Skip to Content

Ed. Musical

Ecopercusión

O 23 de novembro realizamos na aula de psicomotricidade do cole un obradoiro de percusión da man de Edgar.

A actividade consistiu nunha clase práctica de ecopercusión no que so se empregaron materiais reciclados e outros elementos cotiáns como bidóns, cubos, etc.

Os nenos e nenas aprendemos a reutilizar estes materiais ao mesmo tempo que coñecemos técnicas de agarre e golpeo e patróns rítmicos relacionados a palabras como recurso de fixación.

Creamos poliritmias experimentando con distintos ritmos (afrocaribeños, conga, Batucada…. ).

O produto final do traballo realizado foi unha gran obra que tivo as seguintes partes: introdución, ritmo, cortes e final, que se poden contemplar no vídeo final de máis abaixo.

Foi unha experiencia sensacional onde todo o alumnado e profesorado participante saíu entusiasmado.

Emocións a través da música

Dende a materia de Educación Musical, aportamos o noso granciño de area ao PDI do CEIP Manuel Sueiro no curso 2020-2021, traballando as emocións a través da música.

Non cabe dúbida que existe unha conexión entre a música e os sentidos. Acompáñanos ao longo das nosas vidas evocando infinidade de emocións, sensacións e incluso recordos, pois quen non se transporta a un momento e lugar concreto cando soa esa determinada canción? Non só é a “banda sonora” da nosa vida, ademais ten a capacidade de sandar: cambia o noso estado de ánimo, axúdanos a relaxarnos, estimula os nosos sentidos, a imaxinación e sacude as nosas emocións.

A partir dunha serie de cancións o alumnado vivenciou e reflexionou sobre as distintas emocións e sensacións que cada unha delas lles provocaba, exteriorizándoas de maneira oral e plástica. Isto permitiunos analizar e comprender as nosas propias emocións, base da súa xestión no noso día a día.

EDUCACIÓN INFANTIL E A SERENIDADE:

A canción Le nouvel arc en ciel de Michel Pépé, permitiu que o alumnado de Educación Infantil sentise calma e tranquilidade. Despois da súa audición e de acompañar a música co seu corpo, falaron das súas experiencias durante a escoita:

  • Breogán (4º Educ. Infantil): “pensaba en donuts”.
  • Zoe (5º Educ. Infantil): “pensaba en que yo, mamá, papá y mi hermana íbamos a la luna”.
  • Romil (6º Educ. Infantil): “pensaba en que estaba en la playa”.

1º E O  ODIO/REXEITAMENTO:

O asasinato (máis coñecida por formar parte da banda sonora da película Psicose) de Bernard Herrmann, recordounos os nosos noxos e sentimentos de rexeitamento máis profundos.

2º E A FELICIDADE:

Jason Farnham coa súa composión Payday, lembrounos que para ser feliz só necesitamos das pequenas cousas do día a día. Para quen aínda o dubide, que probe a nosa Receita para ser feliz.

3º E O MEDO:

Tubullar bells, de Mike Oldfield, acompañou as nenas e nenos durante a análise dos seus medos máis irracionais. Para demostrar que son moi valentes e seguir adiante, romperon con eles centos de anacos para facelos voar e desaparecer.

4º E A ALEGRÍA:

O Frasco das alegrías confórmase dos momentos alegres das vidas do alumnado de cuarto. Chegado o momento de coñecer que cousas alegran as súas vidas, acompañounos a canción Make it shine de Sophonic media, e descubriron que coinciden nalgunha que outra alegría.

5º E A TRISTEZA: 

Face shrine forma parte da banda sonora do videoxogo Zelda. Tras un momento de análise, esta peza acompañou ao alumnado mentres plasmaban de maneira creativa as súas tristezas.

