Taboleiro

8M: mulleres de onte, de hoxe e do mañá

O 8M, Día Internacional da Muller, é un día de celebración mais sobre todo de reinvindicación para lembrar que "aínda queda moito camiño por percorrer" para conquistar a igualdade, como lembraron as nosas alumnas nunha nova colaboración do IES co espazo "O Recuncho da Lingua" dentro do programa Ensaiar é de covardes, de Radio Estrada.

Neste caso, as alumnas de 3º ESO Noa Cabaleiro, Ana Dorelle, Lía Expósito, Alba Moimenta e Manuela Rey falaron sobre diversas mulleres do pasado e do presente, salientando o seu labor como pioneiras en distintos ámbitos, así como as adversidades ás que se enfrontaron pola súa propia condición de mulleres: Herminia González, Exeria, Avelina Valladares, Isabel Zendal, Pepa a Loba, Rita Fernández, Irene González... Nunha segunda parte do seu traballo de investigación, que dan a coñecer neste programa, centráronse nas mulleres contemporáneas da nosa contorna e esta foi a quenda para Rosa de Cabanas, Elena Ferro, Mónica Rey Baltar, Vanesa Casal (Casal de Creación) e Mar Blanco. 

Entre o silencio e a música, a nosa microliteratura

Os nosos microrrelatos e micropoemas agroman na primavera "porque os escrebemos no tempo silencioso da invernia", como anunciaba Luísa Villalta, escritora a quen se lle dedica este ano o Día das Letras Galegas e que, por este mesmo motivo, amadriña o XI Concurso de Microrrelatos e Micropoemas DinamizaEstrada, convocado polos Equipos de Normalización Lingüística dos centros de ensino do noso concello. 

Nesta nova edición voltaron participar centos de estudantes con micropoemas e microrrelatos que debían incluír as palabras "silencio" e "música", respectivamente, escollidas no 1º trimestre nunha votación polos escolares de entre unha serie de termos recollidos na obra de Luísa Villalta. Non foi doado o labor dos xurados dos respectivos centros nin do xurado da fase final, que se reuniu a finais de febreiro para seleccionar os textos e deseños gañadores entre os máis de 200 traballos finalistas. 

Tamén se fala da Estrada no MillaFALAdoiro

A campaña Aquí Tamén se Fala que se desenvolve no noso centro e en máis de 180 centros de ensino de toda Galicia chegou á radio escolar do IES do Milladoiro (Ames), o MillaFALAdoiro. Os alumnos e Brais Tato Mejuto e Pedro Souto Riveira e o profesor Román foron entrevistados por Diego Madarnás, un rapaz deste centro amesán que conta cunha sección propia, as Entrevistas con Diego, que vos animamos a escoitar. Grazas a Diego e aos técnicos Erik e Mario, así como oa profesorado coordinador da radio, Valentina Formoso e Manolo Maseda, por contar connosco para afirmar unha vez máis que #aquítaménsefala e moito!

"O espello de Claude", fotografía e identidade na adolescencia

23-24 O espello de Claude

O proxecto "O espello de Claude" regresou ao noso centro da man do fotógrafo e psicólogo Fuco Reyes e grazas ao patrocinio de //Afundación. Obra Social ABANCA. Nos últimos meses o alumnado de 3º e 4º ESO da materia de Educación Plástica traballou neste laboratorio de fotografía e identidade para adolescentes que procura ver a través do obxectivo da cámara diferentes aspectos clave desta etapa de transición como a construción da identidade, a autoimaxe, a autoestima, a xestión das emocións e a motivación. 

O proxecto articúlase en dúas partes, as sesións de traballo co grupo na que se expoñen os diferentes temas e se visualizan imaxes propias e de autores e autoras recoñecidas; e o desenvolvemento dun pequeno proxecto artístico que permita plasmar como sente e pensa a adolescencia en relación a temas que lle son importantes.

Viva o noso alumnado!!!

Atención, señores, digan todos á miña voz, vivan os entroidos de Santa María de Couso cos seus correos, xenerais, coros e directores que os mandan e dirixen!
VIVA!
Viva a xente que nos rodea e mira!
VIVA!
Viva a nosa unión!
VIVA!
Atención, señores, digan todos á miña voz, Viva o IES N1 da Estrada cos seus alumnos, profesores e equipo directivo que manda e dirixe!
VIVA!
Viva a xente que nos rodea e mira!
VIVA!
Viva a nosa unión!
VIVA!
 

