InvestigArte, é un concurso de arte visual e tecnolóxico dirixido a dous perfís específicos:

• Grupos de investigación
• Alumnado de ESO, Bacharelato e Formación Profesional

Este concurso foi ideado por un grupo de investigadores apaixonados da fotografía e a súa utilidade para explicar ás novas xeracións e á sociedade en xeral, as innovacións científicas e tecnolóxicas asociadas aos seus proxectos científicos.
O concurso está organizado por educaBarrié (o canal de comunicación coa comunidade educativa da Fundación Barrié), Campus Vida (o Campus de Excelencia Internacional Liderado pola Universidade de Santiago de Compostela), e o Instituto de Investigacións Sanitarias de Santiago (IDIS); todos eles co obxectivo principal de achegar a ciencia e a tecnoloxía á nosa sociedade, a través dun concurso que pretende activar a visión artística e creativa da ciencia de alumnos de ESO, Bacharelato e Formación Profesional así como dos propios investigadores.
Está dividido en categorías en cada un dos perfiles:

- Investigadores:

• Macrofotografía (fotografías de obxectos maiores a un milímetro)
• Microfotografía (fotografías de obxectos menores ou iguais a un milímetro)

- Alumnado de ESO, Bacharelato e Formación Profesional:

• Fotografía
• Vídeo
• Ilustración

Ademais, InvestigArte, organizará coas obras gañadoras de cada unha das categorías tanto de estudantes como de investigadores unha exposición itinerante que permitirá coñecer as investigacións científicas actuais, así como actividades didácticas nos centros escolares ao público en xeral.

O prazo para presentar os traballos finaliza o 1 de marzo de 2013.

Gotas para Níxer é a campaña de cooperación educativa que, por quinto curso consecutivo, se desenvolve en colaboración cos centros educativos vinculados ao programa Enrédate. Os obxectivos principais desta campaña son sensibilizar sobre a relación que existe entre o acceso á auga potable e os dereitos da infancia, así como conseguir solicitar apoio económico para os programas de UNICEF en Níxer.

No curso 2012-2013 os esforzos diríxense ao programa de Educación Básica e Igualdade de Xénero que ten como obxectivo principal escolarizar o millón de nenos (60% nenas) que aínda non van á escola en Níxer. Anteriormente e dende o curso 2008-2009, a campaña Gotas para Níxer apoiou o programa de Supervivencia Infantil.

O principal mecanismo de contribución son as Carreiras Gotas para Níxer que cada centro organiza para os seus alumnos animándoos a coñecer máis sobre o tema e a facer pequenas contribucións. En cada unha das catro edicións anteriores foron máis de 30.000 nenos e nenas os que participaron anualmente. Aínda que as carreiras se celebran durante todo o ano, é entorno ao 22 de marzo, Día Mundial da Auga, cando existe máis participación. Os centros que desexen participar poden rexistrar a súa carreira na web de Enrédate.

Inscribe ao teu centro nesta actividade deportivo-festiva na que pode participar todo o mundo. Os familiares e amigos dos participantes pódenos patrocinar, contribuíndo a reunir máis gotas para Níxer. As carreiras da auga permiten aos centros educativos organizar un evento deportivo-solidario que una a alumnado, docentes e familias para acadar un obxectivo común: a mellora da supervivencia infantil en Níxer.

Todos os centros educativos están invitados a participar. A inscrición e os materiais que se ofrecen son gratuítos. Cada centro pode personalizar a actividade como crea oportuno. O fundamental é que os participantes entendan e valoren a achega que poden facer no logro dos dereitos dos nenos e nenas de todo o mundo.

Para máis información accede á web que se indica.

A Sociedade Galega de Medio Ambiente (Sogama) pon a disposición da comunidade educativa tres novos recursos para traballar as temáticas da reciclaxe e a sostibilidade.

Caderno Verde

En primeiro lugar, lanza o portal Caderno Verde, un espazo dixital dirixido aos niveis de Educación Infantil e Primaria que organiza actividades arredor duns personaxes, "Os amigos de Vilaverde". Estas actividades queren xunguir as boas prácticas medioambientais co ensino curricular desde unha perspectiva de transversalidade.  ada ficha dos amigos de Vilaverde está pensada como material de axuda para as aulas do primeiro ciclo de primaria e abranguerán as grandes áreas de coñecemento desta etapa educativa. Ademais, o Caderno Verde inclúe os eco-contos da familia Trebón, destinados á etapa da Educación Infantil, así como diversas actividades en liña e descargables.