6º E O AMOR/CARIÑO: 

O amor e o cariño son como unha semente que hai que coidar e coidar para que se converta nunha fermosa árbore. A nosa Árbore do amor está cargadiña das diferentes formas nas que demostramos cariño e afecto aos nosos seres queridos. Liebestraum nº3 en La b Maior, Soño de amor de Liszt, foi a canción que fixo aflorar este sentimento.

Este curso podemos cualificalo como emocionante, pois tal e como dixo Nietzsche “Sen música, a vida perdería o sentido”.

Vídeo resumo do curso 2019/2020

Vídeo resumo das actividades realizadas ao longo do curso 2019/2020.

Esperamos que vos guste!!

Música

Aquí ofrecemos recursos e materiais para traballar esta área. Se precisades pórvos en contacto co profesorado, podedes facelo a través do seguinte correo ceipmsueiro@gmail.com


TAREFAS DE MÚSICA PARA CADA CURSO



RECURSOS PARA TODOS OS CURSOS de ygguerra1


 
 

ACTIVIDADES DE RITMO


  • Práctica co ritmo.


REPASO AS NOTAS


  • Aprendo xogando coas notas...


4º, 5º e 6º de ED. PRIMARIA


  • Practica coa frauta as cancións que se ofrecen na seguinte ligazón:

 


ENTRETEMENTO


  • Relaciona cada música co seu intérprete

  • Xogo do trivial musical.


EXERCICIOS INTERACTIVOS NA AULA VIRTUAL


Como complemento a estas actividades poderás practicar cos exercicios interactivos da aula virtual do cole

Para acceder aos recursos deberás entrar como convidado.

 

Ourencanto

Ao longo dos meses de marzo e abril o alumnado de 3º, 4º, 5º e 6º de Ed. Primaria está a participar nun obradoiro musical destinado a formar un Coro musica para participar no III Encontro de coros infantís, xuvenís e coros escolares que terá lugar en Ourense os días 26, 27 e 28 de abril de 2019.

Concertos didácticos

O 3 de abril o alumnado de 2º, 3º e 4º de Ed. Primaria acercouse ao conservatorio de música para asistir a un concerto didáctico que tivo lugar no seu escenario.

O concerto tivo como eixe principal a relación entre a música e as emocións.

Con esta actividade pretendemos transmitir aos nenos e nenas asistentes que a música é un medio de comunicación artístico, universal e moi completo. Cada melodía que escoitamos desencadea unha forza emocional capaz de espertar en nós sentimentos de agarimo, alegría, emoción, tensión, nostalxia ... Estes aspectos foron experimentados polo noso alumnado nun programa eminentemente sensible, práctico e interactivo.

Propuxéronnos un xogo no que tiñamos que relacionar catro músicos con catro emocións.

Pasámolo xenial!!

Para despedirnos, os profes do conservatorio animáronnos a coñecer os estudos de música que alí se imparten.

Festival de Nadal 2016

O 20 de decembro celebramos o Festival de Nadal no Salón de actos do IES As Lagoas a cuxo equipo directivo e persoal laboral queremos agradecer as atencións que desinteresadamente tiveron connosco.

Tamén é de agradecer a gran afluencia de público que tiveron os nosos alumnos e alumnas así como o seu comportamento ao longo de toda a función. Esperamos que nos perdoaran os posibles erros cometidos no desenvolvemento da mesma.

Nas seguintes ligazón tendes acceso ás diferentes actuacións.

  1. Panxoliña: "O moneco de neve". Ed. Infantil.
  2. Poemas 5º Curso.
  3. Varias panxoliñas e cancións: 3º EP.
  4. Obra de teatro: "Comerei dous". 4º EP.
  5. "Mi burrito Sabanero": 1º e 2º de EP.
  6. "O baile da carrasquiña": 1º e 2º de EP.
  7. Obra teatro: "El milagro del amor". Alumnado de 4º e 6º de EP.
  8. Panxoliña final. 6º, 4º e 3º de EP.

