A presidenta do Instituto Galego de Consumo, Sol Vázquez, e o director xeral de Educación, Formación Profesional e Innovación Educativa, Manuel Corredoira, entregaron hoxe os premios da fase autonómica do certame escolar de consumo responsable Consumópolis. No acto, ambos salientaron a importancia do ensino e da formación para a protección dos dereitos dos consumidores e usuarios, e apuntaron que iniciativas coma esta permiten avanzar de forma efectiva na educación para o consumo, convidando aos escolares á reflexión utilizando como medio a creatividade e as TIC.

Así mesmo, Sol Vázquez, presidenta do IGC e directora xeral de Comercio, apuntou a aposta decidida da Xunta de Galicia polo proxecto educativo que está a desenvolver a Escola Galega de Consumo, que proporcionou formación directa a máis de 12.000 persoas en 2012 a través dos distintos programas que pon en marcha ao longo do ano.

Máis de 1.200 escolares galegos de primaria e secundaria participaron este ano en Consumópolis, coordinado en Galicia polo Instituto Galego de Consumo, dependente da Consellería de Economía e Industria, en colaboración coa Consellería de Cultura, Educación e Ordenación Universitaria, o que supón duplicar a participación da anterior edición. Este ano a participación fíxose principalmente, de xeito coordinado, a través do Plan Proxecta. Polo tanto, e tal e como salientou o director xeral, os oito centro premiados son participantes neste plan coordinado pola Consellería de Cultura, Educación e Ordenación Universitaria.

Tras completar a primeira etapa, consistente nun percorrido dun xogo on-line sobre consumo responsable e calidade de vida, preto de 190 equipos de toda a comunidade traballaron na segunda fase do certame, que este ano chega a súa oitava edición baixo o lema “Adéstrate ben para un consumo responsable”.

Cada un dos equipos elaborou un traballo en grupos de cinco coordinados por un docente, relacionando consumo e deporte, con temas como a compra de materiais deportivos ou os valores do deporte e o consumo responsable. No caso do alumnado de primaria, o proxecto consistiu nun calendario escolar, mentres que o alumnado de secundaria elaborou un cartel con viñetas.

Na fase autonómica establecéronse tres categorías por idades, concedéndose premios para os 3 mellores traballos de cada categoría dotados con 1.000, 600 e 300 euros, que poderán empregar para actividades ou material pedagóxico. Os gañadores representarán a Galicia na fase nacional, organizada polo Instituto Nacional de Consumo. Na categoría de 3º ciclo de primaria clasificouse en primeiro lugar o CEIP Lourido, de Poio (Pontevedra), seguido polo CEIP Santa Rita de Galdo (Viveiro, Lugo), e o CEIP Froebel de Pontevedra. No que respecta á categoría de 1º e 2º curso de ESO, o primeiro clasificado foi o IES Francisco Daviña Rey de Monforte de Lemos, e o IES Carlos Casares de Vigo e o CPI Ramón Piñeiro de Láncara (Lugo) recibiron o segundo e o terceiro premio, respectivamente.

Na categoría de 3º e 4º da ESO, clasificouse en primeiro lugar o IES Manuel García Barros, da Estrada, mentres que o CPR Plurilingüe Abrente de Portonovo quedou segundo e o IES As Barxas de Moaña se clasificou en terceiro lugar.

Os escolares galegos son dos que en máis ocasións foron gañadores dos premios nacionais en distintas categorías, o que amosa a gran preparación do alumnado galego e a gran labor desenvolvida neste ámbito desde o Instituto Galego de Consumo, que forma parte desde o seu inicio do equipo de traballo a nivel nacional que desenvolve a estrutura pedagóxica do certame. Coa posta en marcha desta iniciativa a Xunta continúa a traballar na mellora da formación dos máis novos en consumo, co obxectivo de aumentar o coñecemento e a defensa dos seus dereitos neste eido.

A Consellería de Cultura, Educación e Ordenación Universitaria vén de dar un forte impulso ás webs do Centro Autonómico de Formación e Innovación (CAFI) e mais dos Centros de Formación e Recursos (CFR) da Coruña, Ferrol, Lugo, Ourense, Pontevedra e Vigo, coa introdución de novos contidos e funcionalidades, tarefa desenvolvida en colaboración coa Axencia para a Modernización Tecnolóxica de Galicia (AMTEGA). Coa incorporación destas novidades o departamento educativo da Xunta de Galicia converte os espazos en internet destes centros en referentes da formación do profesorado galego, webs que lles permiten aos docentes un acceso máis rápido á información para desenvolver o seu labor educativo.

