infantil e 1º, 2º, 3º e 4º de Educación Primaria. Reproducimos a continuación unha carta da Fundación SHE (que se encarga da organización e difusión do mesmo) animando a todas as familias a participar activamente. Tamén se indican as claves de acceso á páxina web do programa www.programasi.org , donde podedes acceder a materiales e consellos sobre un estilo de vida saudable. (Despois de acceder á páxina web tedes que premer no apartado que indica "INTRANET"  e alí introducir o nome de usuario e clave que se indican a continuación):

 

Tamén vos deixamos un enlace ao último informe sobre a mellora da saúde cardiovascular mediante o fomento de hábitos saudables dende a infancia:

 

MATERIAIS 2016- 2017

 

Para que os teñades sempre a man, nos seguintes enlaces podedes consultar os distintos documentos e fichas que se van entregando ao longo do curso ás familias:

- 1ª actividade familias alumnos/as de 3 anos

- 1ª actividade familias alumnos/as de 4 anos

- 1ª actividade familias alumnos/as de 5 anos 

VISITA DE CARDIO, MAIO 2016

Un ano máis chegou a esperada visita de CARDIO ao noso cole. Como xa sabedes, CARDIO é a mascota do programa SI! (Saúde Integral) promovido pola fundación SHE do doctor Fuster e que dende o curso 2012-13 se leva a cabo no centro. 

Os nenos e nenas de infantil e 1º de primaria estaban ansiosos por recibir a CARDIO, abrazalo e bailar con el. Para preparar a súa visita, realizaron previamente, debuxos sobre CARDIO que colocamos nun gran panel no patio de entrada do colexio, para darlle a benvida nada máis chegar ao centro. Despois de saudar a CARDIO e bailar con el, este obsequiounos con "chuches" de zume de froitas...boísimas!!. 

Non vos perdades as imaxes desta xornada tan especial para os pequenos e pequenas.

Tamén, como xa sabedes, esta visita é o comezo da celebración da semana da saúde con CARDIO, da que xa vos iremos informando en seguintes novas. 

TREN TERMAL

Unha das actividade complementarias  do Programa SI! é a viaxe no tren turístico que percorre a ruta das termas, dende a Praza Maior de Ourense ata as pozas de Outariz, pasando pola zona termal da Chavasqueira, Muíño da Veiga... O luns 18 de maio realizaron esta viaxe  os pequenos/as de 4º de Educación Infantil e o martes 19,  os de 5º e 6º, tamén de infantil. O principal obxectivo desta actividade é o de concienciar aos nenos/as no respecto e coidado da natureza, ademais do goce que supón para eles o disfrutar dunha xornada ao aire libre nun entorno natural.

 

 (Máis información no blog do horto escolar. Premede nas imaxes para acceder a el)

PROGRAMA SI: VISITA DE CARDIO E COCIÑA SAUDABLE

O pasado mércores, 11 de marzo, realizamos dúas actividades enmarcadas dentro do programa SI!, unha dirixida aos nenos/as e outra ás familias.

1º- O mércores pola mañá recibimos unha visita moi especial: o noso amigo CARDIO (mascota do programa SI!), un ano máis, veu a saudarnos e a pasar un rato cantando e bailando cos alumnos/as de 4, 5º e 6º de Educación Infantil e cos de 1º e 2º de Educación Primaria, que son os participan neste programa de saúde promovido polo Concello de Ourense e a Fundación SHE. Tamén  felicitou aos cativos/as por ser uns nenos/as tan "saudables" e agasallounos cunhas gominolas tamén moi saudables feitas con zume de froita natural, sen glute nin colorantes e libres de graxas, que boas estaban!!. 

Como podedes ver na seguinte presentación os cativos/as pasárono fenomenal!!! A maioría deles cantaron e bailaron con CARDIO e todos querían abrazalo e facerse fotos con el. Os pequenos de infantil para recibilo puxeron os seus disfraces de entroido que este ano adicaron a "Os amigos de Cardio" (mazás, uvas, cenorias, tomates, uvas, peras ..., froitas e verduras saudables para o noso "cardio").

 

2º- Xa pola tarde as familias do alumnado de 4º de Educación Infantil, que son os que se incorporan por primeira vez ao programa, tiveron unha charla sobre alimentación e saúde, seguida dunha merenda saudable. 

Mentres os nenos/as eran atendidos no salón de actos por un animador, os papás/mamás e outros familiares dos cativos/as asistiron á charla  "COÑECER PARA MELLORAR" impartida por Dona Julia de la Montaña, experta en nutrición. Primeiro comezou cuns videos explicativos sobre o Programa SI!; nun deles o Doctor Fuster, impulsor do programa, fai unha pequena reflexión sobre o motivo da creación deste programa dirixido aos escolares e as súas familias. A continuación a nutricionista explicoulles cales eran as causas da obesidade infantil e das enfermidades cardiovasculares da sociedade actual, para logo darlles algunhas pautas para previr a obesidad e este tipo de enfermidades.

A charla foi completada por persoal dun grupo alimentario que explicou a elaboración de dúas receitas saudables e deu algúns consellos de cociña sobre como presentar dunha forma máis atractiva os alimentos.

Finalmente chegou o momento da merenda que nenos/as e as súas familias degustaron xuntos nun día cheo de emocións para os pequenos/as. 

(Premede nas imaxes para acceder á galería de fotos)

Mirade que guapos saímos no xornal con Cardio:

 

Powered by Drupal - Design by artinet