03.11.2023

Coma todos o anos, dende o IES Río Cabe festexamos o Samaín e para iso, en colaboración coa Biblioteca do instituto e coa profesora Flor, decidimos que a temática deste ano sería "Día de Mortos en México". Foi todo un éxito!

As actividades propostas para ese día foron, á parte dos disfraces, unha actuación musical da man da nosa alumna Ariadna de 2º Bacharelato acompañada do profesor Xurxo, ambos os dous amenizáronnos interpretando a canción "La llorona" de Chavela Vargas.

A continuación, o alumnado de 1º ESO e 2º Bacharelato visualizaron unhas curtas de medo na Biblioteca, cómpre destacar que unha delas está protoganizada por alumnas do IES e gravada no centro. Terrorificamente espectaculares!

Moitas grazas a todas e a todos por colaborar e ata a próxima festa!

Pica AQUÍ para ver a galería de imaxes.

Outubro 2023

No IES Río Cabe estamos inmersos na semana do Samaín e para iso o alumnado decorou a súa aula de acordo con esta festividade, este ano a temática é Día de Mortos en México.

Temos no IES Río Cabe grandes artistas!

Pica AQUI para ver a galería de fotos das aulas decoradas.

Bo Samaín!

31.10.2023

O 31 de outubro de 2023 antigo e actual profesorado do IES Río Cabe reuniuse para despedir do noso centro a dúas docentes que marchan del: Eva (profesora de Música) e Consuelo (Orientadora). No restaurante Manuel Bistró de Monforte de Lemos, riocabenses reunímonos para desexarlles moita sorte na nova etapa que comezan a dúas grandes profesionais que pasaron no centro case 20 anos.

Isto non é un adeus é un ata a próxima.

Moitas grazas por todos os momentos compartidos, Eva e Consuelo! 

Xa formades parte da gran familia riocabense.

Pica AQUÍ para ver a galería de fotos. 

O pasado sábado 29 de outubro de 2023 no Parador de Monforte de Lemos a alumna Noelia Rodríguez  do Ciclo Superior de Guía, Información e Asistencia Turística do IES Río Cabe acadou o terceiro premio do  IX Concurso de Proxectos Empresariais Semente Ribeira Sacra, valorado en 4000 euros. 

O seu proxecto chámase Bikarte e consiste  nunha empresa de alugueiro de bicicletas con servizo de visitas guiadas a través dunha App que nos permite coñecer roteiros diferentes con contido cultural, patrimonial, artístico e natural. 

Bikarte pretende posicionarse no mercado de Turismo Activo a nivel nacional e internacional e ser un referente de empresa sostible e responsable co medio ambiente na Ribeira Sacra respondendo á necesidade de mobilidade alternativa ó transporte motorizado tradicional.

O proxecto de Noelia estase convertendo en realidade, grazas á campaña de divulgación que a Asociación Semente de Monforte desenvolve nos Institutos de secundaria e nas universidades galegas. A asociación vai celebrar unha década incentivando proxectos empresariais para dinamizar e innovar no medio rural. Co Concurso de Proxectos Empresariais Semente Ribeira Sacra, a asociación, que engloba a Universidades, Empresas, Administracións e particulares, quere axudar a emprender esas ideas innovadoras que poden mellorar a nosa calidade de vida.

Parabéns a Noelia Rodriguez, ó alumnado do Ciclo Superior de Guía, Información e Asistencia Turística do IES Río Cabe, as súas profesoras e a Asociación Semente Ribeira Sacra polo traballo realizado.

Máis información do Concurso de Proxectos Empresarais Semente Ribeira Sacra en:

https://www.sementeribeirasacra.org/

Dende o IES Río Cabe en colaboración co Departamento de Educación Física póñense en marcha os recreos activos con voleibol e retos de calistenia.

Distribución semanal:

Voleibol: martes e xoves

Retos de calistenia: venres

Inscricións: na conserxería ata o 3 de novembro

Recordade que todos os equipos deberán presentarse no pavillón o 6 de novembro ás 11:15 h.

Animádevos e recordade: mens sana in corpore sano! 

26.10.2023

O 26 de outubro o alumnado de 4º ESO e 1º Bacharelato, coa axuda das súas profesoras Anuncia López e Nuria Mariño, elaborou unha serie de pancartas en varios idiomas: galego, ucraíno, castelán... en apoio á paz do mundo e ao respeto dos pobos.

Vaia dende aquí o noso pequeno xesto solidario coa esperanza de que os conflitos que a día de hoxe seguen activos cesen para poder vivir nun mundo libre e sen guerras.

25.10.2023

Dentro do programa "Charlas-coloquio sobre o Parlamento de Galicia" o 25 de outubro o alumnado do IES Río Cabe de 4º ESO recibiu ás exdeputadas Julia Rodríguez Barreira (PP) e María Xosé Vega Buxán (BNG) -exalumnas do noso centro educativo- xunto co exdeputado Miguel Ángel Fernández López (PSdG).