Xogo xigante dos residuos

Este recurso percorrerá os 16 centros escolares adscritos ao programa educativo “Recíclate con Sogama”, encadrado dentro do Plan Proxecta e busca contribuír a incrementar as baixas porcentaxes de reciclado en Galicia, habida conta da notable influencia que os escolares teñen sobre o resto da poboación, constituíndo un interesante vehículo canalizador das boas prácticas ambientais.

O obxectivo último é que a separación de residuos se incorpore á rutina da comunidade educativa como un hábito máis, imprescindible para posibilitar o reciclado. Para isto, os centros foron dotados con contedores específicos (recipientes ecolóxicos de cores, de 120 litros de capacidade cada un, aptos para a recollida selectiva de envases lixeiros -envases de plástico, latas e briks-, papel/cartón e restos non reciclables), cos que se pretende que a comunidade educativa incorpore á súa vida diaria a axeitada segregación de desperdicios como un hábito máis de cara a garantir o seu posterior reciclado

A través do xogo o alumnado poñerá a proba os seus coñecementos sobre o principio dos tres erres, é dicir, como reducir a produción de refugallos, como alongar a vida útil dos produtos a través da reutilización e como reciclar axeitadamente os materiais para que estes sexan transformados en novos produtos, posibilitando así un considerable aforro económico e de recursos naturais.

O xogo da reciclaxe

A pretensión desta iniciativa é poñer a proba os coñecementos que o alumnado de idades comprendidas entre os 6 e os 12 anos ten sobre a xestión e tratamento dos residuos, ao tempo que se lle conciencia sobre a necesidade de poñer en práctica o principio dos tres erres (reducir, reutilizar e reciclar).
Dada a súa dimensión lúdica, considérase que, con este formato, o alumnado poderá interiorizar as boas prácticas ambientais coas que permitir a posterior transformación dos refugallos en recursos de utilidade.
Proclamarase gañador o equipo que chegue á meta tras superar un circuíto de probas nas que, nun período limitado de tempo, terá que dar boa conta dos seus coñecementos, pero tamén das súas habilidades e destrezas na mímica, o debuxo e a axilidade mental.

Os materiais e as instrucións para levar a cabo esta actividade pódense descargar na páxina web de Sogama.

O Institut Valencià de l’Audiovisual i de la Cinematografia Ricardo Muñoz Suay (IVAC) convoca o Encontro Audiovisual da Mocidade dentro do Festival Internacional de Cine de Valencia - Cinema Jove do 22 ao 24 de xuño de 2013 na cidade de Valencia.
Poden participar neste Encontro grupos de alumnado de ata 24 anos de idade, residentes en España e que pertenzan a centros educativos, EPA, asociacións xuvenís, obradoiros de imaxe, etc.
O certame ten tres categorías:

• A: ata 12 anos (alumnado de Infantil e Primaria)
• B: de 13 a 20 anos (alumnado da ESO e Bacharelato)
• C: de 16 a 24 anos (alumnado de Ciclos Formativos de Imaxe, de outros centros de formación e de asociacións xuvenís)

Cada categoría terá un premio e un accesit, composto dun lote de material audiovisual, un diploma e un trofeo.

O prazo de inscrición remata o 15 de abril de 2013 e esta debe facerse a través da web do Festival.

Xa está accesible en castelán un resumo do estudo de Eurydice: "Developing Key Competences at School in Europe: Challenges and Opportunities for Policy", publicado o pasado O 19 de novembro de 2012.

Este documento recompila as principais políticas nacionais dirixidas ao desenvolvemento das Competencias Básicas ou Clave nos centros escolares de Europa. Recoñece os progresos acadados ata o momento na incorporación das Competencias Básicas nos sistemas educativos, así como os retos políticos relacionados coa forma na que a educación contribúe a satisfacer as demandas cambiantes no relativo ás Competencias Básicas: mellorar o rendemento na alfabetización lectora, matemáticas e ciencias; aumentar o número de graduados en matemáticas, ciencias e tecnoloxía; e proporcionar máis apoio na adquisición de competencias como a emprendedora, a cidadá e a dixital. O estudo abarca os niveis de educación obrigatoria de 31 países europeos (Estados Membro da UE, Croacia, Islandia, Noruega e Turquía) e toma como referencia o curso 20011/2012.

