Equipo directivo

ABALAR 

As instrucións da Xunta daban de prazo para entregar os boletíns de notas hoxe venres 3 de abril.

Non obstante o espazo abalar está dando problemas de acceso ó servizo, parece ser que o servidor caeu debido á avalancha de familias tentando comprobar as cualificacións dos seus fillos e fillas, o que provocou a súa caída. 

Esperamos que o solucionen axiña e poidades acceder a el sen problema ningún.

Esta é a imaxe coa que Abalar avisa do fallo no servizo. 

 AVISO IMPORTANTE:

Debido ás novas medidas adoptadas a causa do estado de alarma polo Goberno, é posible que non se poidan enviar os boletíns de notas por correo postal. 

 1.- Avaliacións do 2º trimestre, curso 2019/20.

O 27 de marzo, no Portal da Dirección na páxina web da Consellería de Educación saíu a seguinte información:

INSTRUCIÓNS DO 27 DE MARZO, DIRIXIDAS ÁS DIRECCIÓNS DOS CENTROS EDUCATIVOS DE ENSINO NON UNIVERSITARIO SOBRE A CONCRECIÓN DE MEDIDAS A ADOPTAR EN RELACIÓN COA AVALIACIÓN DO SEGUNDO TRIMESTRE.

……….

En virtude das disposicións anteriores dítanse as seguintes instrucións: 

1. A efectos de dar continuidade no calendario escolar, os centros educativos procederán a formalizar o peche da avaliación do segundo trimestre. Cada centro, dentro da súa autonomía pedagóxica e de xestión, disporá as medidas precisas para a súa formalización, na medida do posible, antes do 3 de abril. 

2. Non serán avaliables as actividades relacionadas cos contidos curriculares realizadas polo alumnado con posterioridade á data de declaración do estado de alarma. En consecuencia, aqueles centros que non teñan formalizado o peche da avaliación do segundo trimestre procederán a formalizalo co traballo desenvolvido ata dita data. 

3. No caso das ensinanzas de formación profesional de grao medio e grao superior na avaliación parcial de módulos do segundo curso no réxime ordinario o equipo docente tomará as decisións de acceso do alumnado á FCT e, nos ciclos de grado superior o módulo de proxecto.

2.- Indicacións:

1. Todo o profesorado deberá avaliar ao seu alumnado en todas as materias que imparta cos instrumentos de avaliación utilizados no período do 8 de xaneiro ata o 13 de marzo (cualificacións da avaliación continua realizada ao longo do período, e segundo os instrumentos de cualificación recollidos nas respectivas programacións).

2. Todo o alumnado deberá ser cualificado, non existe a posibilidade de non cualificar. 

3.- O 31 de marzo todas as cualificacións estarán introducidas no XADE. 

4. O 2 de abril revisaranse e pecharanse todas as actas desde secretaría. Imprímense os boletíns de notas, e, coas observacións correspondentes, envíanse por correo postal ás familias.

Estas instrucións poden ter modificacións, puntualizacións que serán debidamente informadas de ser preciso.

A DIRECCIÓN

Palas de Rei, 27 de marzo de 2020

A raíz das  medidas adoptadas  en todos os centros de ensino non universitario de Galicia, o IES do Camiño, empregará a partir do luns 16 de marzo a aula virtual para   facerlle chegar ao alumnado actividades xenéricas relacionadas cos contidos curriculares para que as podades realizar nos vosos domicilios. Así mesmo o  profesorado poderá empregar o correo electrónico para comunicarse co alumnado.

Finalmente recórdavos que o instituto empregará como mecanismo de comunicación e información co alumnado e as familias a web e o instragram do centro e o taboleiro. 

 SUSPENSIÓN DAS CLASES A PARTIR DO LUNS 16 DE MARZO

Publicouse na web da CIUGA un video explicativo da proba de avaliación de bacharelato para o acceso á universidade (ABAU).

FONTE: CIUGA 2020 / http//ciug.gal/

Hoxe, martes 18 de febreiro, no marco da actividade “Nin + nin -, iguais”, consistente nun ciclo de conferencias en centros educativos para dar a coñecer a mulleres profesionais líderes nos seus sectores, contamos coa bióloga e gandeira de A Cernada, Ana Mª Corredoira. Esta veciña de Palas de Rei falounos un pouco das súa experiencia vital e da súa profesión de gandeira, así como con algunha das dificultades ás que se tivo que enfrontar, tanto por ser  muller, como por ser xove.

