Novas

     O pasado martes 24 de setembro, a alcaldesa Inés Rey e o edil de Educación, Jesús Celemín, recibiron na sede do Concello da Coruña en María Pita á directiva do CEIP Alborada e do IES Plurilingüe Elviña para escoitar as súas peticións de cara a mellorar puntos clave na limpeza, xardinería e accesibilidade dos centros. Comprometéronse diversas actuacións atinxentes ás devanditas cuestións, como é de coñecemento por nota de prensa do propio Concello.

     O equipo directivo do IES Elviña en nome de toda a comunidade educativa agradece a accesibilidade e a comprensión institucional mostrada, referente a cuestións que eran motivo de fonda preocupación para alumnado, familias, persoal e público en xeral.

Historia viva de ELVIÑA

     Unha débeda pendente dos centros de ensino do noso país é a escaseza de vínculos co alumnado do seu pasado. O labor educativo, académico, remata cos exames finais e deixa ao alumnado na liberdade de continuar os seus estudos na Universidade, noutras ensinanzas ou de entrar no mercado de traballo.  Son moitas as ocasións en que antigos alumnos "regresan" ao centro sexa para matricular aos seus fillos, sexa para facer unha visita e lembrar tempos xuvenís, para facer algunha xestión administrativa, ou mesmo para traballar, desde esta barreira, coma profesorado agora, acolléndose ao claustro histórico do instituto de Elviña.

     Esperta certa envexa o coidado que noutras terras ponse no vencello entre a fría institución e as vidas intensas de quen pasou por ela. Por iso, abrimos aquí esta xanela ás novas que nos chegan de exalumnos e exalumnas, coma un xeito de subliñar o respecto e o orgullo co que, desde a actualidade, o IES Plurilingüe Elviña mira ao seu pasado, e a segura convicción que temos de que o noso alumnado actual encherá no futuro moitas páxinas ilustres no devir das ciencias e das artes.

Marisol Soengas: exalumna do IES ELVIÑA, autoridade na loita contra o melanoma

     Unha persoalidade de relevancia no mundo da investigación médica é Marisol Soengas que fixo os seus estudos de secundaria no noso centro para acadar despois a licenciatura e o doutoramento en Bioloxía pola Universidade Autónoma de Madrid e obter, a partir dos seus estudos, importantes logros laborais e distincións (como o premio Josefa Wonenburger no ano 2009).
     As súas investigacións no estudo do melanoma teñen sido noticia en distintas ocasións, e mesmo no mes de abril do ano pasado se lle adicou un número do dominical El País semanal sobre as mulleres españolas na ciencia actual (clicar na foto para acceder á entrevista). Adicámoslle un afectuoso recordo desde esta a nosa web. Sexa exemplo para as nosas estudantes do presente dos éxitos profesionais obtidos a base de estudo, paixón e traballo.

Xulio Ferreiro inaugura as obras do aparcadoiro

    O alcalde da cidade, Xulio Ferreiro, e a concelleira de participación e innovación democrática, Claudia Delso, estiveron no noso centro na mañá do día 14 de setembro para proceder á inauguración oficial das obras de mellora e reforma do aparcadoiro do CEIP Alborada e do IES Plurilingüe Elviña. Aproveitando a ocasión, as directivas dos dous centros saudaron ao alcalde e á concelleira, e solicitáronlles novas actuacións de acondicionamento na zona. O alcalde, ademais, comprometeuse amablemente a participar na próxima celebración do 40 aniversario da fundación do noso centro.