O 3 de abril, todos os alumnos e alumnas de Educación Infantil foron ao Auditorio Municipal para presenciar o espectáculo de monicreques "ANTÓN, COMODÓN", representado polo grupo de teatro L´Estaguirot. Na obra cóntase a historia de Antón Comodón: "cando era neno na súa casa facíanllo todo, non facía falta que aprendera nada se el non quería. Cando medrou tiña un axudante, Nicolás, que era o encargado de facelo todo. Pero un día Nicolás pensou que xa tiña bastante diñeiro e marchouse...    

Antón non sabía vivir sen axuda: nin vestirse, nin atarse os zapatos, nin tan siquera comer só a sopa!!. Así pois deciciu empezar unha longa viaxe en busca de Nicolás, atravesando campos, cidades, lugares descoñecidos... Durante esta viaxe Antón foi aprendendo moitas cousas e cando por fin atopou a Nicolás, deuse de conta de que fora aprendendo tanto que era capaz de valerse por si mesmo..."

Esforzo, autonomía persoal e amizade son algúns dos valores que esta obra ensina aos máis pequenos que ademais desfrutaron coa estupenda posta en escea que captou en todo o momento a súa atención.

Aquí tedes máis información sobre a historia e a saborosa receita de xeados que Antón aprendeu a elaborar:

O pasado 16 de marzo fixemos no centro un pequeno acto, ao que estivo convidada toda a comunidade educativa, no que fixemos o apadriñamento de Marcos Rodríguez  Pantoja. Seguramente a maioría de vós coñeceredes a súa extraordinaria historia, o abandono por parte da súa familia, a súa vida durante 12 anos completamente só no monte, como foi coidado por lobos... Debido a súa precaria situación actual, por iniciativa da ANPA iniciouse a venda dun marcapáxinas para axudar a mellorar as súas condicións de vida.

Neste pequeno acto no que nos explicou a súa vida, foi agasallado cos traballos realizados polos nenos e nenas de cada grupo-clase, cos que xa estivera en días anteriores para contarlles a súa historia e transmitirlles o seu amor polos animais e polo coidado da natureza. 

Ao citado acto tamén estiveron convidados os medios de comunicación (xornais e televisión local) que quixeron facerse eco desta actividade. 

       NOVA NO XORNAL    LA REGIÓN 

 NOVA NO XORNAL    LA VOZ DE GALICIA  

NOVA NA TELEVISIÓN LOCAL   TELEMIÑO

No blog do proxecto de Voz Natura do noso centro tedes máis información e imaxes sobre Marcos e a súa historia e sobre o acto celebrado no colexio (premede no seguinte enlace ao blog) :

- MARCOS RODRÍGUEZ NO CEIP P. ALBINO NÚÑEZ

INTERNET SEGURA FOR KIDS (IS4K) é o CENTRO DE SEGURIDAD EN INTERNET PARA MENORES EN ESPAÑA posto en marcha polo INCIBE (Instituto Nacional de Ciberseguridad) co obxectivo de promover un seguro seguro e responsable de Internet e das novas tecnoloxías entre nenos e adolescentes. As principais tarefas que desenvolve son:

• Sensibilizar e formar a través do desenvolvemento de campañas,iniciativas e programas de ámbito nacional.
• Ofrecer un servizo en liña de axuda.
• Organizar o Día da Internet Segura.
• Reducir a posibilidade de contido criminal en internet. 

O pasado martes, 27 de febreiro, participamos no centro nunha das súas actividades de formación: Xornadas Escolares para un uso seguro e responsable da rede. Esta actividade implicou tanto a alumnos e alumnas coma a profesores e profesoras.

- Os alumnos de 6º de primaria (divididos en dous grupos) aistiron a un taller totalmente práctico con actividades deseñadas para traballar con dinámicas de grupo que fomentaron a súa reflexión e a aús participación. Como exemplo, unha das actividades realizadas: "Que APPS merecen a pena?, onde traballaron con fichas sobre diferentes appps e debateron sobre a seguridade ou non de instalar cada unha delas, valorando a necesidade da súa instalación, as  súas funcionalidades, os permisos que solicita ...

- O profesorado asistiu tamén a unha actividade de formación fóra do horario lectivo traballando sobre unha unidade didáctica: "CONTROLA A TECNOLOXÍA", que versaba sobre a protección de dispositivos e servizos online, a xestión de contrasinais, opcións de seguridade e protección fronte a aplicacións potencialmente perigosas.   

(Premede nas imaxes para acceder á galería de fotos)

Deixámosvos uns enlaces á páxina de IS4KIDS onde podedes consultar información sobre as actividades que desenvolve este centro:

-  is4kids

- Ferramentas de control parental 

- Guía para familias

- Guía para alumnos 

Aquí tamén tedes máis información sobre o seu servizo de axuda: 

O 26 de febreiro e promovida polo equipo de dinamización da biblioteca do noso centro, recibimos no cole a visita de Charo Pita, famosa contadora de historias que realizou tres sesións de contacontos: unha para o alumnado de infantil, outra para o de 1º,2º e 3º e unha terceira para o de 4º, 5º e 6º. Coas súas historias (unhas inventadas por ela mesma e outras tradicionais) soubo manter e captar a atención, o interese e o asombro de maiores e pequenos que disfrutaron ademais coas súas cancións e rimas. 

