Os alumnos/as de 5º e 6º de primaria acudiron o 14 de xaneiro ao recinto de Expourense para participar na actividade organizada polo Concello de Ourense e denominada "Parque Infantil de Tráfico". Esta actividade ten como finalidade proporcionar formación viaria e fomentar nos nenos/as hábitos seguros e actitudes de tolerancia, respecto e solidariedade fronte ás diversas situacións de tráfico que se lles presentan na súa vida diaria. 

A actividade estivo dividida en dúas sesións :

1º- Clases teóricas na aula de educación viaria.

2º- Prácticas de condución con bicicleta e karts eléctricos nun circuito deseñado para tal fin. 

Preme nas seguintes imaxes para acceder á páxina do Concello onde se explican as principais características da actividade e para acceder ao blog dos alumnos/as de 6º A onde nos contan como a viviron...

 E facendo clic nas seguintes accedes á galería para ver as fotos da saída.

ASÍ CELEBRAMOS O NADAL NO COLE: 

PREME EN CADA UNHA DAS IMAXES PARA ACCEDER A TODA A INFORMACIÓN, FOTOS, PRESENTACIÓNS, VÍDEOS...

(Fai clic na imaxe para ver o programa de actuacións)

Este venres, 12 de decembro, os pequenos de educación infantil estiveron sementando allos. Primeiro houbo que preparar a terra, polo que os pequenos/as estiveron carrexando herba que metían nos regos nos que se ían sementar os allos. Logo pisaron a herba dentro das zanxas e cubríronas de terra, para finalmente botar os allos. Aquí tedes algunhas fotos do traballo realizado e a ficha informativa de todo o que aprenderon sobre esta planta tan saudable e boa amiga de Cardio .  

(Preme na imaxe para ver a ficha a tamaño completo)

Esta semana, ademais do traballo no horto, continuamos coa actividade "Escola ponte guapa", enmarcada dentro do proxecto Voz Natura. Nenos/as de infantil, 3º curso, 5º e 6º estiveron plantando árbores en distintas zonas do colexio: unha mazaira, unha pereira, unha cerdeira, un ciruelo e un castiñeiro. Ademais rematamos de plantar os mirtos (tuias) na zona posterior do patio cuberto pequeno. 

Este domingo, 14 de decembro, a ANPA do noso centro celebra unha nova edición do seu mercado solidario no patio do colexio. O horario do mesmo será dende as 11:00 h ata as 18:00 h. Coma noutras edicións haberá venda de produtos de diverso tipo: bisutería, obxectos de decoración, alimentos de elaboración caseira, produtos artesanais, obxectos de segunda man... . Haberá "hinchables" para que se divirtan os máis pequenos e xantar con menús especiais a prezos asequibles. Os beneficios da venda de comidas e bebidas irán destinados á organización da excursión de final de curso dos alumnos/as de 6º de primaria que colaboran con esta venda.  

TAMÉN SE RECOLLERÁN XOGUETES, ROUPA E ALIMENTOS DESTINADOS AO  BANCO SOLIDARIO QUE MANTÉN A ANPA EN COLABORACIÓN CO CENTRO.

ACHÉGASE O NADAL, ÉPOCA ESPECIAL PARA PENSAR NOS DEMAIS E SER UN POUCO MÁIS SOLIDARIOS. 

ACHÉGATE TI TAMÉN O DOMINGO 14 DE DECEMBRO ATA O CEIP PLURILINGÜE PROFESOR ALBINO NÚÑEZ E COLABORA COAS NOSAS CAUSAS SOLIDARIAS. 

  BO NADAL A TODOS!!

O pasado venres, 5 de decembro, comezamos co traballo de plantación de árbores e arbustos no patio do colexio. Esta plantación está enmarcada dentro do noso proxecto "Escola ponte guapa" e  "O xardín dos sentidos". Como xa tiñamos preparadas as zanxas, traballo feito conxuntamente entre pais, alumnos/as e profesorado o pasado 8 de novembro, o traballo resultou máis fácil e levadeiro. Os alumnos/as de 6º en colaboración cos pequenos/as de 3 e 4 anos realizaron esta plantación axudados por algúns profesores/as. Co obxectivo de motivalos máis para que se implicasen no coidado e mantemento das árbores, os alumnos/as de 6º de primaria apadriñaron a un neno/a de infantil, e a súa vez os dous apadriñaban un dos arbustos prantados, neste caso mirtos. Como podedes ver polas fotos o traballo conxunto resultou moi estimulante, e que ben o pasaron saltando para aplastar a terra!!

O 1 de decembro os alumnos/as de 2º curso de educación primaria realizaron unha visita á AULA DA NATUREZA DO RÍO MIÑO. A través desta aula, a Concellería de Educación do Concello de Ourense tenta fomentar a participación cidadá nos aspectos relacionados co medio ambiente urbano, a través da sensibilización, formación e educación para achegar á poboación en xeral o coñecemento da realidade ambiental e así, ir creando unha maior conciencia ecolóxica capaz de colaborar cos necesarios esforzos que permanentemente hai que realizar para lograr cada día un maior equilibrio medio ambiental. 