Así foi o Festival do Entroido 2024

23-24 Entroido

Un ano máis, o espírito do entroido invadiu o noso centro grazas á implicación de toda a comunidade educativa. Os disfraces, a imaxinación, a creatividade e o bo humor voltaron ás aulas e aos corredores durante as últimas semanas, nas que os diferentes grupos estiveron preparando as súas actuacións nas Titorías. E este venres pasado, 9 de febreiro, baixo a coordinación da profesora Ana Mesego e o alumnado de 4º ESO, eclosionou a festa, que tivo o seu momento máis especial no festival, no que os grupos presentaron os seus números. 

Houbo coreografías, crítica de temas de actualidade, representación de historias de sempre e fantasías, con Pablo, Iria e Carla como presentadores con moito oficio, con Hugo e compañía na parte técnica e cun xurado de profesores/as que o tivo moi difícil para resolver a difícil papeleta de elixir os mellores números do festival. 

O importante era participar e reecontrarse de forma festiva máis é de xustiza recoñecer que "O consultorio de Charo e Chari" (4º ESO A) e "Wonka" (1º ESO B) brillaron con luz propia e gañaron, ex aequo, o concurso. 

Os nosos parabéns e o agradecemento a todos e todas as participantes e até o ano que vén. Que viva o entroido!

Nas ondas con Pedro Souto Riveira

Pedro Souto Riveira, alumno de 4º ESO, participou hoxe no programa nº 408 (07-02-2024) do Proxecto Neo, unha experiencia radiofónica veterana e recoñecida do IES Perdouro de Burela. A partir do minuto 48, o Pedro falou das súas paixóns e experiencias en proxectos educativos e locais. 

Houbo tempo para dar a coñecer o Praíña Sp. C, do clube e mais del mesmo como xogador; divulgar a tradición dos Xenerais da Ulla, especialmente do Entroido de Couso; e comentar a súa implicación en iniciativas audiovisuais e na campaña Aquí tamén se fala do IES Nº 1. Falou Pedro e falou ben!

Estamos moi agradecid@s a Bernardo Penabade e Vanesa Vila-Verde por convidarnos a participar neste proxecto referente da radio escolar e o diálogo intercultural. Foi un pracer! Convidámosvos a escoitalo!!!

O Proxecto Neo conecta A Estrada e Burela

O noso centro estivo presente na emisión nº 406 (31-01-2024) do programa radiofónico do Proxecto Neo, unha iniciativa educativa nacida  hai 12 anos no seo do Modelo Burela como proxecto de innovación educativa do IES Perdouro. Este programa de diálogo intercultural está en antena todos os mércores entre as 5 e as 6 da tarde e pódese escoitar en calquera lugar do mundo a través da radio á carta ou das emisoras Radio Foz e Radio Valadouro na Mariña, Cuac FM na Coruña, Radio Filispín en Ferrol, A Xente de Teo en Compostela e Radio Piratona en Vigo 

Regresa a Revista Viva. Nós de Nós. De Nós para Vós.

Regresa a Revista Viva na súa 7ª edición. A anterior celebrouse en 2019 e, tras a paréntese da pandemia, chegou o momento de recuperala.

Revista Viva "Nós de Nós", un instituto vivo. Unha comunidade educativa aberta, dinámica, activa, comprometida co ensino público.

Revista Viva. Teatro, música, lingua, literatura, recoñecementos varios para dentro e para fóra. De Nós para Vós.

Revista Viva. Teatro Principal da Estrada. Martes 20 ás 16:30. Estades convidad@s!

Revista Viva. Deseño de Rosa de Cabanas.

As fendas de xénero no ámbito laboral

Uxía Seoane, Pilar González e Ángel Rey (4º ESO) participaron nunha nova entrega de "A ollada da sospeita", proxecto que conduce Lara Fuentes, nesta ocasión en compaña de Xiao Aller, para o programa A Galería de Radio Estrada.
Uxía, Pilar e Ángel deron a coñecer as conclusións do estudo que realizaron sobre a situación laboral da muller da nosa contorna. Esta non é a primeira vez que o alumnado do IES Nº 1 colabora coa sección "As historias non contadas" e, de seguro, que non ha ser a última no que resta de curso. A Ollada da Sospeita nas redes: Spotify, Instagram e Ivoox.

Francisco Fernández del Riego e o patrimonio lúdico galego

A celebración do Día das Letras Galegas dedicado á figura de Francisco Fernández del Riego tomou corpo onte, sábado 20 de maio, nun episodio especial do espazo "Recuncho da lingua" de Radio Estrada, dedicado aos xogos populares e tradicionais. 

Esta vinculación débese a que, por primeira vez, dentro da programación de actividades dun Día das Letras, se incluíu unha exposición que reúne os xogos e xoguetes que formaron parte da vida do autor homenaxeado. A mostra "Don Paco, o pícaro argalleiro", pode visitarse no Mosteiro de San Salvador de Vilanova de Lourenzá e recolle os xogos e xoguetes citados por el como parte da súa crianza. 

