Inspiraciencia é un proxecto da Unidade de Cultura Científica da Delegación do Consello Superior de Investigacións Científicas (CSIC) en Cataluña e o Instituto de Ciencia de Materiais de Barcelona, que consiste nun concurso de relatos curtos e microrrelatos de inspiración científica. É unha iniciativa que relaciona a ciencia e a literatura dunha maneira lúdica e participativa. A ciencia e a literatura recorren á creatividade para encarar novos retos e combinalas pode xerar novas e frescas ideas en direccións imprevisibles. Inspiraciencia pretende ser un espazo aberto a todo o mundo onde pensar e imaxinar a ciencia desde a ficción.

Os relatos curtos son narracións de ata 1500 palabras e os microrrelatos teñen unha extensión máxima de 500 palabras. O tema e o formato son libres, pero a ciencia debe estar presente.

Categorías:

• Público xuvenil: entre 12 e 17 anos
• Público xeral adulto: a partir de 18 anos

Os participantes deben rexistrarse e poden enviar como máximo dous relatos.

Modalidades:

• Relatos curtos: entre 800 e 1500 palabras
• Microrrelatos: ata 500 palabras

Os relatos poden estar escritos en catalán, en castelán ou en galego.

A data límite para publicar os relatos é o 10 de marzo de 2013.

Premios:

O concurso prevé un premio institucional para cada modalidade e categoría e tamén haberá un premio do público. Tanto os premios institucionais e do público poderán ser dispositivos electrónicos, libros de divulgación, cursos de escritura ou obradoiros similares, en función das posibilidades.

Paula Rodríguez Rivas; Alberto Ramos Fernández e Fernando Castro Prado foron os cualificados nos tres primeiros postos na VII fase autonómica galega da Olimpíada de Bioloxía.
Os tres estudantes do IES Plurilingüe Rosalía de Castro de Santiago de Compostela, serán os encargados de representar a Galicia na fase nacional da Olimpíada de Bioloxía, que se celebrará en Madrid entre o 7 e o 10 de marzo de 2013. Os 4 primeiros clasificados nesta competición representarán a España na Olimpíada Internacional de Bioloxía (IBO), que se celebrará en Berna (Suíza) entre o 14 e o 21 de xullo de 2013; mentres que os 4 seguintes o farán na Olimpíada Iberoamericana. Ademais, todos os participantes da fase nacional poderán realizar unha estadía de investigación dunha semana nun centro do Consello Superior de Investigacións Científicas (CSIC).

Acaba de publicarse o número 64 da Revista Galega do Ensino (EDUGA) nun formato dixital que ofrece a posibilidade de consultar documentación multimedia complementaria no corpo das súas páxinas.

O volume 64 (xullo-decembro 2012) recolle, nas súas diferentes seccións, experiencias innovadoras e de investigación que poden ser de interese para boa parte do profesorado.

Índice do número 64 (xullo-decembro 2012)

Experiencias

• A historia dun proxecto de innovación. Experiencia con biorreactores  (Mariano Pazos -coord.)

• A maxia na escola  (Fernando Domínguez Dapía) 

• Desde as cavernas ás estrelas  (Carmen Presedo)

Investigación

• TDAH na educación primaria: detección temperá e intervención na aula  (María  Fiuza)  

Foro

• Xestión das habilidades no contexto da aprendizaxe permanente (José Raposeiras)
• Entre Monarquía e Nación española: o esquecemento da Galicia soberana de 1808 (Manuel Mª de Artaza Montero) 

Opinión

• Dálle tempo ao neno (José Manuel Vázquez) 

Que é?

• O arquivo de Galicia (Gabriel Quiroga Barro)

A nosa escola

• A radio escolar. Aprender de xeito divertido (Carlos Sever Valverde)

Cartafol

• Os plans de formación permanente do profesorado en centros educativos (Ángel Rodríguez Sánchez)
• Campionatos de formación profesional (Mª Pilar Álvarez Martínez)
• Plan Proxecta (Julia Taboada Martínez e Alberto Sacido Romero)
• Educando para salvar vidas (Almudena Lacomba Maruri)
• A nós vainos o consumo responsable (Maribel Landeira Varela)

Actualidade

• Galicia
• España
• Europa (Emilia Seoane Pérez)
• Internacional

Lexislación  (Venancio Graña Martínez)

Entrevista

• Iago González Iglesias, realizador do filme Máscaras (Juan Granados)

Editorial  (Juan Granados)

Mediateca

O concurso "Xurxo Lobato" vai dirixido ao alumnado de Educación Secundaria, Bacharelato e Formación Profesional de Galicia.