A actividade na que participaron os nosos cativos/as día foi a seguinte: "CONCIENCIACIÓN. OS NOSOS AMIGOS, OS CANS E OS GATOS". Con ela trátase de concienciar aos máis pequenos sobre os coidados e responsabilidades que require unha mascota, valorando a importancia que teñen como animais de compañía e como fonte constante de alegría e cariño. Así como inculcar comportamentos para paliar o abandono destes animais. 

A actividade, dirixida por Luis, coordinador desta aula, contou tamén coa colaboración de Erea, voluntaria de PROGAPE que viña acompañada de dous pequenos cadeliños. PROGAPE é unha asociación protectora de animais, cuxo cometido principal é a defensa dos animais, a denuncia ante o maltrato e calquera outra acción encamiñada a conseguir o respecto e o recoñecemento dos dereitos dos animais. Este grupo é ademais o que se encarga de xestionar a "perrera" municipal de Ourense.

Erea faloulle aos cativos sobre os cans e os gatos que se atopan na "perrera" municipal (600 cans e 200 gatos) e sobre as súas condicións. Faloulles da importancia do coidado dos animais e os nenos/as faláronlle das súas mascotas e de como as coidaban. Tamén lles falou dos animais abandonados e de que podían ir coas súas familias non só para adoptar un deles senón tamén para visitalos, darlles un pouco de cariño ou pasealos nunha tarde. Indicoulles  cousas que podían levarlles e que lles eran moi necesarias: xornais vellos, cartóns, botellas de plástico...

Despois de visionar algún video sobre os animais, os nenos/as debuxaron un can ou un gato e fixeron tamén con papel a pequena carauta dunha mascota. Foi unha mañá estupenda, e os nenos/as, ademais de aprender cousas sobre as súas mascotas, pasárono xenial!!

(Preme nas imaxes para acceder á galería fotográfica)

Dende aquí en nome de PROGAPE pedimos a vosa axuda: visitade a perrera municipal coas vosas familias para pasar unha tarde con algún destes animais e non vos esquezades de levarlles eses materiais  que ides tirar ao lixo:  papeis, xornais, envases de plástico...

O luns 1 de decembro tivo lugar no centro unha charla titulada "A enerxía, o medio ambiente e ti". Charla promovida polo Museo do Gas da Fundación Gas Natural Fenosa co obxectivo de dar a coñecer os distintos tipos de enerxía que existen e reflexionar sobre o uso responsable e a súa sustentabilidade.

A esta charla informativa asistiron os alumnos/as de 5º e 6º de educación primaria e foi impartida por un conferenciante/educador que lles explicou o que era a enerxía, as súas clases, a súa procedencia, vantaxes e desvantaxes das enerxías renovables e non renovables, a importancia dun aproveitamento da diversificación enerxética, a enerxía nuclear e os seus perigos... para finalmente falar da necesidade dun desenvolvemento sostible co fin de reducir a pegada ecolóxica negativa cara a futuras xeneracións.

A charla foi seguida con interese e houbo unha participación activa do alumnado sempre que foi solicitada polo conferenciante. Consideramos que este tipo de charlas son moi importantes,  non só polos contidos tratados, senón tamén pola necesidade de concienciar aos alumnos/as sobre o uso racional da enerxía, o consumo e o aforro enerxético. 

Este foi o traballo que os pequenos de educación infantil realizaron no horto dos amigos de Cardio: PLANTARON LEITUGAS. Coma sempre, completaron o traballo realizado no horto con actividades na aula, entre elas, aprender propiedades e beneficios das plantas que sementan no horto, facer fichas sobre ditas plantas e/ou outros alimentos saudables, xogos dos sentidos...

(Facendo clic na imaxe verala a maior tamaño)

Este curso xa realizamos dúas actividades dentro do "Plan Director para a convivencia e a mellora da seguridade nos centros educativos e nos seus contornos”, plan que ofrece aos centros educativos a posibilidade de solicitar charlas informativas/formativas impartidas por expertos das Forzas e Corpos de Seguridade do Estado sobre diferentes temáticas que favorezan a mellora da convivencia e o achegamento destes profesionais aos cidadáns ao mesmo tempo que facilita actuacións moi en consonancia coa Acción Titorial e as propostas do Plan de Convivencia desenvolvidas nos centros.

(Preme na imaxe para ter máis información sobre este programa)

- A  primeira delas, co fin de achegar e coñecer mellor  o labor das Forzas e Corpos de Seguridade do Estado, foi dirixida ao alumnado de Educación Infantil e consistiu na exhibición dun vehículo policial. Esta exhibición realizouse o pasado 30 de outubro no propio centro. Os pequenos do cole, pasárono estupendamente montando no coche, tocando a serea, xogando coas esposas...

- A segunda delas realizouse tamén no centro o pasado 13 de novembro e foi dirixida ao alumnado de 5º e 6º de educación primaria. Consistiu nunha charla sobre o acoso. Membros dos Corpos de Seguridade explicáronlles en que consistía o acoso. Faláronlles sobre o acoso na propia escola e o acoso a través das redes sociais e internet. Tamén lles recordaron que os menores de 14 anos non poden dispor dun perfil nas citadas redes/internet.