Nesta ocasión, no programa conducido por Pilar Bernárdez participaron alumnos e alumnas do noso instituto e dos colexios Pérez Viondi, O Foxo e Cabada Vázquez , que fixo posible o marabilloso encontro de catro xeracións de estradenses.

Bolsas e axudas para alumnado con necesidade específica de apoio educativo

Está aberto o prazo para solicitar as bolsas e axudas para alumnado con necesidades específicas de apoio educativo, convocadas polo Ministerio de Educación e FP.

A solicitude realizarase telemáticamente a través de Sede Electrónica dende o 8 de maio ata o 20 de setembro. Unha vez cumprimentada a solicitude telemática, débese imprimir e presentar no centro educativo xunto coa documentación requirida. 

Toda a información neste enlace.

 

Galego de premio

Éxito da exposición benéfica 'Un debuxo, unha ilusión' de Suso Pardal

Velaquí os dous debuxos de Jesús Pardal adquiridos polo centro na exposición benéfica "Un debuxo. Unha ilusión" e que xa forman parte do patrimonio do centro. A mostra foi todo un éxito e os fondos recadados foron destinados á Asociación de Nenos Oncolóxicos de Galicia (ASANOG), que arroupou a Suso nas súas estadias no hospital e da que o noso alumno é un activo colaborador. Máis información en

"Un debuxo. Unha ilusión", por Suso Pardal

Fotografía de Miguel Souto para La Voz de Galicia
Suso Pardal, alumno de 2º ESO, mostrará os debuxos que realizou durante as etapas que estivo internado no Hospital Clínico de Santiago. A exposición benéfica poderá visitarse este sábado e domingo no Café Bar Casa Pernas de Pontevea (Teo) e a inauguración de "Un debuxo. Unha ilusión" terá lugar ás 12.30 horas. Os fondos recadados irán destinados á Asociación de Nenos Oncolóxicos de Galicia (ASANOG).
Noraboa, Suso, es todo un exemplo.

O xadrez segue a dinamizar os recreos

Torneo de Xadrez (abril 2023)

O xadrez nos recreos segue reunindo un bo número de alumnos e alumnas na Biblioteca e esta semana rematou un novo ciclo, como non, con torneo. De mans do seu profesor de Xadrez, Roberto, os alumnos Rodrigo Folgar, Aarón Basteiro, Aarón Zamar e Saúl Otero recibiron as medallas que os acreditan como os xogadores máis avanzados nesta última fase.
Pero esta é unha actividade que vai moito máis alá: axuda a mellorar a concentración, o pensamento lóxico e a creatividade, mais tamén a gañar autoestima e confianza, a superar problemas de comunicación..., e (se cadra) o máis importante, favorece a empatía e o respecto entre todos e todas.
Así que non queda máis que darlles a noraboa a todos os participantes e expresar o noso agradecemento a Roberto polo seu labor.

PREMIOS EXTRAORDINARIOS DE ESO AO RENDEMENTO ACADÉMICO

Recementemente publicouse a ORDE do 31 de marzo de 2023 pola que se convocan os premios extraordinarios de ESO ao rendemento académico correspondentes ao curso 2022/23.

O obxectivo é premiar aos alumnos e alumnas de mellor expediente académico nos estudos de Educación Secundaria Obrigatoria.

Destinatarios: alumnado que estea proposto polo equipo docente para a expedición do título de graduado en ESO e obtivese no conxunto dos catro cursos de educación secundaria obrigatoria unha nota media igual ou superior a 9,00 puntos.

II Mostra de Orientación

O alumnado do IES Nº1 participou na II Mostra de Orientación, que se celebrou o 28 e 29 de marzo no recinto feiral do Concello da Estrada. Mediante charlas informativas e visitas aos stands, agardamos espertar vocacións, intereses e inquietudes e contribuír, dalgún xeito, á toma de decisións educativas e profesionais dos nosos alumnos e alumnas.  

22-23 3ª Mostra de orientación

BO NADAL - Este ano toca Nadal

O IES Nº 1 da Estrada deséxalles unhas Boas Festas e un Feliz Ano Novo.

Ademais, queremos agradecer o labor da alumna Uxía Seoane, que aínda quita tempo para agasallarnos con este vídeo de felicitación, cheo de esperanza e de bos desexos para estes tempos de incertezas.

Moitas grazas e parabéns, Uxía.

Voltamos o 10 de xaneiro!

Ventilación e COVID-19

Calendario Exames de Pendentes - Febreiro, 2021

Campamentos de Verán 2017

Campamentos de Verán 2017

 

Guía de Orientación Académica 2012-13

Calendario EXAMES febreiro 12-13

Manual de boas prácticas de consumo no Nadal

Distribuir contido