SOMOS VEDRA

Catorce rapaces e rapazas de 1º, 2º e 3º de ESO participaron nun obradoiro de radio que se desenvolveu no centro  educativo entre o 27 de setembro  e o 6 de outubro.

O proxecto de radio Somos Vedra do que o alumnado foi protagonista incluíu entre as súas actividades  a realización de dúas reportaxes. Na primeira, a pé de rúa e coa cabeceira ORGULLOSOS DE VEDRA, recolleuse a opinión da veciñanza  e na segunda, sobre o Río Ulla, Manuel Suárez deu a coñecer a pesca tradicional no Río Grande.

Os rapaces tamén tiveron a ocasión de elaborar  diferentes cuñas publicitarias con base en elementos singulares do concello, rexistrar sons propios de Vedra, informar sobre festas e festexos que se celebran ao longo do ano, así como da axenda cultural vedresa.

A entrevista xirou arredor do proxecto Vedra medr@. Catro alumnos de 1º de ESO foron os encargados de preguntar  á coordinadora  do proxecto gañador do Premio Proxecto Didáctico A. Fraguas 2016-17,  Xulia Marqués, sobre as liñas de actuación e programación prevista para este curso no CPI de Vedra.

O galardoado Vedra medr@ é un proxecto de valorización do patrimonio inmaterial de Vedra que ten como obxectivo prioritario dar a coñecer os nomes de lugar e as lendas da contorna.

Co proxecto preténdese que o alumnado coñeza o patrimonio que alberga o seu concello, que o recoñeza como propio e que desfrutándoo no presente  cheque a comprometerse  na súa defensa e conservación para o futuro.