21-05-2016           

    ESTAMOS OUTRA VEZ DE NORABOA!!!

Este é o noso segundo ano de participación no programa de educación medioambiental VOZ NATURA que promove a Fundación Santiago Rey Fernández-Latorre, e o segundo ano que acadamos un premio.

Se o ano pasado foi o premio ao mellor blog da comunidade VOZ NATURA, este ano fomos premiados como mellor PROXECTO OURENSE do curso 2015/16.

Unha vez máis queremos dar as grazas ao equipo de VOZ NATURA por premiar o traballo que con tanto esforzo e dedicación levan a cabo as profesoras de 5º e 6º de infantil baixo a coordinación da profesora Maite Sotelo, alma máter de todo o proxecto.  

Damos tamén os nosos parabéns aos demais centros premiados e a todos os participantes neste programa polo gran labor que desenvolven ao longo de cada curso polo coidado e mellora do medio que nos rodea. 

O curso pasado o equipo que leva a cabo o programa de VOZ NATURA no noso centro realizou unha serie de talleres, denominados "TALLERES CON RAÍZ", cos que intentaban dar a coñecer aos alumnos e alumnas de Educación Infantil actividades e xogos que realizaban os seus avós cando eran pequenos. Ao longo deste mes de marzo retomaron esta actividade realizando un novo taller: "PAN DE MILLO". Neste taller os nenos e nenas aprenden como se colleita o millo, cal é o proceso que se segue para obter a fariña e logo elaboran eles mesmos uns boliños coa fariña de millo. A esta experiencia, ademais do alumnado de infantil uníronse os alumnos de 1º de primaria  e a vindeira semana serán os de 2º curso os que o realicen. Coma nos talleres anteriores, contaron coa presenza do avó Sergio que lles explica todo o proceso e lles ensina a amasar e facer os boliños. Estes cócense no forno do comedor escolar e logo lévannos para as súas casas para merendar. 

Se picades nas imaxes iredes directamente ao blog do proxecto de VOZ NATURA do centro para coñecer máis detalles desta experiencia e ver as imaxes dos nenos en plena faena "coas mans na masa". 

O pasado mércores, 18 de novembro, os alumnos/as de Educación Infantil participaron nun taller impartido por dous axentes do SEPRONA (Servizo de Protección da Natureza), centrado na loita contra cos incendios forestais. A actividade, enmarcada dentro do programa medioambiental Voz Natura que se leva a cabo no noso centro ao longo deste curso 2015- 16, constou de dúas partes ben diferenciadas: nun primeiro momento os pequenos asistiron a unha charla, acompañada dunha presentación, cun coloquio final. A segunda parte foi máis "práctica", onde os nenos/as disfrutaron un montón montando en dous vehículos que utilizan axentes deste organismo na súa loita contra os incendios forestais.

Preme nas imaxes para acceder ao blog do noso proxecto Voz - Natura para ter máis información e acceder a todas as imaxes. 

Ao longo deste curso escolar, e por segundo ano consecutivo, o noso centro forma parte da comunidade de VOZ NATURA. Voz Natura é un programa de educación medioambiental posto en marcha pola fundación Santiago Rey Fernández-Latorre no curso 1997-1998. A súa finalidade  é "implicar á comunidade escolar de Galicia na recuperación e defensa da natureza da nosa Comunidade".

Cada ano o programa está centrado nun tema concreto, o curso pasado estivo adicado aos hortos escolares, e o presente está adicado á protección de todos os ecosistemas autóctonos de Galicia "coa finalidade de fomentar, en particular, o desenvolvemento de actividades que repercutan na protección dos chans". Desta forma o programa tamén se suma á declaración realizada por parte das Nacións Unidas de proclamar o ano 2015 como Ano Internacional dos Chans.

O noso proxecto deste curso titúlase "Re-xeneración: verde no canto de marrón", e aínda que continuaremos coas nosas actividades do horto escolar, "escola pote guapa", talleres, etc. e centrándonos tamén no lema deste curso, adicarémonos á limpeza e recuperación do recinto do noso centro, plantando árbores autóctonas e froiterias.

Se queredes seguir o noso traballo ao longo do curso accedede ao blog do noso proxecto de Voz Natura onde podedes ver o traballo que realizamos cada semana: 

 Premede na imaxe da cabeceira do blog para acceder ao mesmo 

O sábado, 6 de outubro, acudimos ao parque ACEA de AMA en Culleredo (A Coruña) para participar na gran festa de fin de curso do programa VOZ NATURA. Como era a primeira vez que íamos á citada festa, estabamos un pouco nervosos, pero dispostos a participar na maioría das actividades e visitar a exposición dos traballos realizados por todos os centros participantes.   

