Chegou aos nosos oídos...a participación como poñente e moderadora da nosa ex alumna Sara Fraga no V Congreso "Entre Clio e Euterpe. Arte e Poder"

 O Evento terá lugar durante os días xoves 22 de marzo (Salón de Actos da Facultade de Filosofía da USC) e venres 23 de marzo (Aula 8 da Facultade de Xeografía e Historia da USC).

Xoves 22.

Ø13.15 – 13.30.  Sara Fraga Pérez (USC) Ponte traxe! Traballa coma un home, viste coma unha muller.

Ø 17.00. MESA IV -“Idade Moderna e lecturas da soberanía”. Modera: Dna. Sara Fraga.

PROGRAMA

https://entreclioyeuterpearteypoder.wordpress.com/programa/

Chegou aos nosos oídos..que a ex alumna  do Aguiar Rebeca Miragaya presenta o seu TFG (Traballo de Fin de Grao) sobre a escola fundada pola Sociedade "Hijos del Ayuntamiento de Coirós".

 Alegramonos por ela que completa tan brillantemente esta etapa da súa formación universitaria e porque o motivo do seu traballo de Fin de Grao conxuga varios temas que levamos traballando no Instituto Francisco Aguiar dende hai tempo:

• a recuperación do patrimonio local (enlace),
• a emigración(enlace) e
• a escola (enlace)

Aproveitamos para convidar a Rebeca a compartir a súa investigación  coas novas xeracións.

PARABÉNS !

(enlace a 4 aldeas)

Logo de ter que suspender a charla cos maiores o pasado día 6 de febreiro por motivos de saude, retomamos neste mércores 21 de febreiro os diálogos interxeneracionais sobre a escola.

Desta volta participarán os grupos de ESO 2º C (a 3ª e 4ª horas) e ESO 2º D (a 5ª e 6ª horas) Charlarán sobre co grupo de maiores ( María, Isabel,Elías e  Dopico) sobre experiencias escolares que van dende a II República ata as escolas do franquismo. 

Chegou aos nosos oídos...que o sábado 17 de febreiro, ás 20 horas, terá lugar  a 3ª XORNADA DO IX ENCONTRO DE TEATRO AFECCIONADO DE BETANZOS 

A compañía "Colectivo Cultural Ollomao" de Barreiros (Lugo)   porá en escea a obra "Enciclopedia Álvarez"

Enciclopedia Álvarez é a historia de catro nenas e catros nenos sometidos á absurda e ilóxica "des-educación" da escola franquista. Os problemas de matemáticas aos que "lles faltan datos" ou están "mal planteados", as preguntas de catecismo que se contestan de determinada maneira "porque lo pone el libro", as clases de ximnasia impartidas por mutilados de guerra, as de "hogar" para as nenas a cargo de mulleres da Sección Femenina ou a visita do inspector de Falange, entre outras, poñen sobre o escenario algunhas das incoherencias máis notorias daquel sistema. Unha historia contada con humor, porque desde o humor é máis agradable exercer a sempre necesaria memoria histórica. Unha historia que nos axuda a comprender o absurdo dun sistema educativo autoritario e irracional. Un absurdo incrementado polo paso do tempo, pero que durante máis de corenta anos foi un dogma imposto pola forza.

Tendo en conta que o noso instituto está a traballar este curso (enlace) en colaboración con Afundación na experiencia piloto  interxeneracional titulada "Falamos da escola", o noso alumnado de 2º da ESO  foi convidado a asistir a esta representación. Seguros estamos de que han disfrutar da experiencia teatral a que nos convida a Agrupación Teatral Mariñán e o Colectivo Ollomao. 

Chegou aos nosos oídos... unha nova andaina artística do noso compañeiro, profesor de Historia da Arte, Xosé Luis Mosquera Camba. Desta volta trae a casa unha exposición que previamente xirou en Portugal (enlace). Trátase dunha mostra de colaxes, "Musas: as mulleres fatais", concebidos como poesía visual, vén de se expoñer en Amarantes (distrito de Porto) comisariada por Antero Alda, poeta e fotógrafo portugués.

A exposición inaugúrase o luns 12 de febreiro , ás 20 horas, na Libraría Biblos de Betanzos. 

Estará disponible para os visitantes ata o vindeiro 5 de marzo.

Un ano máis o noso instituto traballa pola solidariedade interxeneracional colaborando co Centro de Envellecemento Activo de Afundación en Betanzos. Nos pasados dous cursos compartimos maiores e pequenos as experiencias sobre a emigración no programa "Fálame da emigración"

Neste  2018 (ademáis cun certo protagonismo porque foi grazas á idea e ao ofrecemento do noso profesor de Pedagoxía Terapeutica, Ramón Ferreño)  puxémonos a  lanzar unha nova experiencia piloto de “Fálame da escola” no IES Francisco Aguiar. A estrutura das sesións interxeneracionais replica as de “Fálame da emigración”: 

Na primeira sesión que terá lugar o venres 2 de febreiro (grupos A e B de 2º ESO) e o mércores 7 (grupos C e D de 2º ESO):

• Veremos un video para contextualizar o tema
• Despois daremos paso ás experiencias dos maiores sobre a súa escola.
• Preguntas e debate.
• Formación de pequenos grupos de alumnos e maiores para seguir afondando no tema.