Características técnicas:

• O tema é libre
• As fotografías poden presentarse en branco/negro ou cor
• Máximo tres fotografías por participante
• As fotografías serán en formato dixital e só se poderán enviar por correo electrónico

Premios:

• 1º premio: diploma e 250 €
• 2º premio: diploma e 150 €
• 3º premio: diploma e 100 €

Data de entrega: antes do 1 de abril de 2013.

O xurado considerará a posibilidade de conceder algún accésit, con regalo de lote de libros de fotografía.

Máis información no arquivo anexo.

Un grupo de nenos e nenas da Asociación de Altas Capacidades de Galicia (ASAC) obtivo o primeiro premio a “Mellor Curtametraxe” no certame nacional “¡No te cortes!”. Titúlase “Eclosión” e xurde dun obradoiro impartido polo director galego Carlos Seijo dentro das actividades da asociación.
O xurado quixo honrar co primeiro galardón do festival o reto que supuxo a creación desta peza curta. Trátase de tres historias nunha, gravadas por separado e en só 6 horas de cada parte, pero cun obxectivo común: cada historia posúe un ovo como detonante. O resultado radica nunha montaxe que bascula entre “short stories ao máis puro estilo dalgúns prestixiosos realizadores contemporáneos”, en palabras dos organizadores do festival. Así mesmo, tamén destacan o calado destas narracións que, a base de imaxinación e fantasía, evocan múltiples lecturas no espectador. Como colofón, o propio alumnado gravou con instrumentos musicais a banda sonora, acadando un clima e ambiente axeitados a partir dunha orquesta básica.
Como en edicións anteriores, o certame acadou unha gran participación, con pezas enviadas desde diferentes lugares de España, todas elas realizadas por nenos e nenas de menos de 18 anos e alumnado de menos de 22 anos matriculados en Educación Secundaria.
A entrega de premios realizarase na sede do FNAC na Castellana de Madrid.

ASAC é unha asociación sen ánimo de lucro que nace no ano 1995 e onde se desenvolve un Programa de Enriquecemento en colaboración cun equipo técnico formado por membros da Unidade de Atención Educativa en Altas Capacidades da Universidade de Santiago de Compostela (USC). Esta iniciativa extracurricular foi galardoada en 2009 cun accésit no certame “A USC crea, a USC innova”. Na actualidade, o programa conta con casi trescentos nenos e nenas –dividido en dezaoito grupos- que asisten a obradoiros de enriquecemento dous sábados ao mes na facultade de Psicoloxía e a facultade de Ciencias da Información en Santiago de Compostela.

O cine é un contexto que aglutina á perfección todo o espectro creativo deste alumnado con altas capacidades. Para elo, ao longo do curso 2011/2012 desenvólvese na ASAC o obradoiro de cine impartido polo director galego Carlos Seijo. Preténdese que o alumnado participe en case todas as tarefas: guión, debuxo de storyboard, rodaxe, son, banda sonora e montaxe. A actividade conta con tres grupos de entre 12 e 14 anos. O tempo límite é moi axustado: 6 horas ao trimestre para crear e gravar cada parte da curta. Na curtametraxe colaborou persoal en prácticas de apoio de Psicoloxía, voluntarios e outros membros do equipo vinculado ao programa.

Ligazóns de interese:

• Web da ASAC
• Curta en streaming

A Consellería de Cultura, Educación e Ordenación Universitaria acaba de publicar no Diario Oficial de Galicia (DOG) a convocatoria de 15 prazas para o primeiro proxecto de Formación Dual que se vai poñer en marcha en Galicia, en colaboración coa empresa Coremain. Así, iníciase un programa dirixido ao ciclo de grao superior en sistemas de telecomunicacións e informáticos cun plan de estudos de 2 anos e medio no que o alumnado compaxinará a súa formación no CIFP Politécnico de Santiago coa formación na empresa e cun contrato de traballo remunerado.

A convocatoria vai dirixida a persoas que cumpran os requisitos de acceso aos ciclos formativos, que teñan entre dezaseis e trinta anos e que non teñan realizado con anterioridade un contrato de formación e a aprendizaxe. Con carácter xeral, as persoas candidatas non poden estar –nin ter estado– matriculadas en ningunha ensinanza no presente curso académico, aínda que, de xeito excepcional, a Consellería poderá autorizar a matrícula no proxecto ás persoas aspirantes matriculadas en ciclos formativos polo réxime de persoas adultas.

