Bolsas para cursar estudos postobrigatorios no curso 2024-2025

Ábrese o prazo para solicitar as BOLSAS DE CARÁCTER XERAL PARA O CURSO ACADÉMICO 2024-2024 para estudantes que vaian cursar estudos postobrigatorios: Bacharelato, Formación Profesional de grao básico, medio, superior, etc. 

PRAZO: dende o 19 de marzo ao 10 de maio de 2024

Aínda que o alumnado non saiba con seguridade que ou onde vai estudar, débese solicitar a bolsa igualmente neste prazo.

Nesta ligazón pódese obter máis información. 

A acrópole na aula

23-24 Club de lectura A acrópole na aula (16-04-24)

Na derradeira sesión do noso clube de lectura do pasado martes 16 de abril, o alumnado descubriu a mitoloxía grega.

Xuntos repasamos, a partir de obras de arte, as diferentes lendas que compoñen o imaxinario do mundo helenístico. E que a día de hoxe seguen vixentes e serven de inspiración para artistas como Alba Reche ou as Fillas de Cassandra. 

Para comprenderen os mitos tiveron que identificalos nun xogo de pistas que rematou coa representación teatral das lendas máis coñecidas.

No 50º aniversario da Revolução dos Cravos

Xornada de deporte escolar

23-24 Deporte Escolar Bádminton (23-04-24)

Unha representación do alumnado de 3º e 4º ESO do noso centro participou esta mañá na terceira xornada de deporte escolar, dedicada ao bádminton, que organiza a Agrupación de Deporte Escolar da Estrada. No Pavillón Coto Ferreiro déronse cita uns 150 rapaces e rapazas do CPR N.S. Lourdes, o IES Manuel García Barros, o CPI Santa Lucía de Moraña e o CPI Aurelio Marcelino Rey García de ⁠Cuntis.

 

Foto cedida polo IES Manuel García Barros

Pola súa banda, o alumnado de 1º ESO participou o pasado martes 16 no Día da Educación Física, que ten como finalidade visibilizar a importancia da actividade física na idade escolar, xunto co alumnado doutros colexios e institutos da localidade. Cada centro participante tiña asignado un espazo nas prazas e rúas para desenvolver os xogos e actividades e ás 12h reuníronse todos na praza do Concello. 

Spring Week 2024, programa de inmersión lingüística en inglés

23-24 Spring Week (do 14 ao 20 de abril)

 

O alumnado de 3º ESO participou no programa Spring Week entre os días 14 e 20 de abril na vila de Mondariz-Balneario. Nesta estadía de inmersión lingüística en lingua inglesa, o alumnado practica e mellora o seu dominio do idioma dende un enfoque comunicativo, especialmente oral, no que combinan as tarefas de aula con outras actividades lúdicas.   

No primeiro día o grupo visitou Mondariz-Balneario para coñecer mellor este concello, pequeno en tamaño pero dunha historia moi rica que garda relación coas súas famosas instalacións termais, e nos días sucesivos coñeceron outros puntos de interese da vila e a contorna, como o Castelo de Sobroso.

Avaliación de diagnóstico

En cumprimento da nova lei educativa estatal, este curso está previsto en todas as comunidades autónomas a realización de probas de avaliación de diagnóstico para o alumnado de 2º de educación secundaria. No caso de Galicia, terán lugar os próximos días 10 e 11 de abril. 

Pode atopar máis información neste documento dirixido ás familias.

Xornada final e entrega de premios do Torneo de Xadrez de Primavera

A Biblioteca acolleu un novo campionato de xadrez que se desenvolveu nestes tres últimos e intensos xoves de marzo con cadanseus recreos. Os cruzamentos foron variados e entre os xogadores e as xogadoras puidemos ver caras máis veteranas e outras máis novas desta escola de xadrecistas que coordina o profesor Roberto dende hai tres cursos.

Finalmente, as partidas finais coroaron unha vez máis a Rodrigo Folgar, que foi acompañado no pódium por Xian Gestoso e Iván Hermida. Moitos parabéns a eles e mais a todas as persoas participantes! 

