Primeiro foron os beebots, despois os mbots e agora os robobos. A familia de robots do CEIP de Sigüeiro segue medrando e con elas as actividades e os retos por resolver. Nesta ocasión tocoulle ao alumnado de 2º e 3º de Primaria (tamén pasarán os de 1º) que se inician na robótica grazas á liña "Mellora do nivel de coñecementos para acadar a excelencia" dos Contratos-Programa. Coa axuda de Fran Bellas, profesor da Universidade da Coruña, e tamén de alumnado da Facultade de Ciencias da Educación da Universidade de Santiago de Compostela, conseguiron levar a cabo retos cos robobos nos que tiveron que medir ángulos, calcular distancias, facer xiros... Impresionante, verdade? 

Máis fotos no seguinte álbum:

Álbum: Curso 2017 - 2018 -> Robótica (E. Primaria)

Hoxe estivo con nós Beatriz, do Consello Regulador do Mel de Galicia. Estívolle falando aos nenos e nenas sobre as abellas, as colmeas e o mel. Ao final, ata nos agasallou cun botiño de mel e un globo. Que interesante!

Moitas grazas por vir ao CEIP de Sigüeiro e contarnos todas estas cousas.

Máis fotos no seguinte álbum:

Álbum: Curso 2017 - 2018 -> Charla: As abellas e o mel

Os alumnos/as de 4º crearon uns labirintos moi orixinais usando diferentes materiais. Neles agóchase o tan temido Minotauro. Logrará o valente Teseo saír do labirinto coa axuda do novelo de fío que lle dou Ariadna? Podedes comprobar este dato e moitos máis na seguinte actividade.

Hoxe o alumnado de 4º asistiu á representación teatral "O conto da Azuzaina" da compañía Limiar no Teatro Principal. Todas as fotos no seguinte álbum:

Álbum: Curso 2017 - 2018 -> Teatro "O conto da Azuzaina"

Posto que non podemos saír ao horto, hoxe os nenos e nenas de 3º decidimos plantar chícharos na clase. Para isto reutilizamos os envases das leitugas.

Enchemos os envase de terra...

Puxemos un chícharo en cada un...

Cubrimos con máis terra e regamos.

Agora só queda agardar a que medren!

O pasado venres, o alumnado de 3º de Primaria desprazouse ata o Auditorio de Galicia, en Santiago de Compostela. Alí, asistirían á narración do conto "La historia extravagante de Hipo y Gavante" musicado pola Banda Municipal de Santiago. Pasámolo pipa!

Álbum: Curso 2017 - 2018 -> Concerto didáctico: Hipo e Gavante

Hoxe recibimos unha visita moi especial no noso cole, a de Rosa Aneiros, autora do libro A batalla da pequena Chañan Curi Coca, que estivemos lendo os/as alumnos/as de 4º de primaria.

Contounos que para escribir o libro se inspirou nunha historia real dun desafiuzamento, ao que sumou personaxes da guerreira inca Chañan, historia que coñeceu nunha viaxe a Perú. 

Fixémoslle moitas preguntas e asinounos o seu libro. Podedes ver as fotos no seguinte álbum:

Álbum: Curso 2017 - 2018 -> Rosa Aneiros

Este venres, parte do alumnado do CEIP de Sigüeiro achegouse ata a oficina de Correos da vila para non esquecerse dunha tradición propia desta época do ano e que, coa chegada das novas tecnoloxías, está quedando en desuso. Trátase do envío de postais de Nadal.

Previamente na aula, o noso alumnado preparou cadansúa felicitación de Nadal, colocouna nun sobre escribindo o destinatario e o remitente e pegou o selo correspondente. Xa na propia oficina, depositaron os sobres nun buzón especialmente preparado para a ocasión. Os seus desexos para este Nadal chegarán próximamente aos seus destinatarios.

Álbum: Curso 2017 - 2018 -> Entrega de postais en Correos

Hoxe o alumnado de 3º de Primaria, asistiu á representación teatral "Rubicundo" no teatro da Fundación Abanca de Santiago de Compostela. Unha historia sobre a amizade, a constancia e a poesía que nos fai perseguir os nosos soños.

Máis fotos en Galería de Imaxes

Este venres, 3 de novembro, o alumnado de 4º, 5º e 6º de Primaria desprazámonos a Santiago para asistir a unha exposición de arte e a unha obra de teatro na Fundación e no Auditorio A Banca.

Na exposición, aprendemos que a arte se manifesta de moitas formas diferentes, que coa aparición da fotografía a arte comezou a explorar o abstracto, que moitas obras que a primeira vista semellan abstractas en realidade non o son ou o que nos transmiten as diferentes cores dunha obra. Tras recorrer as súas salas e observar cadros de diferentes pintores, chegou o momento de converternos en artistas e compoñer poemas visuais con imaxes do día a día.

Máis tarde desprazariamonos ao Auditorio, onde asistiriamos a representación dunha obra de teatro na que o seu protagonista, Teo, nos ensinou como afrontar os problemas do día a día grazas aos mitos gregos de Teseo e o minotauro, Narciso e o seu reflexo, as aventuras de Hércules ou as ás de Ícaro. Pero o que máis nos gustou foi cando os actores se converteron en rapeiros e cantaron arrancando os aplausos de todos nós.

Foi moi divertido! Máis fotos na Galería de Imaxes.