IES Río Cabe

  

Benvido á web do IES Río Cabe. Desde esta páxina inicial podes acceder aos diferentes bloques de contidos que se ofrecen. Nela ofrécese puntualmente toda a información que resulte de interese para toda a comunidade educativa.

Así mesmo, na Aula virtual, os departamentos irán actualizando o seu material didáctico.

Concurso de oratoria, de regueifas e recitado poético

O venres 12 disfrutamos dunhas actividades moi variadas no Salón de actos:

En primeiro lugar, fíxose a final do Concurso de oratoria de 1º ciclo. A proposta goza de grande éxito no centro dende hai varios cursos e está organizada por Normalización Lingüística.

Velaquí algúns deses momentos de imaxinación, improvisación de historias a partir dunha palabra escollida ó azar:

O xurado, composto por 2 profesores e 2 alumnos, decidiu que os gañadores foran:

-Efrén López Zarauza

-Fernando García Fernández

-Gael Mariño González 

En segundo lugar, un grupo de alumnos de 2º ESO puxo en práctica o aprendido no Obradoiro de regueifas no que participara hai meses. Regueifas que tiveron temática diversa e que dirixiron a outros grupos e compañeiros.

Por último, para finalizar, o alumno de 1º ESO Sergio López Rodríguez recitou un poema e as 4 rapazas que participaron o pasado sábado no Concurso poético "Rosalía sempre viva" na Casa-Museo Manuel María (África Cobo, Zeltia Pérez, Sandra Rodríguez e Lucía Rodríguez) deleitáronnos co recitado de diversos poemas de Rosalía de Castro.

 

Grazas pola vosa activa participación nas diversas propostas!

Obra de teatro "Golpes"

O 10 de abril levouse a cabo a representación do espectáculo "Golpes" por parte da compañía de teatro Aantena para o alumnado de 1º e 2º ESO e PMAR.

O espectáculo forma parte do programa "Por 365 días de respecto e igualdade" do Plan Proxecta.

Golpes busca que os espectadores identifiquen os índices sociais de desigualdade latente entre homes e mulleres así como as diferentes formas e caras da violencia de xénero.

Á represemtación acudiron tanto o noso Inspector de educación, Íñigo Barreiro, como a Secretaria Xeral de Igualdade Susana López Abella.

Ao finalizar, tanto eles como o noso Director e a protagonista da obra reflexionaron cos estudiantes sobre a trama e as situacións semellante que acontecen na vida real.

Aquí vos deixamos unhas fotos do acontecido e un enlace para que saibades máis tamén sobre a actriz Estíbaliz Veiga.

 

 

OLIMPÍADA NACIONAL DE ESTATÍSTICA 2019

No presente curso escolar dous equipos de alumnado do IES Río Cabe presentaron traballos na fase nacional da Competición Estatística Europea organizada polo INE (Instituto Nacional de Estatística). Un deles na modalidade de Bacharelato e o outro na modalidade de ESO.

En Bacharelato, Alejandro García Rodríguez e Lucía Rodríguez Abellano chegaron á segunda fase sendo un dos poucos equipos, da súa categoría, que logrou superar varios tests de coñecementos estadísticos coa puntuación final máxima de 100 puntos.

Para a segunda fase elaboraron a seguinte presentación, pero debido a competencia e ao bo facer dos rivais non conseguiron que o seu traballo quedase entre os 5 finalistas.

Na ESO,  Andrea Ferreiros Sánchez e Marina García Blanco acadaron a segunda posición na fase nacional da Competición Estadística Europea, (Sétima edición da "Olimpiada de Estadística"), sendo o equipo da Comunidade Autónoma de Galicia que logra a mellor posición nas sete edicións celebradas desta Olimpíada.

Andrea e Marina tiveron que superar 2 probas. A primeira delas consistiu en superar varios test de coñecementos estatísticos e na segunda proba tiveron que realizar un estudo estatístico sobre a inserción laboral dos titulados universitarios, que podedes descargar e ver a continuación:

A fase nacional da Competición Estatística Europea está organizada polo Instituto Nacional de Estatística (INE), a Sociedade de Estatística e Investigación Operativa (SEIO) e a Facultade de Estudos Estatísticos da Universidade Complutense de Madrid (FEE). Entre os obxectivos deste concurso podemos destacar que trata de promover a curiosidade e o interese pola estatística entre o alumnado, así como o traballo en equipo e a colaboración para conseguir logros comúns.

Esta é a sétima edición na que se celebra a Olimpíada de Estatística Nacional e a segunda vez a nivel Europeo. Pode consultarse a clasificación final e os traballos premiados na páxina web do INE: http://www.ine.es/esc_es/esc_premiados.htm

A linguaxe nas relacións humanas "Por 365 días de respecto e igualdade".

