O conselleiro de Cultura, Educación e Ordenación Universitaria en funcións, Xesús Vázquez Abad, felicitou hoxe en persoa á comunidade educativa do IES de Sabón (Arteixo, A Coruña) pola obtención dun dos primeiros premios concedidos pola Fundación Telefónica á innovación educativa. Durante a súa visita a este instituto estivo acompañado pola directora, Mª Isabel Pardo,  pola delegada da Xunta en funcións na Coruña, Camino Triguero; polo xefe territorial da Consellería na provincia, Indalecio Cabana; e polo director de Telefónica en Galicia, Manuel Alonso; Vázquez Abad salientou este recoñecemento como un impulso ao labor que docentes, alumnas e alumnos realizan a prol da busca de novas fórmulas metodolóxicas e didácticas arredor da práctica educativa e as novas tecnoloxías da información e a comunicación.

O IES de Sabón resultou gañador do primeiro premio na categoría de 15 a 17 anos da modalidade B destes galardóns, a dirixida a traballos que responden ao uso pedagóxico de realizar tarefas de exercitación e práctica a partir de recursos interactivos dixitais. A viaxe de Alicia con e-adventure: coñece a túa cidade é un proxecto dirixido polos docentes Sonia Vivero Nogueiras, Pilar Martínez Souto e Agapito Muñíz Sánchez; no que o xogador axuda á personaxe da aventura gráfica a voltar á casa  explorando distintos escenarios da localidade da Coruña en distintas épocas, ao tempo fai unha viaxe paralela pola mitoloxía, arte, toponimia, xeografía e historia da zona. O xurado do premio salientou este traballo como unha proposta innovadora, motivadora e orixinal, no que combinan acertadamente a tecnoloxía e os obxectivos e metodoloxía didáctica. O proxecto pode atoparse no enlace web: http://jordipereda.com/alicia/alicia.htm .

Ademais do IES de Sabón, neste certame foron premiados proxectos nos que participaron os o IES de Porto do Son, o CEIP Manuel Sieiro, a EEI de Milladoiro e o Colexio Luís Vives.

Visita ao IES

O titular en funcións do departamento educativo da Xunta de Galicia aproveitou a súa estancia no centro para coñecer as instalacións nas que estudan o seus 243 alumnas e alumnos, e que a Consellería vén de mellorar coa construción durante o verán dunha rampla, o que supuxo un investimento de preto de 10.000 euros.

Ademais, Vázquez Abad felicitou á comunidade educativa do centro polo traballo realizado na biblioteca escolar para fomentar o seu uso como espazo de lectura, aprendizaxe e investigación por parte do alumnado. De feito, o centro ten recibido 20.150 euros para o desenvolvemento de actividades, entre as que destacan os clubs de lectura. O bo facer deste instituto neste eido viuse recoñecido este mesmo curso, coa súa integración no Plan de Mellora de Bibliotecas Escolares da Consellería.

Tras o seu paso por este centro, o conselleiro en funcións visitou, no mesmo concellom as instalacións dos CEIP Ponte dos Brozos e CEIP de Arteixo.

Outras galardóns á innovación educativa

Os galardóns da Fundación Telefónica recoñeceron tamén o traballo de outros centros educativos galegos a prol da innovación educativa. Así, o MarinoFeQ, realizado por Francisco Mariño Domínguez, profesor do IES Porto do Son, resultou gañador do terceiro premio na modalidade A, dirixida a traballos que responden ao uso pedagóxico de dar soporte á clase a partir de recursos dixitais de 15 a 17 anos. Trátase dunha páxina para a integración das TIC no ensino da Física e Química en secundaria, que destaca pola súa fácil navegabilidade e accesabilidade, así como pola multitude de recursos, ferramentas, e material multimedia e colaborativo que ofrece.

Ilusionarte coas TIC é un blogue realizado por Concepción Villar Suárez, da EEI de Milladoiro, que obtivo o segundo premio na modalidade C, de  traballos dirixidos a alumnado de 3 a 8 anos, que responden ao uso pedagóxico de realizar produccións en pequeno grupo a partir de recursos dixitais. O blogue recolle as actividades que realizan as alumnas e alumnos do segundo ciclo de infantil na actividade de Linguaxe Audiovisual e Novas Tecnoloxías: debuxos, fotografías, vídeos, música, programas de radio... Ademais, queda patente a implicación das familias e o traballo en colaboración con escritores e compañeiros de outros colexios.

O proxecto que acadou o segundo premio na modalidade D, de traballos que responden ao uso pedagóxico en proxectos interescolares na aula de 3 a 8 anos, é froito da colaboración entre o CEIP Manuel Sieiro, a EEI de Milladoiro e o Colexio Luís Vives, coordinado polas docentes Patricia Doval Rodríguez, Concepción Villar Suárez e Belén Rodríguez González. Proxecta con nós ten como obxectivo  crear unha curta sobre a conservación do medio ambiente, dando a coñecer o morcego como especie animal favorecedora da conservación dos ecosistemas. Neste caso o xurado salientou a coordinación entre os centros, así como a participación activa das alumnas e alumnos en todas as fases do traballo.