Novo encontro dos grupos de oratoria dos IES Nº 1 e Antón Losada Diéguez

O pasado mércores 13 de marzo tivo lugar o terceiro debate entre os grupos de Oratoria do IES Antón Losada Diéguez e o IES Nº 1 que coordinan os Departamentos de Lingua Castelá de ambos centros. Desta volta, a temática escollida foi os deportes de combate e as preguntas formuladas foron estas: "Debemos prohibir estes deportes, para conseguir unha sociedade máis pacífica?", "A súa práctica é positiva ou negativa para os deportistas?"

Polo IES Nº 1 participaron Ana Dorelle, Xian Gestoso, Manuel Caramés e Nuria Gamallo. Pola banda do IES Antón Losada interviñeron Antía Álvarez, Samuel Carracedo, María Cerviño, Paula Coto e David Santos.

Xa sabedes, dádelle ao play e opinade.

8M: mulleres de onte, de hoxe e do mañá

O 8M, Día Internacional da Muller, é un día de celebración mais sobre todo de reinvindicación para lembrar que "aínda queda moito camiño por percorrer" para conquistar a igualdade, como lembraron as nosas alumnas nunha nova colaboración do IES co espazo "O Recuncho da Lingua" dentro do programa Ensaiar é de covardes, de Radio Estrada.

Neste caso, as alumnas de 3º ESO Noa Cabaleiro, Ana Dorelle, Lía Expósito, Alba Moimenta e Manuela Rey falaron sobre diversas mulleres do pasado e do presente, salientando o seu labor como pioneiras en distintos ámbitos, así como as adversidades ás que se enfrontaron pola súa propia condición de mulleres: Herminia González, Exeria, Avelina Valladares, Isabel Zendal, Pepa a Loba, Rita Fernández, Irene González... Nunha segunda parte do seu traballo de investigación, que dan a coñecer neste programa, centráronse nas mulleres contemporáneas da nosa contorna e esta foi a quenda para Rosa de Cabanas, Elena Ferro, Mónica Rey Baltar, Vanesa Casal (Casal de Creación) e Mar Blanco. 

De akelarre coas 'Meigas' de Esteban Folgar Brea

Esta é unha novela sobre meigas, pero non son como ti cres. As desta novela non rouban nenos, non invocan diaños, non botan mal de ollo nin lle fan mal á xente… que non o merece.

As meigas desta novela viven entre nós, fan grupos de WhatsApp, vixían que ninguén salte unhas normas determinadas e axudan a quen o pida, pero tamén discuten e se enfadan unhas veces, e bailan e van xuntas de festa outras.

Nesta novela coñecerás a Xiana, unha rapaza de 16 anos, neta de meiga, que se vai presentar ás probas de selección para tamén se converter en meiga e ocupar un dos postos no aquelarre. Pero xunto a ela hai máis candidatas que queren o mesmo, e só hai dúas prazas!

 

23-24 Club de Lectura Meigas (05-03-24)

Entre o silencio e a música, a nosa microliteratura

Os nosos microrrelatos e micropoemas agroman na primavera "porque os escrebemos no tempo silencioso da invernia", como anunciaba Luísa Villalta, escritora a quen se lle dedica este ano o Día das Letras Galegas e que, por este mesmo motivo, amadriña o XI Concurso de Microrrelatos e Micropoemas DinamizaEstrada, convocado polos Equipos de Normalización Lingüística dos centros de ensino do noso concello. 

Nesta nova edición voltaron participar centos de estudantes con micropoemas e microrrelatos que debían incluír as palabras "silencio" e "música", respectivamente, escollidas no 1º trimestre nunha votación polos escolares de entre unha serie de termos recollidos na obra de Luísa Villalta. Non foi doado o labor dos xurados dos respectivos centros nin do xurado da fase final, que se reuniu a finais de febreiro para seleccionar os textos e deseños gañadores entre os máis de 200 traballos finalistas. 

Probas específicas para a acreditación das competencias dixitais do alumnado de 4º ESO

A Consellería de Educación publicou a Resolución pola que se ditan instrucións para a acreditación das competencias dixitais do alumnado que cursa ensinanzas de ESO e Bacharelato en Galicia no curso 2023/2024.

Alumnado que cursa 4º da ESO:

Viaxe de fin de etapa da ESO

Este pasado martes tivo lugar a reunión coas familias para dar a coñecer e ultimar os detalles finais da viaxe de fin de etapa da ESO. Agradecemos a colaboración das familias e a organización por parte do grupo de profesoras implicadas na actividade, comezando por Ana, a responsable de Actividades Extraescolares e Complementares.