Na segunda sesión( o 28 de febreiro e 2 de marzo):

• Percorreremos maiores e alumnos a exposición preparada por Ramón Ferreño sobre a escola
• Escoitaremos a investigación dos nosos alumnos sobre a escola dos seus pais, nais, avoas, avós...
• Formaremos pequenos grupos de reflexión 
• Conclusión final para pensar sobre a escola que queremos para o futuro.

Desenvolvemos o deseño e os materias do proxecto para o seu lanzamento neste curso 2018/2019 coa intención de implementar a experiencia a través da rede de Espazos +60 de Afundación e ofertala a outros IES de toda Galicia . 

O VENRES 12 DE XANEIRO  profesorado da facultade de Xeografía da Universidade de Santiago reuniráse co alumnado de Xeografía de 2º BAC do noso instituto para falar de xeografía e para presentar os estudos do Grao que esta disciplina desenvolve na Facultade compostelá. 

Lonxe queda unha disciplina entendida só como pura descrición do medio físico ou humano.

Pouco ten que ver a xeografía do século XXI con listas de ríos, montañas, cabos e golfos. 

A día de hoxe, a xeografía analiza as relacións entre o medio e o ser humano, entre o espazo e as sociedades que o habitan.

E faino cun sentido crítico, explicativo e, na medida do posible, transformador.

A charla terá lugar no Salón de Actos do IES Francisco Aguiar entre as 11.45 e as 12.35hs. 

Chegou aos nosos oídos... a fermosa inciativa da Escola Municipal de Folklore de Betanzos de recrear con figuras reais ( os mesmos compoñentes da dita Escola) un famoso cadro do pintor ferrolán Fernando Álvarez de Sotomayor que leva por título "Comida de boda en Bergantiños"

Se por algo chama a nosa atención esta iniciativa é pola calidade da reproducción e pola presenza na imaxe de varios alumnos/as e ex alumnos/as: Irene, Roque, Alejandro, Ángela.  E, por fontes ben informadas, chegounos a información da participación estelar na iniciativa da recén graduada en Historia,  Sara Fraga.

Encantados dende o Aguiar coa iniciativa. Parabéns a participantes de todo tipo! Que se repita!

Chegou aos nosos oídos... que o novo traballo artístico do profesor Xosé Luís Mosquera. Do noso compañeiro poderíamos dicir moitas cousas boas sobre o seu labor docente e, por riba de todas, que temos a fortuna de que forme parte do noso equipo de profesores. 

Xosé Luís xa nos ten afeitos a recibir premios polo seu labor artístico coa palabra, como poeta(enlace).

Agora coñecémolo nunha nova vertente cun interesante traballo gráfico que expón entre o 16 de decembro e o 4 de febreiro na Casa da Granja de  Amarante ( Portugal). Convidado  pola "Associaçâo para a Criaçâo do Museo Eduardo Teixeira Pinto" presenta unha interesante mostra dos seus collages baixo o suxestivo título "MUSAS: As mulheres fatais"

PARABÉNS X.L. !

Chegou ás nosas retinas... o reflexo do Aguiar na Casa dos Espellos.

A Casa dos Espellos( enlace) é unha revista dixital xurdida dun grupo de entusiastas traballadores pola revitalización e valoración do Parque Enciclopédico de O Pasatempo. Atopamos no elenco de colaboradores e colaboradoras a un bo número de antigos alumnos do noso Instituto. Comezando polo que semella ter bastante que ver coa iniciativa, Ángel Arcay, o resto do elenco o cubren con nota,  Sara Fraga, Lucía Díaz, Eduardo Marqués, Daniel Lucas Teijeiro...

Pero deixemos que sexan eles os que presenten o proxecto:

Casa dos Espellos: Revista poliédrica da cultura galega, nace ca mesma vontade ca que Don Juan García Naveira construíu dita Casa no Parque do Pasatempo.

Se o Parque pretendía ser un alegato ao coñecemento e á educación (nunha das moitas narrativas que nos pode aportar o lugar) a Casa dos Espellos era un dos divertimentos deste xardín no que o visitante atopaba unha realidad deformada dende diferentes puntos de vista, con espellos cóncavos e convexos que devolvían unha imaxe real e ao mesmo tempo diferente do que tiñamos diante.

É por iso que cremos necesario a publicación desta Revista de carácter científico, onde teñan cabida moitos deses traballos que nos aporten novas visións sobre todo o mundo que xira baixo os nosos pés. Novos puntos de vista e novas formas de narrar todo o que está a acontecer.

(enlace)ilustración de Josiño Souto Santé

Casa dos Espellos: Revista poliédrica da cultura galega é unha revista semestral que nace co obxectivo de dar voz aos novos protagonistas dos diferentes campos da nosa cultura.

Malia que parte da vontade de recuperar todo o relacionado co pasado do Parque del Pasatiempo e da cidade de Betanzos, está aberta ao coñecemento doutras realidades do ámbito galego nas súas diferentes vertentes: arte, arquitectura, historia, xeografía, socioloxía, antropoloxía, xornalismo, urbanismo, turismo, literatura e un longo etcétera.

Prestará especial atención tamén a todo o relacionado co pasado da nosa emigración en todas as súas expresións culturais.

Parabéns para esta iniciativa que axuda a adquirir conciencia do noso patrimonio

e felices de que o Aguiar forme parte

( aínda que sexa na prehistoria) deste proxecto