O proxecto Pek, the Traveller Flea 3 - Evolution acaba de acadar o primeiro premio do programa europeo eTwinning 2013 na categoría de alumnado de 16 a 19 anos. Esta iniciativa, liderada desde o IES San Clemente de Santiago de Compostela, conta coa participación de centros educativos de 7 países coa coordinación do seguinte profesorado:

•     Muriele Dejaune, Lycée des métiers Louis Blériot, Trappes, Francia
•     Marcos Vence Ruibal, IES San Clemente - Compostela, Santiago de Compostela, España
•     Alessandra Pallavicini, ISIS Galilei, Gorizia, Italia
•     Bruna Giacosa, Liceo Classico "S. G. Calasanzio", Carcare (SV), Italia
•     Ciro Sánchez Suárez, IES Miguel Ángel González Estévez, Vilagarcía de Arousa, España
•     Hulya Erturk, KERİMBEY İ.O, SAMSUN, Turquía
•     Javier Arza Fernández, IES "Rey Don García", Nájera, España
•     Keri Georgieva, NGXNI "Konstantin Preslavski", Varna, Bulgaria
•     Lina Maria Pereira, Escola Secundária de Gama Barros, Cacém, Portugal
•     Ludmila Kosíková, Střední škola průmyslová a umělecká , Hodonín, República Checa
•     Meltem Bílgiç, Gökçe Karaoğlan İlköğretim Okulu, Samsun, Turquía
•     Montserrat Ansótegui, IES "Rey Don García", Nájera, España
•     Yordanka Simeonova, SOU "Georgi Izmirliev", Gorna Oryahovitsa, Bulgaria

Os principais obxectivos deste proxecto son:

• Aprender sobre culturas e linguas europeas.
• Aprender a crear historias de xeito cooperativo e convertelas en comics.
• Aprender a deseñar obxectos de merchandising.
• Aprender a usar ferramentas de software como buscadores web, foros, wikis, blogs, editores de texto, editores de imaxes, etc.
• Usar software libre: LibreOffice, GIMP e Scribus.

O produto final é un cómic multilingüe que se pode consultar pulsando no arquivo pdf incluído abaixo ou en internet pulsando aquí.

Xa están abertos os prazos de inscrición para os cursos de formación do profesorado para o desenvolvemento dos programas do ámbito educativo do Plan Galicia Saudable “Máis e Mellor Actividade Fisica” (código do curso G1201109) e “Proxecto Deportivo de Centro”  (código do curso G1201108), incluídos no Plan Proxecta. A inscrición farase a través da plataforma FPROFE referíndose aos anteditos códigos.

Os cursos celebraranse os vindeiros días 2 (curso do “Proxecto Deportivo de Centro”) e 9 de marzo (curso de “Mais e Mellor Actividade Física”) de 2013, en Santiago de Compostela, en horario de 09:30 a 18:30 horas. Nestes cursos abordaranse non soamente as liñas xerais dos programas e a súa implicación e vinculación co Plan Proxecta, senón que se traballarán modelos concretos de implantación con referencias de experiencias tanto da nosa comunidade como de fora.

O profesorado asistente a estes cursos terán unha certificación de 8 horas.

As inscricións poden realizarse nas seguintes ligazóns:

• Máis e Mellor Actividade Física
• Proxecto Deportivo de Centro

Máis información no subgrupo de Redeiras dos programas da Secretaría Xeral para deporte que participan no Plan Proxecta.

A Fundación de Axuda contra a Drogadicción (FAD) e a Fundación Raíña Sofía desenvolven un programa de prevención escolar de condutas de risco dirixido a alumnado e profesorado de Educación Infantil, Primaria e Secundaria Obrigatoria. Este programa defínese como un conxunto de actuacións dirixidas a sistematizar a prevención dos problemas vencellados ao consumo de drogas no ámbito escolar.

Os seus obxectivos xerais son reducir o consumo de alcohol, tabaco e drogas ilegais e atrasar a idade de inicio do seu consumo. Para isto utiliza unha plataforma web que está baseada nunha metodoloxía innovadora chamada IVAC (Investigación, Visión, Acción e Cambio), que rompe cos esquemas tradicionais de transmisión de coñecemento, ao estar baseada nun proceso de aprendizaxe activa.

O material didáctico ofrecido no seu espazo web está composto por:

• Unha Guía didáctica.