Despois da primeira charla no mes de xaneiro co alumnado de 1º BAC, este martes, o doutor en Filosofía Abraham Rubín, da UVigo, volveu visitar o IES Otero Pedrayo para falarlle ao alumnado de Psicoloxía de 2º BAC sobre autocoñecemento.
Explicoulle como, pasada a fase de espello (Lacan), o inconsciente proxéctase sobre outras persoas á procura de modelos e, dese xeito, vaise construíndo a identidade persoal, deixando fóra aqueles caracteres desagradables que non recoñecemos como propios e detestamos nos demais (a sombra tal e como a definiría Jung). O ponente debuxou con claridade este proceso de autoidentificación, a súa relación co mundo virtual e a necesidade de asumir na consciencia a sombra para non caermos presos da impulsividade.
Todo un privilexio para o Otero Pedrayo poder contar de novo contigo, Abraham. Grazas.
IES OTERO PEDRAYO. ENSINO PÚBLICO. ENSINO DE CALIDADE.
O pasado luns, o alumnado de 2º BAC asistiu a unha charla organizada polo Departamento de Orientación na que un representante da Comisión Interuniversitaria Galega (CIUG) lles aclarou todas as dúbidas relacionadas co proceso de adminisión á universidade, así como as que tiñan a ver coas probas de acceso (probas ABAU). Charla produtiva e moi, moi necesaria.
IES OTERO PEDRAYO. ENSINO PÚBLICO. ENSINO DE CALIDADE.
Despois de pasar o primeiro cuadrimestre no Otero Pedrayo, con moito pesar, tocounos despedir á nosa auxiliar de conversa, Salomé Martín.
Grazas, Salomé, por todo o regalado ao noso alumnado: por esas prácticas de conversa, por ser para el un modelo de corrección lingúística, por achegarlle un pouquiño máis a cultura do teu país..., pero tamén pola túa dozura, a túa adicación e o teu bo pracer. Foi unha experiencia moi enriquecedora.
IES OTERO PEDRAYO. ENSINO PÚBLICO. ENSINO DE CALIDADE.
A pasada semana, alumnado de 4º ESO e 1º BAC desprazouse a Quiroga para participar nas XV Olimpíadas de Xeoloxía, que tiveron lugar no #CourelMountainsUNESCOGlobalGeopark.
Xincana con 12 probas prácticas polas rúas de Quiroga, realización dun exame, visita ao Museo Xeolóxico e ao Centro de Interpretación da Minería Aurífera Romana ou obradoiro de bateo de Ouro foron algunhas das actividades nas que a nosa rapazada participou, xunto con outros compañeiros e compañeiras de Lugo e Ourense.
O Otero Pedrayo felicita a todos eles/elas e, en especial, aos nosos alumnos SUNAI MARTÍNEZ ZABALA, de 1º BAC, por ese 3º posto absoluto, e a PABLO GÁNDARA, de 4º ESO, por ese accésit concedido polo xurado (4º posto).
IES OTERO PEDRAYO. ENSINO PÚBLICO. ENSINO DE CALIDADE.
Remataron as comandas da nosa parella de mecos Barbie e chegou a celebración do Entroido no IES Otero Pedrayo!
Un ano máis, os amigos e amigas do Centro Interxeracional da Farixa acompañáronnos no festexo, integrándose nas comparsas de 4º ESO, participando de xurado e tamén de público. No Otero sabemos que o traballo en conxunto é o mellor antídoto contra toda esa serie de prexuízos relacionados coa idade. Un ano máis dicimos: "Fóra idadismos!"
Pero iso non foi todo... Co obxectivo de darlle a coñecer ao alumnado as figuras do noso Entroido máis tradicional, este ano visitou o centro... un FELO de Maceda! O felo percorreu as aulas do Otero Pedrayo co seu tocar de chocas, meténdose coa rapazada e chamándoa á festa; tamén nos acompañou no desfile. Grazas á Asociación de Felos da Corga da Serra por conservar e espallar esta tradición tan rica da nosa terra.