A chegada ao parque: pais/nais, nenos/as, irmás/irmáns, profes... preparados para pasar un día xenial!!!

 Participando nas diversas actividades e repoñendo forzas para continuar...

Visitamos a exposición dos traballos realizados polos distintos centros participantes... pareceunos fantástico o traballo realizado por todos eles. 

Alí tamén estaba a nosa exposición cun resumo en carteis e murais do traballo feito:

E por fin chegou o momento máis esperado, a entrega do premio concedido ao noso centro: mellor blog da comunidade VOZ NATURA do curso 2014-15.

Grazas a VOZ NATURA polo premio concedido e parabéns tamén aos demais premiados e en xeral, a todos os participantes do programa polo gran labor que realizan cada ano!!!. 

ESTAMOS DE NORABOA!!! O noso colexio acaba de recibir o premio  ao MELLOR BLOG DE VOZ NATURA DO CURSO 2014/ 2015.

"DO HORTO AO PRATO. O XARDÍN DOS SENTIDOS" é o título do noso blog onde se reflicten todas as actividades do horto escolar e do proxecto VOZ NATURA, ao que nos unimos por primeira vez este curso. Damos as grazas ao xurado e ao equipo de VOZ NATURA polo premio concedido e tamén felicitamos aos blogs finalistas e en xeral, a todos os blogs da gran comunidade que forma o programa VOZ NATURA.

(Fai clic na imaxe para acceder á nova na edición dixital de La Voz de Galicia)

Esta semana na nosa sección habitual do horto escolar facemos unha chamada ás familias dos nenos/as de Educación Infantil para que se anoten e participen connosco na festa de Voz Natura que se vai celebrar o vindeiro 6 de xuño no parque Acea de Ama (Culleredo-A Coruña). A viaxe realizarase en autobús que correrá a cargo do colexio, o acceso ás instalacións é gratuíto, así coma todas as actividades que alí se ofertan: inchables, talleres, xogos, competicións deportivas, exhibicións, actuacións...  Haberá postos de comida en todo o parque. 

Se premedes no seguinte enlace podedes ver no blog do horto escolar as actividades realizadas o pasado venres, entre elas a colocación das "casiñas" ...

DO HORTO AO PRATO. O XARDÍN DOS SENTIDOS

O pasado venres, 5 de decembro, comezamos co traballo de plantación de árbores e arbustos no patio do colexio. Esta plantación está enmarcada dentro do noso proxecto "Escola ponte guapa" e  "O xardín dos sentidos". Como xa tiñamos preparadas as zanxas, traballo feito conxuntamente entre pais, alumnos/as e profesorado o pasado 8 de novembro, o traballo resultou máis fácil e levadeiro. Os alumnos/as de 6º en colaboración cos pequenos/as de 3 e 4 anos realizaron esta plantación axudados por algúns profesores/as. Co obxectivo de motivalos máis para que se implicasen no coidado e mantemento das árbores, os alumnos/as de 6º de primaria apadriñaron a un neno/a de infantil, e a súa vez os dous apadriñaban un dos arbustos prantados, neste caso mirtos. Como podedes ver polas fotos o traballo conxunto resultou moi estimulante, e que ben o pasaron saltando para aplastar a terra!!

En días pasados fíxose un chamamento a toda a comunidade educativa para realizar entre todos unha das actividades enmarcadas dentro do proxecto Voz Natura: "Escola ponte guapa". O sábado, 08 de novembro, estivemos cavando zanxas ao longo do muro exterior dos patios cubertos. Entre os voluntarios/as:  pais, alumnos/as, ex-alumnos e profesores/as preparamos o terreo para a futura plantación de mirtos nesta zona, que presenta un aspecto bastante "feo",  e así poñela máis "guapa". Despois deste primeiro traballo, que a chuvia case nos impide rematar, continuaremos coa preparación da terra, abono e plantación en seguintes sesións de traballo conxunto.

Dar as grazas aos que se animaron a vir e colaborar e emprazar a todos/as para futuras xornadas de traballo.

 CONVOCAMOS A TODA A COMUNIDADE EDUCATIVA A UNHA ACTIVIDADE CONXUNTA DENTRO DO PROGRAMA: 

ESPERAMOS A PARTICIPACIÓN DE TODOS O VINDEIRO SÁBADO, 8 DE NOVEMBRO !!

(Preme na imaxe para ver a convocatoria a maior tamaño)