Do 14 ao 16 de novembro terá lugar nas Palmas de Gran Canaria, o congreso “Canarias en tres continentes dixitais: educación, TIC, NET-Coaching” EDUTEC 2012.
Este congreso ten como finalidade abrir un foro de debate sobre a presenza das Tecnoloxías da Información e a Comunicación nos diferentes contextos sociais para propiciar o intercambio de coñecemento e a información dixital entre África, América e Europa.
Preténdese tamén intercambiar entre os diferentes profesionais de diversos contextos, o papel das TIC na sociedade do coñecemento e impulsar a presentación de novas liñas de traballo coas TIC na educación formal e non formal.

A Axencia Europea para a Seguridade e a Saúde no Traballo (EU-OSHA) lanzou un proxecto destinado a sensibilizar ao alumnado de educación primaria sobre a importancia da seguridade e a saúde no traballo.
Utilizando o divertido personaxe de animación “Napo” creáronse unha serie de materiais educativos totalmente gratuítos para o profesorado. Estas ferramentas contan con vídeos e actividades para axudar o alumnado de entre 7 e 11 anos a entender e saber actuar ante cuestións básicas de seguridade.

O obxectivo é inculcar uns hábitos seguros desde a idade máis temperá.

O CILIJ (Centro Internacional do Libro Infantil e Xuvenil) e a Fundación VOCES presentan a VI Edición do Certame Xuvenil de Curtametraxes “¡No te cortes!” co obxectivo de promover a creación artística audiovisual entre os nenos e nenas e a mocidade.
O prazo de admisión abriuse o pasado 15 de xuño, e finaliza o próximo 1 de novembro de 2012.
Poderán enviar os seus traballos todos aqueles rapaces menores de 18 anos, e alumnado menor de 22 anos que estea matriculado en Institutos de Educación Secundaria, Centros Integrados de Formación Profesional e centros docentes autorizados, que impartan Ciclos Formativos de Grao Medio e Grao Superior.
As bases, e outros datos de interese, poden consultarse na web do certame.

Os días 4, 5 e 6 de outubro de 2012 ten lugar no Palacio de Congresos e Exposicións de Mérida o Congreso Contidos Educativos Dixitais. A liña principal que orienta o seu desenvolvemento é a presentación e análise de diferentes modelos de desenvolvemento, distribución e utilización destes tipos de contidos.
Ademais de intervencións institucionais, o programa contará coa participación de relatores de prestixio internacional, obradoiros temáticos, mesas redondas, comunicacións e experiencias educativas.
Está dirixido tanto ao profesorado dos diferentes niveis e etapas educativas como aos responsables e administradores do campo docente procedentes de todo o Estado.
Este congreso trata de brindar un marco de encontro no que os docentes de todas as autonomías, as administracións educativas competentes na materia e a industria do sector teñan ocasión de presentar os seus modelos, experiencias e resultados no campo dos contidos educativos en formato dixital.

Co fin de promover o coñecemento dos dereitos humanos entre os escolares españois, a Defensora do Pobo, Fundar e a ONG Globalización dos Dereitos Humanos convocan o X concurso escolar de debuxos Defensor do Pobo 2012.

Participantes: alumnado de ensinanzas Primaria e Secundaria de España.

Cada alumno/a deberá presentar un debuxo orixinal, con calquera material ou técnica, relativo aos dereitos humanos. O debuxo presentarase nunha folla de papel de tamaño A4.

Premios: cinco premios para Primaria e cinco para Secundaria, consistentes nun ordenador portátil netbook para cada gañador. Os premiados tamén recibirán do Defensor do Pobo unha axuda económica para o seu desprazamento a Madrid para recoller o premio.

Prazo: antes do 20 de novembro de 2012.

Para máis detalles consultar as bases do concurso.
 

O proxecto EUROCATERING.ORG, desenvolvido polo IES As Fontiñas e coordinado pola Asunción Acosta García, acaba de recibir o premio "European Language Label of the Labels Awards", concedido pola Comision Europea en Limassol, Chipre.

No ano 2009 publicouse en Internet o curso en liña EUROCATERING na páxina http://www.eurocatering.org, resultado dun proxecto do programa Leonardo da Vinci B de competencia lingüística. Eurocatering é un curso gratuíto pensado para o sector da hostalaría que se pode realizar en 7 linguas: esloveno, español, francés, galego, holandés, inglés e noruegués. Este proxecto, no que participaron distintos centros e profesorado de 7 países europeos, foi continuado noutro proxecto (Key Activities 2-Languages) de nome Eurocathos, no que se realizou unha ampliación do proxecto anterior a 12 linguas (as anteriores máis o alemán, finlandés, gaélico, italiano e polaco) e estase a elaborar outro curso en liña centrado na recepción de hotel, tamén en 12 linguas.

A presentación do proxecto e o lanzamento europeo de EUROCATERING en 12 linguas será o próximo día 5 de outubro, venres, ás 17:00  e terá lugar no IES as Fontiñas de Santiago de Compostela.

Esta semana anunciáronse os gañadores dos Premios Fundación Telefónica de innovación educativa 2012. Os traballos premiados poden verse no seguinte enderezo web:

http://premioeducacion.fundaciontelefonica.com/archives/5272

• MarinoFeQ

• A viaxe de Alicia con e-adventure: coñece a súa cidade

• Ilusionarte coas TIC

• Proxéctate con nos

"Formación Aberta" é a sección da Aula Virtual do CAFI (Centro Autonómico de Formación e Innovación) con acceso aos materiais de Platega dos cursos de formación máis demandados  e os mellor valorados nas enquisas finais de actividade.

É importante sinalar que, como o fin é dar a coñecer os materiais cun ánimo autoformativo, non se poderá solicitar titorización ou certificación a través destes recursos en aberto. De precisalo, deberanse seguir os pasos habituais de inscrición na actividade (en caso de estarse impartino ao longo do ano) a través da aplicación FPROFE.

Nestas datas engadiuse un novo curso a esta sección:

• Elaboración de materiais didácticos con eXe-Learning. Edición Abalar.

Ademáis pódese ter acceso a outros cursos xa incluídos anteriormente:

• Formación a distancia de coordinadores e coordinadoras das tecnoloxías da información e da comunicación en centros educativos
• Traballando co software dos portátiles Abalar
• Ferramentas e aplicacións da web 2.0 na aula de CCSS (iniciación). Edición Abalar
• As redes sociais na educación. Edición 2012
• Lim e o Proxecto "XOGAMOS?", Emprego didáctico. Edición 2012
• Creación de actividades didácticas en liña con ARDORA. Edición Abalar.