Polo demais, moita, moita música, baile e diversión:
- Batalla de coreografías de 1º BAC, cun nivelón fóra de serie. 1º BAC A, B, C, D, E e F pelexaron polo tan prezado 1º posto nun concurso de baile que nos deixou a todos coa boca aberta...
- Na ESO non baixou o listón! Un ano máis, TODOS os grupo de todos os niveis da ESO (15, nada menos!) participaron no desfile-concurso escollendo un disfraz para a clase, unha presentación e unha coreografía, con todo o que iso implica de negociación, cesións, empatía etc. Todo un éxito que se reflectiu na pista.
- E aínda quedaba unha última sorpresa: a córeo grupal de toda a ESO máis profesorado, capitaneada por Xiana Gómez, de 2º BAC. Profes e alumnos bailando, compartindo, disfrutando e tecendo lazos máis estreitos. De verdade que foi espectacular.
Dicía Anxo Cid, profe de EF, que o mantemento das dinámicas cooperativas no centro son sinónimo de boa convivencia e bo funcionamento. Así o cremos e por ese traballo en equipo apostamos e seguiremos apostando.
Grazas Anxo, grazas Eduardo Iglesias, grazas Pablo Fernández (dpto. EF) pola perfección do voso traballo.
Un ano máis e grazas ao Proxecta "Por 365 días de respecto e igualdade", o alumnado do IES Otero Pedrayo puido gozar da sempre marabillosa interpretación de Estíbaliz Veiga en "Mozas na rede", unha peza na que a actriz lle dá vida a diferentes rapazas que sufriron Gooming, un problema que, por desgraza, medra día a día na nosa sociedade.
"Mozas na rede" debería ser un espectáculo obrigatorio para a nosa rapazada; é necesario coñecer as diferentes formas de acoso nas redes para así poder recoñecelas e combatelas.
IES OTERO PEDRYO. ENSINO PÚBLICO ENSINO DE CALIDADE.
Esta semana alumnas de 4° da ESO e 1 °BAC asistiron ás Tertulias do Liceo. O martes 23, celebramos unha animada Tertulia cos compañeiros do IES O Couto e o IES Ferro Couselo.
Os logros e retos dos dereitos das mulleres, a educación transformadora e a memoria foron os temas aos que nos achegou a obra As Alumnas de Paula Carballeira, premio Nacional de Teatro 2023. A autora conversou co alumnado, riu, asinou libros e mostrou a súa alegría polo encontro, na xornada do mércores 24.
Un luxo de actividade, organizada polo Concellería de Educación e a Deputación, á que lle desexamos longa vida!
IES OTERO PEDRAYO. ENSINO PÚBLICO. ENSINO DE CALIDADE
Onte, a prensa local facíase eco da fantástica presentación da tradución ao galego d´O libro das marabillas, de Marco Polo, que tivo lugar no IES Otero Pedrayo. Todo unha festa na que as persoas asistentes acudimos caracterizadas de cidadáns/ cidadás do vasto imperio mongol, na que gozamos coa magnífica presentación da tradutora, Maite Jiménez, e na que non faltou complicidade, risas e, por suposto, o espectacular viño traído directamente da corte do Gran Khan. Marabilloso o `libro das marabillas´!
IES OTERO PEDRAYO, ENSINO PÚBLICO, ENSINO DE CALIDADE
Co obxectivo de espallar os valores da democracia entre a xente moza (neste caso, o alumnado de 4º ESO), onte visitaron o noso centro Roberto Castro García, Pablo Xabier López Vidal e Xosé Francisco Ferreiro Abelleira, ex-parlamentarios de diferentes cores políticas. O acto comezou cunha pequena exposición de cada un relativa ao parlamento para, a continuación, darlle paso ao alumnado para que fixera as preguntas que estimara convenientes. E moitas houbo!
Esta actividade complementa a visita ao Parlamento e Xunta de Galicia dos nosos rapaces e rapazas xa fixeran en 1º ESO.
IES OTERO PEDRAYO. ENSINO PÚBLICO. ENSINO DE CALIDADE.