Tras os cambios realizados, as páxinas do CAFI e CFR  facilitan aínda máis o acceso á información, tanto no relativo a novas relacionadas coa formación do profesorado, como aos centros nos que se imparte e aos plans de formación nas súas diferentes modalidades. Ademais faise máis sinxelo o acceso ás aulas virtuais, aos contidos orientados a cada área ou departamento, así como ao apartado no que se recolle unha análise de diferentes ferramentas online ou de descarga gratuíta que poden axudar aos docentes no seu labor educativo.

Así mesmo, na páxina de inicio móstranse as últimas cinco novas publicadas, un bloque de destaques con acceso a diferentes webs relacionadas co ámbito da formación e unha axenda actualizada dos cursos que se están a levar a cabo actualmente.

Formación e áreas

No bloque dedicado á “Formación” pódese acceder á oferta formativa en todas as súas modalidades e variantes, ás convocatorias, á relación das listaxes das actividades formativas que se van levar a cabo ao longo do curso escolar, etc. Ademais, na páxina web de cada CFR ofrécese información esencial de cada centro de formación: horario, localización, mapa de asesoría de centros delimitada por concellos, organigrama estrutural ou vídeos das instalacións, etc.

Por outra parte, no espazo “Áreas” e “Departamentos” o profesorado pode atopar información agrupada por temas: novas, recursos, actividades formativas ou destaques especializados.

Ferramentas

Dentro do apartado “Ferramentas” os docentes poden escoller, dentro dunha selección detallada, unha serie de recursos tanto online como instalables e ordenados segundo a súa funcionalidade.

Este banco irá medrando gradualmente, respondendo así aos intereses e necesidades de toda a comunidade educativa. Desta forma, búscase ofrecer non só a descrición da ferramenta, senón tamén o seu emprego didáctico, é dicir, orientar ao profesorado sobre o seu uso para integralo ao seu labor docente.

As webs son as seguintes:

CAFI: /portal/cafi

CFR Coruña: /portal/cfrcoruna

CFR Ferrol: /portal/cfrferrol

CFR Lugo: /portal/cfrlugo

CFR Ourense: /portal/cfrourense

CFR Pontevedra: /portal/cfrpontevedra

CFR Vigo: /portal/cfrvigo

A Consellería de Cultura, Educación e Ordenación Universitaria volve dar un impulso á formación dos docentes galegos no uso e posibilidades didácticas das novas tecnoloxías da información e comunicación a través da I Xornada de Coordinadores e Coordinadores do proxecto Abalar. Este encontro, organizado polo Centro Autonómico de Formación e Innovación (CAFI) reúne hoxe no Pazo de Congresos de Santiago de Compostela a máis de 300 profesoras e profesores. O obxectivo é avanzar nas posibilidades deste proxecto, unha aposta da Consellería pola mellora do ensino a través da introdución das novas tecnoloxías da información e a comunicación (TIC), conforme aos novos tempos. o Abalar contribúe, ademais, a impulsar a igualdade de oportunidades dos escolares no acceso a estas tecnoloxías, con especial atención á introdución das mesmas nas zonas rurais.

O director xeral de Educación, Formación Profesional e Innovación Educativa, Manuel Corredoira, inaugurou esta xornada salientando que o Proxecto Abalar - impulsado pola Consellería de Cultura, Educación e Ordenación Universitaria e a Axencia para a Modernización Tecnolóxica de Galicia (Amtega)-  procura “a integración plena das TIC na práctica educativa en Galicia para acadar unha resposta integral e de futuro aos retos que presenta a educación do noso alumnado na sociedade dixital do século XXI, coordinando e impulsando un cambio de modelo educativo en Galicia apoiado na formación do profesorado e na modernización do ensino”.