As persoas interesadas en participar nesta iniciativa poderán presentar as súas solicitudes entre o día 21 e o 25 de xaneiro, as 13 horas, na secretaría do CIFP Politécnico de Santiago de Compostela. O centro fará pública a relación definitiva de persoas candidatas que cumpran os requisitos de acceso aos ciclos formativos. De entre elas, a empresa Coremain será a encargada de realizar a selección dos 15 estudantes que participen no proxecto que comezará a mediados do vindeiro mes de xaneiro.

Formación e traballo

O carácter diferencial da FP Dual consiste na combinación da formación curricular co traballo remunerado nunha empresa na que, ademais, o alumnado recibirá formación complementaria á establecida no currículo formativo correspondente, co fin de reforzar a súa preparación e mellorar a súa empregabilidade. Deste xeito, dos 2 anos e medio de duración do proxecto, o 21,7% desenvolverase no centro educativo correspondente, mentres que o restante se levará a cabo nas instalacións da empresa.

O proxecto terá unha duración total de 4.828 horas, das que 1.899  serán de formación e 2.929 horas serán de traballo efectivo. Ao longo dos dous anos e medio que dura o proxecto, o peso da parte correspondente ao traballo irá aumentando: do 45% do primeiro ano ao 72% do último curso.

No tempo de traballo efectivo na empresa o estudante terá un contrato de traballo para a formación e a aprendizaxe, de acordo co recollido no título II do RD 1529/2012, do 8 de xaneiro, polo que se desenvolve o contrato para a formación e a aprendizaxe e se establecen as bases da FP dual. Trátase dun contrato remunerado, polo que o traballador se acollerá, ademais, ao convenio colectivo da compañía e ás normas da mesmas en materia e normativa laboral. De feito, a retribución fixarase de acordo co estipulado no convenio colectivo, en proporción ao tempo de traballo efectivo que realicen.

Xa están a disposición de todo o profesorado os artigos que analizan os proxectos en acción presentados na Xornada de Formación Inicial do Plan Proxecta  e publicados agora na sección Cartafol do número 64 da Revista Galega do Ensino (EDUGA). As autoras, as profesoras Almudena Lacomba Maruri e Mª Isabel Varela Landeira, fan dúas propostas de traballo interdisciplinario, transversal e sempre centradas en estratexias activas e cooperativas entre o alumnado e o profesorado participante.

O primeiro modelo ofréceo Almudena Lacomba desde o IES Carlos Casares de Vigo (Pontevedra), ilustrado con produtos finais de imaxe e vídeo do traballo do alumnado participante na experiencia. O programa Salvavidas, da Consellería de Sanidade, ten como obxectivo traballar valores como a solidariedade e a cooperación referidos á doazón e transplante de órganos, e o equipo interdisciplinario de profesorado deste IES, como subliña Almudena no seu artigo, consegue partir do contorno próximo do alumnado para levar a cabo actividades e tarefas que consigan a súa motivación e, finalmente, contribúan á súa autonomía e ao seu espírito crítico. En suma, como tamén indica nos obxectivos, conséguese "ser quen de transformar estados de ira ou de desesperanza en estados de ilusión e de calma", en reflexionar profundamente sobre o paso dun feito negativo a unha situación de esperanza mediante accións solidarias de enorme calado. Os resultados dan conta da fondura dos efectos educativos no alumnado que investiga e, sobre todo, desenvolve a súa creatividade mediante un proxecto que involucra a case toda a comunidade educativa do centro.

Pola súa banda, Maribel Varela diríxese ao seu diario contándolle o camiño percorrido en compaña do alumnado e dos compañeiros do CEIP Pepe de Xan Baña de Santa Comba (A Coruña) durante a súa participación no programa Consumópolis, da Consellería de Economía e Industria. O proxecto parte do obxectivo e actividades específicas do concurso e amplíase a boa parte do traballo que levará a cabo o alumnado de 5º de primaria durante todo o curso. Como indica a autora, parten dunha especie de “baúl didáctico” onde podían “atopar cousas moi diversas sobre: consumo responsable, medio, publicidade, lecer e tempo libre, comercio xusto, saúde e seguridade, alimentación e unha morea de cousas máis”. Como resultado conseguiuse “unha aprendizaxe significativa, motivadora e activa” que os levou a darse conta de que “innovar e divertirse son uns bos aliados para aprender”.