Cursou a ESO e o Bacharelato no noso instituto, cun expediente brillantísimo, para logo estudar Bioloxía na USC, con non menos éxitos. Ao remate desta e con todo un amplo abano de posibilidades laborais, toma a decisión de comprometerse e poñerse á fronte da explotación gandeira de seus pais, coa que xa estaba  familiarizada e  colaboraba desde sempre. Ana María é un exemplo a seguir de muller intelixente, sensible, pero cos pés na terra e con fe  nunha gandaría sostíbel e con rendibilidade, con fe no futuro de Galicia e do seu sector gandeiro e capaz de solventar os obstáculos e atrancos que se atopou durante a súa traxectoria. 

E así o demostrou durante a súa conferencia onde nos transmitiu a súa forza, motivación e paixón polo que fai e no que cre ferventemente. Ogallá dispuxeramos de máis tempo para seguir conversando con ela. 

Moitas grazas por volver ao que foi e segue sendo o teu instituto. 

Ademais neste día contamos coa presenza da Secretaria Xeral de Igualdade, Susana López Abella e o alcalde de Palas de Rei, Pablo Taboada Camoira. 

Aquí podes ver un resumo en imaxes da conferencia:

• "Nin + nin -, iguais"

A violencia de xénero é un problema que está ocorrendo a nivel mundial e en particular, na nosa sociedade de aí a necesidade de intervir dende as idades máis temperás para poder previla.  

As causas da violencia contra as mulleres atópanse na discriminación de xénero, as normas sociais e os estereotipos de xénero que a perpetúan. Esta violencia pode manifestarse en diversos tipos:  FÍSICA, SEXUAL, ECONÓMICA, SIMBÓLICA E PSICOLÓXICA. 

Dende o instituto levamos varios cursos traballando coas alumnas e alumnos na súa prevención, dado os efectos devastadores que a violencia ten nas mulleres. Xa que cremos firmemente que a prevención debe comezar nas primeiras etapas da vida, mediante a educación dos nenos e nenas que promova as relacións de respecto e a igualdade de xénero. O traballo con mozos e mozas é a mellor opción para lograr un progreso rápido e sostido en materia de prevención e erradicación da violencia de xénero, xa que esta etapa trátase dunha época crucial durante a cal se forman os valores e normas relativas á igualdade de xénero.

 Por iso hoxe contamos no centro, dentro do marco do Plan Director para a mellora da convivencia, coa presenza de dous formadores da Garda Civil, Ana e Hector, que informaron e formaron ao alumnado de 3º e 4º da ESO e de 2º de FP Básica na prevención da violencia de xénero.

As persoas pertencentes ao colectivo LGTBI+ poden vivir diferentes situacións discriminatorias, aumentando o nivel segundo o descoñecemento sobre o colectivo concreto.  A sociedade e cada nivel social ten construído un imaxinario colectivo baseado en prexuízos e estereotipos sobre os diferentes exemplos de diversidade afectivo-sexual. Isto provoca que haxa que facer de maneira obrigatoria un esforzo especial por visibilizar as diversas identidades, formas de ser e orientacións sexuais que foron tachadas como minoritarias ou “non normativas”, posto que o nivel de aceptación non está de todo asegurado na nosa sociedade. 

De aí que a educación sexa un instrumento de empoderamento fundamental, xa que servirá para construír a cidadanía do futuro, sendo a vía para a toma de conciencia das discriminacións que existen. Por tanto, queda claro que unha das necesidades da diversidade no camiño á aceptación de todos os modelos é, dalgunha maneira, traballar a súa visibilidade 

Por este motivo, faise indispensable integrar a diversidade afectivo-sexual e familiar na realidade diaria do alumnado, espertar a conciencia da súa existencia e tratala desde o respecto e a convivencia pacifica.

Por iso coa CHARLA que hoxe tivemos no INSTITUTO buscamos sensibilizar, formar e impulsar a colaboración activa da comunidade educativa no coñecemento, visibilización e valoración da diversidade afectivo-sexual para a mellora da convivencia, a prevención da LGTBIfobia e a promoción da igualdade de oportunidades e a equidade para todo o alumnado.

Grazas a CRISTINA PALACIOS CASTRO, presidenta de ARELAS, por facer desta xornada una formación dinámica, participativa e na que se deu visibilidade a diversidade afectiva-sexual e a LGTBIfobia, fomentando a valoración das persoas, o dereito á diferencia e ás relacións respectuosas e saudables fóra de homofobia, lesbofobia e transfobia na contorna educativa. E na que ademais puxo  o corazón. 

Agora toca remover conciencias e reflexionar sobre o aprendido. 

O venres visitounos Zoe Prieto, dinamizadora xuvenil da RGDX para informar aos correspentes xuvenís dalgúns dos programas existentes, tales como carné xove, xuventude crea ... e puideron trasladarlle, eles e elas, as súas dúbidas e suxestións