Premede nas imaxes para acceder ao blog da biblioteca do cole onde podedes ler máis sobre esta actividade e ver unha presentación de fotos:

C O N T A C O N T O S
	CON CHARO PITA

Como ven sendo habitual, ao longo do curso realizamos no centro sesións de animación á lectura a cargo de destacados "contadores de contos" que coas súas historias e a súa arte de contar engaiolan aos máis pequechos e non tan pequechos que disfrutan e participan activamente coas propostas que van xurdindo ao longo do conto e que os contadores de contos saben tan ben provocar e animar. 

Dúas son as sesións que se celebraron recentemente:

1- O 18 de xaneiro foi Sabela Gago a que unha vez máis (e non nos cansaremos da súa visita) provocou o entusiasmao dos nenos e nenas de 1º e 2º de primaria coa historia das galiñas máis repoludas do mundo: Puchinela, Poliplasta e Petipuá, que competían entre elas en beleza e en poñer o ovo máis grande e bonito do mundo ata o punto de ter que pedir a opinión da súa maxestade o rei...

2- Iago López realizou, o 29 do mesmo mes, dúas divertidas sesións de contacontos nas que a protagonista da historia dos tres osiños, Riciños de Ouro, adicábase a axudar e descubir todos os misterios que acontecían nos contos tradicionais:  a casiña de chocolate, Hansen e Gretel, O flautista de Hamelín ... a actividade foi destinada, nunha primeira sesión, a todo o alumnado de educación infantil e a continuación aos alumnos de 3º e 4º de primaria. Tanto uns coma os outros, pasárono fenomenal!

Dentro do proxecto  MeteoEscolas, os alumnos e as alumnas de 4º, 5º e 6º de primaria tivemos unha visita moi interesante no centro. O luns, 15 de xaneiro, en colaboración con CEE O Pino recibimos no noso cole ao meteorólogo Juan Taboada que traballa na sede de Meteogalicia en Santiago.

Durante algo máis dunha hora espertou a nosa curiosidade científica amosándonos a gran importancia que para a sociedade ten a ciencia da meteoroloxía. Explicounos en que consistía o traballo dun meteorológo e amosounos a gran relevancia que ten a medición para eles (máis incluso que a propia predición).

Ensinounos a diferenza entre clima e tempo, falamos do cambio climático e dos factores que o están a provocar así como de diferentes fenómenos meteorolóxicos como as treboadas, furacáns e tornados. Coas fotos destes últimos quedamos impresionados!

Despois desta interesante charla algún xa quere ser meteorólogo de maior!

(Premede nas imaxes para acceder á galería de fotos)

Un ano máis solicitamos a participación no PLAN DIRECTOR PARA A CONVIVENCIA E A MELLORA DA SEGURIDADE NOS CENTROS EDUCATIVOS E NOS SEUS CONTORNOS. Como xa temos informado en cursos anteriores, este plan impulsado pola Delegación do Goberno en Galicia e a Alta Inspección de Educación en colaboración coas Forzas de Seguridade do Estado, ten como fin facilitar aos centros escolares unha serie de charlas e actuacións encamiñadas a dar respostas coordinadas e eficaces a todas as cuestións relacionadas coa seguridade dos alumnos nos centros educativos e nos seus arredores, fortalecendo a cooperación policial coas autoridades educativas e mellorando o coñecemento que a poboación escolar posúe sobre os recursos policiais. Así mesmo preténdese fomentar nos nenos e nenas o respecto polos dereitos fundamentais. 

Así, o pasado 7 de novembro, unha axente da policía nacional veu dar unha charla ao centro aos alumnos e alumnas de 5º e 6º de primaria. Esta baseouse en dous temas principais: o acoso escolar e as novas tecnoloxías. Despois da presentación do tema por parte da axente e o visionado dalgún vídeo, abriuse un debate onde os nenos plantexaron as súas dúbidas e preguntas sobre estes dous temas tan de actualidade. Entre os consellos que a axente lles manifestou, destacamos os seguintes (e que tamén podedes ver máis ampliados no seguinte enlace):

- PLAN DIRECTOR: CONSELLOS  (enlace páxina Ministerio do Interior)

Se premedes nas seguintes imaxes podedes enlazar coa presentación dalgunha das imaxes do desenvolvemento desta charla/coloquio: 

Para rematar este curso 2016-17 a ANPA do centro celebrou a xa tradicional festa de fin de curso. O venres, 23 de xuño, todos os alumnos e alumnas do colexio pasárono fenomenal coas actividades programadas: primeiro unha exhibición de patinaxe a cargo dos nenos e nenas que ao longo do curso acudiron a actividade de patinaxe: menudos artistas!!. Logo comezo da gran festa cos inchables de auga, as sesións de maquillaxe e a festa da escuma!!  Un gran éxito unha vez máis. Con esta pechamos as actividades realizadas neste curso. Agora toca descansar e coller forzas para empezar en setembro cheos de enerxía!! 

Xa podedes visualizar as fotos da GRADUACIÓN DOS ALUMNOS E ALUMNAS DE 6º de EDUCACIÓN INFANTIL celebrada o pasado 21 de xuño, con esta celebración remataron a primeira etapa da súa andaina escolar no centro. PARABÉNS a todos polo traballo realizado e desexámoslles o mellor na nova etapa que comezarán en setembro. 

O vindeiro mércores, 21 de xuño, ás 10:00 da mañá terá lugar no salón de actos do colexio un pequeno acto onde celebraremos a graduación dos alumnos de 6º de infantil (5 anos). Despois de tres anos na etapa de infantil, comezarán con ilusión o vindeiro curso unha nova etapa no cole, que esperamos sexa tan positiva como a que agora rematan. 

Todas as familias dos nenos de 5 anos estades invitadas a asistir a este acto. CONTAMOS COA VOSA PRESENZA!!