París agarda polo alumnado de 4º ESO entre o 31 de marzo e o 4 de abril. Xa falta menos!!!

Encontro co novelista Fernando Lalana

Na tarde de hoxe, martes 5 de marzo, o alumnado de 3º ESO participou nun coloquio co escritor Fernando Lalana, que mantivo unha charla entretida e interesante sobre a novela 13 perros a partir das preguntas que lle foron formulando os rapaces e as rapazas. 

A obra é unha novela de detectives que desenvolve con grandes doses de humor unha brillante homenaxe ao cinema negro e ás novelas de espías. Nela, o tenente Felipe Manley, do Centro Nacional de Intelixencia, acaba de descubrir que o satélite europeo Meteosat está en perigo. A esta investigación súmase outra historia protagonizada por Elvira Ballesteros, unha maestra en paro que acaba de obter o diploma de detective privada e se enfronta, coa axuda do seu fillo Félix, ao seu primeiro caso: a desaparición dun galgo persa. Que relación podería ter o can desaparecido co caso internacional que segue o tenente?

A actividade foi posible grazas á organización das profesoras do Departamento de Lingua Castelá e a Editorial Bambú.

Torneo de Xadrez de Primavera

Chega a primavera e coa nova estación un novo Torneo de Xadrez, que se desenvolverá os vindeiros xoves 7, 14 e 21 de marzo durante os dous recreos de cada día na Biblioteca. 

 

Lembrade que podedes pearticipar todos os alumnos e alumnas interesados malia que non esteades inscritos nas clases de xadrez que imparte o profesor Roberto. 

 

Animádevos e anotádevos na Biblioteca!

 

Tamén se fala da Estrada no MillaFALAdoiro

A campaña Aquí Tamén se Fala que se desenvolve no noso centro e en máis de 180 centros de ensino de toda Galicia chegou á radio escolar do IES do Milladoiro (Ames), o MillaFALAdoiro. Os alumnos e Brais Tato Mejuto e Pedro Souto Riveira e o profesor Román foron entrevistados por Diego Madarnás, un rapaz deste centro amesán que conta cunha sección propia, as Entrevistas con Diego, que vos animamos a escoitar. Grazas a Diego e aos técnicos Erik e Mario, así como oa profesorado coordinador da radio, Valentina Formoso e Manolo Maseda, por contar connosco para afirmar unha vez máis que #aquítaménsefala e moito!

Sortie au théâtre en français: Les trois mousquetaires

O pasado 26 de febreiro o alumnado de Lingua Francesa de 3º e 4º ESO asistiu á representación teatral de Les trois mousquetaires, que tivo lugar no paraninfo do Colexio La Salle de Santiago de Compostela. Este texto clásico de Alexandre Dumas foi adaptado e representado pola compañía BHM Producciones – La Bohème e a saída foi organizada polo Departamento de Francés do noso centro coa finalidade de permitirlle o alumnado coñecer e gozar, a través do teatro, de obras de autores franceses e practicar e motivar a aprendizaxe do idioma. 

Prazo de admisión para o novo alumnado (Curso 2024-25)

Todo o alumnado procedente de centros educativos non adscritos que desexe estudar o próximo curso no IES Nº1 deberá presentar solicitude de admisión.

Prazo de presentación: do 1 ao 20 de marzo, ambos incluídos.

Na secretaría do centro deberán presentar a seguinte documentación:

Admisión de alumnado para o 2024-25

O IES Nº1 comunica que todos os alumnos e alumnas procedentes dos centros adscritos foron admitidos.

Teñen, por tanto, a praza asegurada; deberán realizar a matrícula nas datas indicadas no calendario que publicaremos no mes de xuño.

A listaxe está exposta no taboleiro de anuncios do Centro, por se quixeren consultala.

"O espello de Claude", fotografía e identidade na adolescencia

23-24 O espello de Claude

O proxecto "O espello de Claude" regresou ao noso centro da man do fotógrafo e psicólogo Fuco Reyes e grazas ao patrocinio de //Afundación. Obra Social ABANCA. Nos últimos meses o alumnado de 3º e 4º ESO da materia de Educación Plástica traballou neste laboratorio de fotografía e identidade para adolescentes que procura ver a través do obxectivo da cámara diferentes aspectos clave desta etapa de transición como a construción da identidade, a autoimaxe, a autoestima, a xestión das emocións e a motivación. 

