Skip to Content

3º Curso

Visita ao supermercado Gadis

Lun, 27/03/2023 - 05:10 — admin

O alumnado do CEIP Plurilingüe Manuel Sueiro realizou tres visitas ao supermercado GADIS no centro comercial Pontevella dentro do programa Alimentes.

A visita estivo estruturada 7 zonas nas que mostraron a noso alumnado as características dos alimentos, o seu empaquetado, a distribución e a súa importancia para unha dieta saudable.

A primeira das zonas consistiu nunha explicación da importancia da roda dos alimentos nos que nos amosaban os cinco apartados máis importantes para unha dieta saudable: vexetais (froitería), froitas (froitería), cereais (panadería), carnes, peixes, legumes, ovos e froitos secos (carnicería, peixería e estantes dos supermercados) e auga.

A segunda das paradas foi na froitería na que nos ensinaron produtos de proximidade con diferentes formas e sabores nos que destacamos as froitas como as laranxas, peras, mazás, pomelos,... e hortalizas.

A terceira das paradas foi a panadería na que observamos os diferentes tipos de pan como o tradicional (pan de Cea) ou o elaborado (pan de molde en bolsa).

A continuación fomos a peixería na que nos amosaron os diferentes peixes sabendo diferenciar o peixe branco do azul e algún peixes que nunca víramos como as raias. O que máis nos sorprenderon foron os polvos.

Despois da peixería foron a charcutería no que descubrimos a grande cantidade de produtos elaborados que non deberían estar na nosa dieta.

A sexta das zona foi a carnicería na que puidemos aprender a diferencia entre carnes vermellas e carnes brancas.

A última das zonas foi a zona das bebidas nas que descubrimos a “Kombucha” ou fungo do te, sendo unha bebida fermentada feita a base de te cuxa fermentación se obtén a través do cultivo de bacterias e lévedos. A bebida máis importante para o noso organismo e a mellor para unha dieta saudable é a auga.
O supermercado GADIS agasallounos cunha mochila cunha mazá e unha botella de auga. 

A visita foi xenial... e como sempre despois dun bo traballo rematamos cunha boa merenda e na zona de xogos.

VISITA DE EDUCACIÓN INFANTIL

VISITA DE 1º, 2º e 3º de Ed. PRIMARIA

VISITA DE 4º, 5º e 6º de Ed. PRIMARIA

 

 

Desde o corazón da mazá

Sáb, 11/03/2023 - 21:17 — admin

Coincidindo coa semana da prensa realizamos o concurso sobre o libro de Xan Farias: “Desde o corazón da mazá”, co cal estivemos a traballar ao longo do mes de febreiro no Club de lectura de terceiro de EP.

O libro é unha colección de textos escritos por un neno ao longo dun verán que lle mandou elaborar o mestre como tarefa. Un delicioso mosaico formado por pequenas teselas que, todas xuntas e cada unha por separado, son exquisitas.

O autor obriga ao lector a montar as historias, a imaxinar moito que non está escrito. É case tan importante o que conta como o que non conta. Farias axuda a facer lectores intelixentes.

Nesta ocasión, o resultado final do concurso estivo moi disutado, resultando gañador o equipo formado por Maia e Carlota.

Moitos parabéns para todos e todas polo traballo desenvolvido!!

 

Despedida do alumnado de prácticas 202/2023

Lun, 27/02/2023 - 07:02 — admin

Un ano máis, o Xoves de Comadres tocou despedir ao profesorado de prácticas que nos acompañaron desde comezo de curso no noso traballo escolar.

Foron moitas as bágoas que se derramaron no acto de despedida de Tamara, Pablo, Ana, Noelia e Clara que tivo lugar na sala de usos múltiples, tras entregarlle un exemplar do libro “Maestra de Pueblo…”, motivo polo cal se teñen que sentir moi satisfeitas xa que é o mellor indicativo de que deixan pegada no CEIP plurilingüe Manuel Sueiro.

Toda a comunidade educativa agradécelles o seu bo facer e a súa excelente disposición ao traballo cos nenos e nenas, e felicitámolas por todo o traballo desenvolvido neste período de tempo.

Esperamos e desexamos que todo lles vaia ben e que nun futuro próximo volvan ao centro como novas compañeiras do noso claustro.

Desfile de Entroido 2023

Lun, 20/02/2023 - 13:43 — admin

 O venres, 17 de febreiro, participamos no desfile de Entroido que organizamos polas rúas do centro de Ourense, xunto aos colexios do Mestre Vide e Curros Enríquez e contando coa colaboración do Concello de Ourense.

Cada colexio ía de unha temática diferente. A do noso estaba relacionada co PDI que estamos a desenvolver este curso: “Coidemos o noso mar”.

O alumnado de 1º, 2º e 6º de EP disfrazáronse de estreliñas de mar, os nenos e nenas de 3º, 4º e 5º de EP ían de buzos e o alumnado de Infantil engalanouse con escamas de peixes de cores para crear tres bancos de peixes diferentes.

O desfile foi todo un éxito debido a gran participación das familias ao longo de todo percorrido.

Xoves de comadres 2023

Xov, 16/02/2023 - 19:46 — admin

O xoves, 16 de febreiro, o alumnado de 1º, 2º, 3º e 4º de Ed. Primaria participou na celebración do xoves de comadres que organizou a Concellería de Educación. Nas semanas previas, realizamos un obradoiro de elaboración de comadres e compadres que se desenvolveu na biblioteca do centro.