O conselleiro de Cultura, Educación e Ordenación Universitaria en funcións, Xesús Vázquez Abad,  inaugurou hoxe no Pazo de Congresos de Santiago as IV Xornadas de Bibliotecas Escolares de Galicia ‘Ler para ver’, onde apostou pola biblioteca escolar como “un espazo de creación e pensamento crítico, de encontro e de cohesión social, de unión entre a innovación tecnolóxica e a pedagóxica”. Neste marco, e diante de 1.100 profesores de toda Galicia – o encontro foi un éxito, xa que máis de 1.400 profesores solicitaron asistir-, o titular en funcións do departamento educativo da Xunta de Galicia recordou as conclusións derivadas do congreso Bibliotecas Escolares en Tránsito - celebrado o ano pasado en Santiago- , nas que quedaron patentes tanto o importante papel das bibliotecas e dos docentes que traballan con elas, como as áreas nas que é preciso mellorar o seu uso.

Para iso, Vázquez Abad avogou por consolidar as competencias lectoras. “Seguindo esa estela,- explicou-  as xornadas deste ano céntranse na alfabetización mediática e informacional, requisito previo imprescindible para o desenvolvemento sustentable de sociedades do coñecemento abertas, participativas e  inclusivas e das institucións, comunidades e individuos que as integran”. “Unha combinación de coñecementos, competencias e prácticas precisas para acceder e comunicar coñecementos de xeito creativo e ético, respectando os dereitos humanos”, salientou.

Docentes, o motor da biblioteca

Ademais, o conselleiro en funcións agradeceu o traballo dos docentes para converter progresivamente as bibliotecas escolares “en lugares centrais da vida de cada comunidade educativa”. “Vostedes - dixo- son, en definitiva, o seu motor, esforzados docentes que veneran o coñecemento e a súa transmisión, amantes dos libros, que desexan que os seus alumnos se convertan en lectores competentes, en usuarios eficientes e críticos das distintas fontes de información das que na actualidade poden dispoñer”.

Neste sentido, Vázquez Abad animounos a seguir traballando para espertar o gusto polo coñecemento entre o alumnado, así como a integración dos novos recursos e ferramentas na práctica educativa. Neste acto Vázquez Abad estivo acompañado polo director xeral de Centros e Recursos Humanos, Jose Manuel Pinal Rodríguez; e polo director xeral de Educación, Formación Profesional e Innovación Educativa, Manuel Corredoira.

A Consellería de Cultura, Educación e Ordenación Universitaria reúne a 1.100 persoas na que é a cita anual do colectivo de profesores e profesoras comprometidos coa biblioteca escolar e a lectura nos centros públicos galegos. Logo da paréntese de 2011 (ocasionada pola celebración, nas datas acostumadas, do que fora o congreso Bibliotecas Escolares en Tránsito, con carácter estatal), reanúdase esta actividade que se desenvolve en Compostela.

O obxectivo deste encontro é que os asistentes poidan mellorar a súa formación en todo o relacionado coa lectura na actual sociedade da información, así como as estratexias necesarias para unha axeitada educación neste terreo, especialmente no que atinxe a uso da biblioteca como espazo para a información, a lectura e a aprendizaxe de forma transversal en todas as materias impartidas en colexios e institutos.

Lectura, medios e Internet

O lema destas xornadas, ‘Ler para ver’, recolle a necesidade de educar para unha lectura comprensiva e crítica dos medios de comunicación, dos medios polos que se transmite información na sociedade actual, máis aló de soportes ou xéneros discursivos.

Para afondar neste tema, desenvolveranse conferencias plenarias nas que Fabio Tropea e Tíscar Lara abordarán a lectura crítica na era de Internet; e as relacións entre os medios de comunicación, a aprendizaxe dixital e as bibliotecas escolares. Pola súa parte, Luis González impartirá a conferencia final Lectura no século XXI e biblioteca escolar.

O programa destas xornadas complétase con mesas de experiencias, coa participación de expertos en distintos medios, relacionándoos coa educación (prensa, radio, cómic, videoxogos, arte, audiovisuais, vídeo, cine, animación....) e responsables de bibliotecas escolares con boas prácticas nestes ámbitos.

A Consellería facilitará o seguimento das xornadas a todos os interesados, a través da retransmisión en streaming das sesións, que poderán seguirse desde o Portal educativo da Consellería, nas páxinas web do Centro Autonómico de Formación e Innovación (CAFI) www.edu.xunta.gal/centros/cafi   e na de Bibliotecas Escolares http://www.edu.xunta.gal/biblioteca/blog/ .