 

Ver a galería de imaxes do Festival de Nadal

Música & meteoroloxía

De todos é coñecida a  estreita relación que teñen os fenómenos meteorolóxicos coa música: A choiva ten a súa propia música; o sol é un estado de ánimo; o outono é melancolía e a primavera liberdade. A música tamén nos fala de choiva, tráenos lóstregos, sol, vento… aos oídos ou neve á cabeza.

Na área de música aproveitamos o proxecto para facer audicións de fermosas composicións musicais de xenios como Beethoven, Vivaldi ou a familia Strauss , entre outros…

No vídeo podemos observar un corte dalgunhas das sesións progaramadas ao longo do curso.

Instrumentos con historia. Pórtico do Paraiso

O venres, 6 de marzo, o alumnado de 6º curso participou nunha exposición de "Instrumentos musicais con historia" que o Concello ten organizada no Museo Municipal de Ourense. Esta é unha mostra de reconstrucións de instrumentos que existiron na Idade Media e foron protagonistas da música do seu tempo. Laúdes, violas, salterios, arpas, rabeis…

Desde o laúde de Ziryab que provocaba envexas na corte da afastada Bagdad, á cítara regalada como tesouro a Afonso X o Sabio, ou o billete que levaba impreso unha viola de teclas como símbolo de identidade nacional, ata o que foi un dos primeiros instrumentos de músicos ambulantes, a zanfona, a exposición cóntanos pequenas historias sobre o papel que desempeñaron estes instrumentos nas vidas cotiás dos nosos devanceiros.

Unha colección acompañada dalgúns dos exemplos iconográficos que permiten aos intérpretes, investigadores e luthieres reconstruír estes instrumentos históricos: pinturas, esculturas, cerámicas, planos...

Foi unha exposición de música viva, moi interesante e magnificamente exposta, pois todos os instrumentos da colección están en perfecto estado e son usados actualmente polos artífices desta mostra, Emilio Villalba e Sara Marina, que non só nos guiaron por esta viaxe ao noso pasado musical, senón que tamén realizaron demostracións de cómo soan estes instrumentos.

Ao remate da actividade, Emilio e Sara doaron, para a biblioteca do noso centro, dous discos de música antiga que eles mesmos gravaron.

Galería de imaxes da actividade

Festival de Nadal 2014

O 18 de decembro, ás 18 horas, celebramos o Festival de Nadal no Salón de actos do IES As Lagoas de Ourense ante un público entusiasta formado fundamentalmente pola nosa comunidade educativa e familiares achegados do alumnado.

Antes de nada, resaltar que é de agradecer o bo comportamento de todos os espectadores, mantido ao longo da duración de todo o espectáculo, e sobre todo pola comprensión mostrada ante aqueles pequenos erros, achacados ao directo case todos eles, que puidemos ter.

Non debemos esquecernos de dar as grazas a todos os membros do Equipo directivo, e ao persoal laboral, do IES As Lagoas pola súa colaboración connosco para poder levar a bo término este Festival.

Se premedes nas seguintes ligazóns accederedes aos vídeos das diferentes representacións que tiveron lugar no Festival: 

  1. Teatro: "A consulta da doutora Casilda". 4º curso.
  2. Baile: "Árbol de Navidad". Ed. Infantil.
  3. Canción: "Debajo de un botón" e "Los pollitos". Ed. Inf., 1º e 2º curso.
  4. Panxoliña: "Rodolfo el reno". 1º curso.
  5. Baile: "Soy una tetera...". 1º curso.
  6. Poemas: "Paxoliñas de Nadal". 3º curso.
  7. Concertos: Gabriel, Estela, Noa, Gabriel e Nuria.
  8. Baile: "O camiño de Viseu". 5º curso.
  9. Humor: "Chistes e adiviñas". 2º curso.
  10. Coreografía. "Singing in the rain". 6º curso.
  11. Canción: "Camariñas". 4º, 5º e 6º curso.

 

Galería de imaxes

Distribuir contido


by Dr. Radut