A este respecto recordou que o proxecto busca “mellorar as competencias da comunidade educativa a través dunha estratexia global e integradora que contempla a modernización do ensino, a formación do profesorado, a dotación de equipamento nos centros educativos e o desenvolvemento e utilización de contidos e recursos dixitais”. Para iso, a Consellería está a dotar ao profesorado de contidos e recursos educativos dixitais, “facilitando o desenvolvemento de novos modelos pedagóxicos e a incorporación dos últimos avances tecnolóxicos na educación”, dixo. A través de xornadas como a celebrada hoxe, “queremos –engadiu-  aproveitar as mellores prácticas desenvolvidas nos centros, pondo en valor todo o traballo e coñecemento do profesorado galego, fomentando o espírito colaborativo e participativo dos docentes”.

O encontro forma parte do Plan Anual de Formación do Profesorado co que a Consellería favorece a actualización continua dos coñecementos e competencias dos docentes, buscando a máxima calidade do ensino en Galicia. Neste sentido o director xeral agradeceu aos asistentes “o esforzo, o interese e o compromiso que amosan tanto co seu traballo diario como coa súa implicación na formación e actualización constante”.

O Abalar en cifras

O Proxecto Abalar, que se puxo en marcha en 2010, beneficia xa a máis de 44.000 alumnas e alumnos de 533 centros escolares, o que significa que xa está implantado no 50% dos centros educativos galegos con educación primaria e secundaria obrigatoria. Estas alumnas e alumnos desenvolven a súa formación en aulas completamente dixitais, nas que empregan dispositivos tecnolóxicos na aprendizaxe.

Ademais, 15.000 alumnas e alumnos doutros 643 centros contan con kits de aula dixital que permiten a introdución e aproveitamento da tecnoloxía nos procesos de aprendizaxe.

Relatorios e obradoiros de experiencias

A xornada estrutúrase en relatorios e obradoiros de experiencias. Tras a inauguración, o programa da mañá continuou coa conferencia de Daniel Seseña arredor do uso das redes sociais e as posibilidades de internet no xornalismo, especialmente no caso da canle 24 horas de Televisión Española. O propio proxecto Abalar será o protagonista da ponencia do subdirector xeral de Ordenación e Innovación Educativa e Formación do Profesorado, Manuel Vila, e mais do director de Área de Solucións Tecnolóxicas Sectoriais da Axencia para a Modernización Tecnolóxica de Galicia, Carlos Vázquez; así como da posterior conferencia de Pablo Nimo, quen abordará a infraestrutura técnica e o uso do software libre nesta iniciativa. A mañá pecharase cunha mesa redonda sobre o presente e o futuro das ferramentas de autor e contidos dixitais.

O programa da tarde comezará coa celebración de tres sesións con tres obradoiros  de experiencias cada unha. Nelas, Feliciano José Couro, do colexio de educación especial Nosa Señora de Lourdes, afondará nas posibilidades das TIC para o alumnado con necesidades especiais de atención educativa; e Agapito Muñiz, do IES Sabón , abordará o uso do código QR. Pola súa parte, Elena Esperanza, do IES Poeta Díaz Castro, impartirá un taller de radio, mentres que José Manuel Durán e Luz María Beloso, do IES As Barxas, darán conta da súa experiencia no eido das TIC, que os levou a obter o premio de mellor iniciativa 2012 outorgado polo Instituto Nacional de Tecnologías Educativas y de Formación del Profesorado (INTEF).

Xa arredor do programa Abalar, Ramón Noche, do IES Xograr Afonso Gómez, presentará a súa experiencia de traballo coas novas tecnoloxías no eido das ciencias sociais; mentres que Eduardo Rafael Rodríguez e Juan José Varela, co CEIP Raquel Camacho, exporán a súa experiencia co Edmodo como ferramenta de integración das TIC na aula Abalar. Pola súa parte, Mª Jesús Casado, do IES Francisco Daviña Rey, tratará o valor engadido do libro de texto dixital, ao tempo que Luís Gómez, do CPI dos Dices, analizará as posibilidades dos vídeos educativos. Ademais, os asesores Abalar Alejandro González, Juan Menéndez, José Antonio Vicente e Manuel Ángel García debullarán nun obradoiro e nun relatorio os pormenores da rede social do profesorado Redeiras e mais do espazoAbalar, a plataforma web do proxecto.

A xornada rematará coa conferencia do xefe de servizo do Centro Nacional de Desenvolvemento Curricular en Sistemas non Propietarios (CeDeC), Miguel Ángel Pereira, tras a que se celebrará o acto de clausura.