Dentro do programa "Por 365 días de respecto e igualdade" do Plan Proxecta, as profesoras Sonia Sánchez e Carmen Quiroga estiveron traballando a importancia da linguaxe nas relacións humanas, sobre todo nas relacións de parella. Para iso empregaron a imaxe da autora Pirusa na que analizaron as frases despectivas empregadas para substituílas por outras positivas.

Nas fotos anteriores resúmese a actividade realizada en 2 e 3 de PMAR.

Palabras de muller na Casa-Museo Manuel María

 

Catro alumnas do IES Río Cabe encheron de cor a chuviosa tarde do pasado sábado 6 de abril participando na fase final do concurso “Rosalía sempre viva” celebrado na Casa- Museo Manuel María en Outeiro de Rei,  porque como ben dixo Leonardo Da Vinci  “a pintura é poesía muda; a poesía pintura cega”.

 As alumnas participantes foron seleccionadas no concurso “Poetízate no IES Río Cabe” que se celebrou para conmemorar o Día da Poesía o 21 de marzo. Así, África Coba Albo recitou “Quixente tanto meniña”, Zeltia Pérez Barrientos púxolle voz a “Negra sombra”, Sandra Rodríguez Macía atreveuse con “Adiós ríos, adiós fontes” e Lucía Rodríguez Abellano interpretou “Meniña, ti a máis fermosa”.

A actividade enmárcase dentro da programación que leva por título “Palabras de muller” que se está desenvolvendo nesta 2ª avaliación dentro do Plan Proxecta Donas de si. Deste xeito, con este recitado no que amosaron as súas escondidas dotes brindamos unha pequeña homenaxe, cargada de moitas horas de memorización e ensaios, a unha das figuras máis representativas da literatura contemporánea.

¡Grazas polo voso entusiasmo e esforzo, xa que nos demostrastes que a poesía estará sempre viva!

Participación nas Olimpíadas de textos clásicos latinos e gregos

7 alumnas do IES Río Cabe asistiron á V Olimpíada de Tradución de Textos Clásicos Latinos e Gregos celebrada este xoves 4 de abril na facultade de Filoloxía de Santiago de Compostela. Traduciron textos de Xenofonte, Platón, Eutropio e Fedro, dun nivel e extensión propio dun nivel universitario. A do Río Cabe  foi unha asistencia das máis numerosas,de 1º e 2º de bacharelato, que fixeron bo aquelo de LABOR OMNIA VINCIT (O traballo vence todas as dificultades). Moita sorte a todas.

Viaxe a Francia

Algúns alumnos de 3º ESO, 4º ESO e 1ºBAC emprenderon onte mércores a viaxe de intercambio a Francia. Conxuntamente viaxan con alumnado do  IES A Pinguela.

Hoxe foi o seu primeiro día en Francia. Visitaron Angoulême e fixeron unha pequena parada antes da chegada prevista a Châtellerault (sobre as 17:00h).

E nesta imaxe os vemos hoxe venres no parque de Futuroscope:

 Nestas fotos móstrannos o Château de  Rivau, despois da súa visita pasearon pola cidade de Richeleu. Din que a viaxe está sendo espectacular.

 

 

Hoxe, martes, estiveron na Manufacture de Châtellerault

E en Poitiers:

 

Hoxe mércores 10 xa están de camiño a Paris, despois de despedirse dos seus compañeiros franceses.

 En París visitaron Montmatre e o Museo do Louvre, Place Concorde... como podedes ver neste collage:

 A piques de rematar esta fermosa experiencia... Que mellor maneira de facelo que visitar o mundo máxico de Disney?

 

Xa se poden recoller os títulos coas taxas pagadas no ano 2017

Xa están dispoñibles na Secretaría do centro, para a súa retirada, os títulos pagados (con independencia de cando se finalizaron os estudos) en 2017 e outros anos anteriores.

Cando cheguen novos títulos, publicarase nesta web e comunicaráselle ao alumnado solicitante por correo postal.

A persoa interesada pode pasar a retirar o seu título provista do D.N.I.

No caso de non poder facelo persoalmente, pode autorizar a outra persoa, que deberá exhibir:

  • o seu D.N.I.,
  • un escrito de autorización, onde debe figurar o nome e apelidos da persoa autorizada xunto co seu número de D.N.I. e deberá presentarse, inescusablemente, asinada pola persoa que autoriza.
  • unha fotocopia do D.N.I. do alumno/a que autoriza a retirar o seu título.

O horario de atención da Secretaría deste centro é de Luns a Venres de 9 a 14 horas.

Obradoiro e explicación da Exposición "Cartas de amor"

Como xa sinalamos nunha entrada anterior, o pasado 26 de marzo acudiu ó centro Laura Vilaboy Romero (educadora social) para traballar co alumnado de PMAR a partires da Exposición "Cartas de amor".

Aquí están os alumnos reflexionando con Laura.

A actividade enmarcase no Plan Proxecto dentro do Programa "Por 365 días de respecto e igualdade"

Distribuir contido