Presentados pola profesora Pilar López e moderando o relatorio a profesora Ana Otero, os tres exmembros do Parlamento de Galicia fixeron cadansúa presentación sobre o traballo que se desenvolve no Parlamento e o labor que o seu grupo político levou a cabo durante o seu período como deputadas.

O alumnado fíxolle preguntas do máis interesantes e variadas sobre a institución representativa do pobo galego que os tres responderon amplamente.

Dende o IES Río Cabe queremos agradecer a súa visita e felicitar ao Parlamento de Galicia pola grande importancia deste tipo de actividades que mostran e espallan os valores da democracia entre a xente moza. 

Pica AQUÍ para ver a galería de fotos.

23.10.2023

Nesta primeira xornada micolóxica do Río Cabe o alumnado de 1º ESO, acompañado das súas profesoras Raquel Seoane e Nuria Mariño, foi testemuña da grande exuberancia dos montes da bisbarra monfortina.

A asociación micolóxica da propia vila, os Lactouros, foi a encargada de impartir unha breve formación e de acompañarnos na saída de campo que tivo lugar en Bóveda ao longo da mañá deste pasado 23 de outubro. Mais non só iso, senón que tamén fixemos partícipe dos nosos achados a toda a comunidade educativa a través da exposición que dispuxemos na entrada, na que se poden ver as diferentes especies cos seus respectivos nomes científicos, así coma unha recollida da gran diversidade de nomes existentes para referirse aos cogomelos, cantigas e refráns asiciados aos mesmos, et. na que, por certo, debedes participar!

Moitas foron as especies das que recollemos exemplares, dende amanitas ata linguas de vaca, e malia non termos atopado os ben apreciados boletos ou níscalos, prometemos volver ao monte na súa procura porque, agora si, somos quen de identificalos grazas aos nosos novos amigos de Lactouros.

Pica AQUÍ para ver a galería de fotos.

20.10.2023

O venres 20 de outubro o alumnado de 2º de BACH. de Relixión e Historia da Arte, acompañados das súas profesoras Fina Vázquez, Ángeles Vázquez e Ana Otero, fixeron unha visita ao Museo de Arte Sacro das Clarisas de Monforte de Lemos, o segundo máis importante de España.

Foi fundado no S.XVII polo VII Conde de Lemos e a súa muller Catalina de la Cerda, filla do duque de Lerma, tras regresar de Nápoles, onde Pedro Frenández de Castro foi Virrei

A visita foi do máis proveitosa, alí puidemos ver toda unha colección de relicarios, a maior parte do S.XVII (un dos cravos da cruz de Cristo, unha espiña da coroa, un fragmento de madeira da cruz...), así como obxectos litúrxicos (custodias, cálices, casullas, estolas, etc...), dous Ecce Homo, etc.

O que máis chamou a atención foron, entre outras cousas, unha réplica da cabeza de San Xoan Bautista e, sobre todo, a escultura do Cristo Xacente, feita en madeira policromada e obra do artista galego barroco Gregorio Fernández (Sarria).

Pica AQUÍ para ver a galería de fotos.

20.10.2023

O venres 20 de outubro, un grupo de ex alumnos visitou o instituto para compartir as súas traxectorias académicas e profesionais cos estudantes de 1º de Bacharelato. Neste caso, os relatores foron Carlos Ingunza, enxeñeiro en Organización Industrial, quen actualmente traballa como consultor nunha empresa en Madrid. Hugo Morales e Pablo Pérez, ambos os enxeñeiros en informática; Hugo traballa nunha empresa galega desenvolvendo aplicacións para móbiles, mentres que Pablo traballa no ámbito da banca en Chicago. Por outra banda, Rocío Álvarez-Cedrón, unha enxeñeira en telecomunicacións a pesar de non ser exalumna do instituto, veu proprcionar unha perspectiva valiosa nun campo tradicionalmente masculinizado. Rocío tamén traballa en Chicago, pero no seu caso para unha coñecida empresa de telefonía móbil.
 
Durante a actividade, os enxeñeiros brindaron información sobre os seus estudos, como elixiron as súas respectivas carreiras e como progresaron nos seus campos profesionais. Os estudantes de bacharelato tiveron a oportunidade de facer preguntas e obter consellos sobre as súas futuras eleccións académicas, así como comprender a importancia da diversidade de xénero e o traballo en equipo no ámbito laboral. Esta actividade proporcionoulles unha visión realista e motivadora das posibilidades educativas e profesionais que lles esperan despois de graduarse.

Moitas grazas por volver ao que foi a vosa casa. Desexámosvos moita sorte e moitos éxitos!

Agradecementos a Laura Cortiñas, PT do IES Río Cabe e exalumna do noso centro pola organización.

 A actividade enmárcase dentro do ciclo de relatorios de exalumnas e exalumnos do IES Río Cabe que volven ao centro para contarnos as súas experiencias académicas e profesionais.

Pica AQUÍ para visualizar a galería de imaxes.