A Vicepresidencia primeira e a Consellería de Presidencia, Xustiza e Deportes publicaron a orde do 5 de decembro de 2023 (DOG do día 11) pola que se establecen as bases reguladoras para a concesión de axudas do Programa de promoción da actividade deportiva en idade escolar a través do Bono deporte. Este novo programa ten por finalidade axudar ás familias nos gastos derivados da práctica deportiva dos nenos e nenas de 6 a 16 anos.
No noso centro, terá dereito a estes bonos o alumnado participante no Programa XOGADE, isto é, o alumnado de 3º a 6º de primaria.
Cada beneficiario disporá dun único bono por un importe de 120 €, que poderá utilizarse nun ou varios dos establecementos adheridos ao programa (que se identificarán co distintivo da campaña) e terá a consideración de bono desconto do 80 % da compra ou servizo adquirido. O importe do bono irase reducindo en función do valor da compra realizada (IVE incluído).
O período de descarga dos bonos estenderase do 8 de xaneiro ao 29 de febreiro de 2024. Unha vez descargados, poderanse utilizar ata o 1 de xullo.
Para a descarga dos bonos será preciso introducir na web www.bonodeporte.gal os datos recollidos no art. 12.1 da Orde de 5 de decembro (DOG do día 11), entre eles o identificador Xogade, que figura no carné que se lle entregou hoxe ao alumnado de 3º a 6º de primaria.