Foi unha mañá moi especial xa que a maioría dos asistentes do noso centro era a 1ª vez que participaban nesta festa que abre a semana máxica do Entroido en Ourense.

Pasámolo xenial, xa que moitos de nós conseguimos salvar a comadre... todas acabaron escachizadas nas no solo da Praza Maior de Ourense.

Para o próximo ano volveremos!!!

Xogando ao atletismo

Ven, 10/02/2023 - 19:10 — admin

O 9 de febreiro participamos na xornada de Xogando ao atletismo da categoría benxamín que tivo lugar na pista de atletismo de Expourense. O alumnado de 4º de Ed, Primaria tamén participou como equipo invitado debido á súa boa traxectoria nestas xornadas de atletismo organizadas pola Secretaría xeral para o deporte.

Como en anteriores ocasións, disfrutamos dunha xornada de deporte da que destacamos fundamentalmente a convivecia e o espírito deportivo mostrado cos nenos e nenas da nosa cidade.

 

Coidando o noso mar

Sáb, 04/02/2023 - 19:19 — admin

Por uns días o CEIP Plurilingüe Manuel Sueiro achegouse ao mar da man da Biblioteca Escolar do centro, guiados pola exposición itinerante “Coidando o noso mar”, prestada polo CEIDA (Centro de Extensión Universitaria e Divulgación Ambiental de Galicia).

Desde as Rías Baixas chegaron as redes e as nasas que os/as nosos mariñeiros/as usan a cotío no seu labor.

Esta exposición enmárcase no PDI do centro, adicado aos ODS axenda 2030. En concreto, o obxectivo 14:  Conservar e utilizar de xeito sostible os océanos, mares e os recursos mariños.

Protexer os nosos océanos debe ser unha prioridade. A biodiversidade mariña é vital para a saúde das persoas e do planeta. As áreas mariñas protexidas deben ser xestionadas de forma efectiva, tamén os seus recursos, e poñer en marcha regulamentos que reduzan a sobrepesca e a contaminación mariña dos océanos.

MERGÚLLATE NO MAR MÁIS AZUL!

Obradoiro de compadres e comadres

Sáb, 04/02/2023 - 18:55 — admin

O xoves 2 de febreiro de 2023, o alumnado de 1º, 2º, 3º e 4º de Educación Primaria do CEIP Plurilingüe Manuel Sueiro participou no obradoiro “Compadres e comadres” que se realizou na nosa biblioteca escolar coa colaboración do Concello de Ourense.

Con esta actividade damos comezo á celebración do Entroido no noso cole, que terá o seu colofón na semana do 13 ao 17 de febreiro.

O xoves de compadres, 9 de febreiro, e o xoves de comadres, 16 de febreiro, acudiremos á Praza Maior de Ourense para correr cos nosos compadres e as nosas comadres...

Benvido sexa o Entroido 2023!!

PEACE THROUGH ART AND CHOCOLATE!

Mér, 01/02/2023 - 04:07 — admin

Para conmemorar o día da paz e non violencia, os compañeiros/as de 6º E. Primaria decidiron facer de Jackson Pollock. Non pintaron un cadro abstracto, senón que coa técnica do “dripping”, deseñaron unha pomba da paz.

E por que usar pinturas tendo chocolate? Nunca unhas pombas da paz resultaron tan saborosas. Cada un deles/as fixo a súa, e compartimos algunhas máis cos demais compañeiros/as da escola.

Desfrutade das nosas pombas da paz e coñecede un pouco máis a Pollock, tamén nomeado como Jack the Dripper, que non “the Ripper”.

Construíndo un horto escolar

Lun, 30/01/2023 - 07:58 — admin

No curso 2020/21 o alumnado de 2º de Educación Primaria colaborou co CIFP Portovello para crear e traballar un horto escolar. Á final de curso fumos quen de recoller a nosa primeira colleita de tomates, cenorias, cebolas, leitugas e algúns amorodos.

No curso 2021/22 decidimos seguir colaborando co CIPF Portovello no coidado da horta sita no seu colexio, pero no ano 2023 decidimos construír a nosa propia horta escolar.

Aquí deixamos como deseñamos e construímos a nosa horta con 4 bancais para que todo o alumnado do CEIP Plurilingüe Manuel Sueiro poida cultivar diversos produtos dentro dunha economía sostible.

Os pasos que demos foron os seguintes.

  1. Buscamos o lugar máis soleado e máis resgardado para que o cultivo sexa o máis produtivo posible.
  2. Pensamos e deseñamos o tamaño e cantidade de bancais. Neste caso 4 bancais: 1 para o alumnado de Educación Infantil, 1 para o alumando de 1º e 2º de Educación Primaria, 1 para o alumando de 3º e 4º de Educación Primaria e 1 para o alumando de 5º e 6º de Educación Primaria. O tamaño é de 1 metro de ancho por 4 metros de longo e 0.25 metros de alto cun volume de 1 metro cúbico por bancal.  
  3. Marcar o lugar con cordeis.
  4. Retirada de herbas e facer rego para atopar o firme e así poder asentar o bloque.
  5. Colocación do bloque.
  6. Cubrir de terra para o cultivo.

Quedaríamos dúas accións que se realizarán máis adiante.

  • Colocación dun plástico que nos permitirá cultivar en condicións adversas.
  • Colocación dunha billa da que poder obter auga.


    Agora so fai falla que empecemos a cultivar os nosos produtos...

Distribuir contido


by Dr. Radut