O proxecto articúlase en dúas partes, as sesións de traballo co grupo na que se expoñen os diferentes temas e se visualizan imaxes propias e de autores e autoras recoñecidas; e o desenvolvemento dun pequeno proxecto artístico que permita plasmar como sente e pensa a adolescencia en relación a temas que lle son importantes.

Abrimos as fiestras no día grande de Rosalía de Castro

A colaboración de Pablo García Villamor e Desirée Vidal Godoy nun novo especial do programa Recuncho da Lingua, que coordina Pilar Bernárdez en Radio Estrada, puxo o ramo á celebración do Día de Rosalía 2024 no noso centro. Pablo e Desirée achegáronse á obra da poeta interpretando as cartas nas que ela e mais o seu home, Manuel Murguía, conversaron arredor da creación poética e o proxecto ao que dedicaron boa parte das súas vidas: a dignificación da lingua e a cultura galegas. Podedes escoitalos a partir do minuto 29. No programa tamén participaron alumnos e alumnas dos Colexios Pérez Viondi, O Foxo e Cabada Vázquez. 

Viva o noso alumnado!!!

Atención, señores, digan todos á miña voz, vivan os entroidos de Santa María de Couso cos seus correos, xenerais, coros e directores que os mandan e dirixen!
VIVA!
Viva a xente que nos rodea e mira!
VIVA!
Viva a nosa unión!
VIVA!
Atención, señores, digan todos á miña voz, Viva o IES N1 da Estrada cos seus alumnos, profesores e equipo directivo que manda e dirixe!
VIVA!
Viva a xente que nos rodea e mira!
VIVA!
Viva a nosa unión!
VIVA!
 

Na frente unha estrela, no bico un cantar

Roteiro Rosalía 23-24

Así foi o Festival do Entroido 2024

23-24 Entroido

Un ano máis, o espírito do entroido invadiu o noso centro grazas á implicación de toda a comunidade educativa. Os disfraces, a imaxinación, a creatividade e o bo humor voltaron ás aulas e aos corredores durante as últimas semanas, nas que os diferentes grupos estiveron preparando as súas actuacións nas Titorías. E este venres pasado, 9 de febreiro, baixo a coordinación da profesora Ana Mesego e o alumnado de 4º ESO, eclosionou a festa, que tivo o seu momento máis especial no festival, no que os grupos presentaron os seus números. 

Houbo coreografías, crítica de temas de actualidade, representación de historias de sempre e fantasías, con Pablo, Iria e Carla como presentadores con moito oficio, con Hugo e compañía na parte técnica e cun xurado de profesores/as que o tivo moi difícil para resolver a difícil papeleta de elixir os mellores números do festival. 

O importante era participar e reecontrarse de forma festiva máis é de xustiza recoñecer que "O consultorio de Charo e Chari" (4º ESO A) e "Wonka" (1º ESO B) brillaron con luz propia e gañaron, ex aequo, o concurso. 

Os nosos parabéns e o agradecemento a todos e todas as participantes e até o ano que vén. Que viva o entroido!

Longa vida ao Entroido de Couso!

2024 02 11 Entroido Pontevea

Despois de 8 anos sen se celebrar, a parroquia de Couso recuperou o seu entroido tradicional. Os Encontros de Correos e Xenerais, o Coro dos Bonitos e mais o Coro dos Vellos e a danza típica do Entroido do Ulla recuperada pola asociación O Rexionalista luciron en todo o seu esplendor e cobraron toda o seu sentido no contexto onde teñen razón de ser: o entroido córrese na aldea para a aldea. 

A chuvia non desanimou os veciños e as veciñas e a comitiva percorreu as aldeas de Sequeiró, Castro, Maíndo, Couso, Barco, Fontenlo e o Souto de Vea cunha parroquia volcada na súa festa. As músicas, os vivas, as coplas entre uns e outros, a retranca nunhas regueifas que cantaron ao Festival As Nosas Músicas, ao empoderamento das mulleres ou a esa teima urbanita de querer levar o entroido rural ás vilas e ás cidades descontextualizando totalmente a festa: "Couso baila mentres o Concello chora" sentenciaba o retrouso das charangas.  

Distribuir contido