O día 3 de outubro tivemos o privilexio de contar coa presenza no noso centro da poetisa mexicana Teresa de la Fuente grazas á colaboración do Círculo Poético Ourensán, representado, neste acto, por José Ramón Fdez Morgade e María Glez Méndez, e acompañados de Irma del Ángel que comparte cartel no X Encontro Internacional de Poesía que se celebrará en Ourense entre o 4 e 6 de outubro.

O alumnado do noso centro recibiuna na biblioteca e presentoulle os traballos realizados ao longo da semana nas súas clases: coplas sobre a súa vida e obra, recitaxe de varios dos seus poemas, ilustracións e cartaces dos poemas traballados na Hora de ler... Posteriormente, unha vez rematada a súa presentación, foi “sometida” a unha complicada batería de preguntas polo alumnado e profesorado que a poetisa accedeu a responder amablemente e con moita paciencia.

Para rematar o acto, Teresa de la Fuente, recitounos varios dos seus poemas recollidos no poemario “Entre metáforas e café” do que é coautora.

Despediuse de nós moi emocionada e agradecendo o recibimento outorgado.

Na seguinte galería de imaxes podedes observar os mellores momentos do encontro:

O 19 de febreiro participamos en “Encontros coa autora” con Iria Misa, autora do libro “Mamá, quero ser Ziggy Stardust” e organizado pola concellería de educación nas instalacións do Liceo de Ourense co fin da promoción do hábito lector entre os escolares ourensáns e o traballo en valores.

A actividade comezou coa dotación, por parte da Concellería dos libros seleccionados para este curso para a súa lectura na aula e o posterior encontro co autor do libro.

Esta actividade ten dous importante obxectivos. Por unha banda poñer en contacto directo aos escolares cos escritores e ilustradores e por outra banda, dar a coñecer e preto o traballo dun escritor e ilustrador.

Os libros foron entregados aos escolares no mes de decembro e hai unhas semanas e tras a lectura, realizouse o encontro con Iria Misa, momento no que o alumnado tivo a oportunidade de coñecela e conversar con ela sobre a temática do libro e as principais mensaxes que se achegaban coa súa lectura.

Antes de asistir a estes encontros, o alumnado de quinto e sexto curso do noso cole xa fixera un traballo exhaustivo desta obra de Iria Misa.

O resumo argumental do libro, trata da historia de Aine, quen naceu cun corpo aparentemente de nena, pero en realidade séntese neno. Aine conta cun amigo imaxinario chamado Thomas, como xeito de fuxida dunha realidade que o abafa.

Nunha viaxe turística cos seus pais, Aine descobre a figura do músico David Bowie, coa que se identifica de inmediato. Desde entón, Thomas e Aine xogan a disfrazarse de Ziggy Stardust, o personaxe creado por Bowie, e a actuar enriba da cama coma se fose un escenario.

O pai de Aine non comprende ao seu fillo. Pero Fran, a súa nai, pouco a pouco irá reaccionando e aceptando a Aine tal e como é, o que provocará a ruptura co seu home. Tampouco a familia extensa de Aine se amosa moi comprensiva co que ven como unha simple teima dunha nena por vestirse e comportarse como un rapaz. Aine visitará a psicólogos, e sufrirá o rexeitamento de moitos compañeiros de escola, e das súas familias, na escola. Pero finalmente conseguirá realizar o seu soño: vivir de acordo a como sente a súa identidade de xénero e actuar na festa de fin de curso do colexio.

Neste libro profundan na transexualidade.  Aine é un neno trans que loita por poder mostrarse ao mundo tal e como se sente. Destaca tamén David Bowie como exemplo. A figura do músico está moi presente na novela como referente de persoa de éxito malia non encaixar sempre nos canons impostos socialmente, e é usado por Aine para afirmarse nun mundo que non quere aceptalo tal e como é.

Os escolares tiveron que realizar unha serie de actividades antes e despois da lectura. Primeiro tiñan que observar a portada e razoar a partir de aí sobre que pensaban que trataba o libro. Tamén tiveron que responder a cal foi o último libro que leron e o que máis lles gustou.

Tras a lectura, discutiron na clase sobre como a presión social e as súas convencións condicionan a liberdade individual e o dereito á diferenza. Outro dos aspectos que tiñan que respostar tiña que ver con David Bowie, comentar a súa figura e a súa música na clase.

O 5 de outubro tivemos o privilexio de contar coa presenza da poetisa de orixe cubano Leanne Rivera grazas á colaboración do Círculo poético ourensán.

O alumnado do noso centro rendeulle unha pequena homenaxe cos traballos que realizaron nas súas clases ao longo dos días previos á súa visita:

• Coplas de presentación. Alumnado de 5º EP.
• Poema"De vez en cuando". Alumnado de EI.
• Poema "Luz de plata". Alumnado de 1º EP.
• Poema "Presludio". Alumnado de 2º EP.
• Poema "Aquí sigo". Alumnado de 6º EP.
• Agasallo do alumnado de 4º EP.
• Análise das súas frases. Alumnado de 4º EP.

Despois de sometela a unha pequena encerrona, con preguntas de todo tipo sobre a súa vida e obra, Leanne recitounos o poema que tiña preparado para participar nos IX encontros internacionais de poesía que organizou o Círculo poético ourensán.

Na seguinte galería amosamos os principais momentos do encontro coa poetisa.

Leanne Rivera naceu en Cuba, na provincia de Santiago de Cuba, no ano 1979.

De profesión é estilista, pero a súa paixón é escribir poesía.

De nena, xa lle gustaba escribir relatos curtos, poemas e frases. Na actualidade, procura escribir todos os días, aínda que só sexa unha liña e procura anotar todo o que lle pasa pola cabeza, letras que se xuntan, liñas que van crecendo e que se fan poesía dando acougo á súa alma.

Ao longo da súa vida, ten participado en numerosos recitais de poesía.

Ten unha páxina web, co nome de Lúa Negra, onde se publican parte dos seus poemas.

En Facebook pódese seguir na seguinte ligazón...

RECURSOS PARA TRABALLAR NA AULA

• Presentación sobre Leanne Rivera.
• Galería de imaxes das súas frases.
• Poema "Sintonía".
• Un dos seus poemas favoritos.

O 6 de outubro tivemos o privilexio de contar na biblioteca do noso centro coa poetisa Irma Ruth del Ángel grazas á colaboración que ano tras ano nos ofrece o Círculo poético ourensán.Ao longo da semana o alumnado realizou diferentes traballos de documentación nas súas aulas sobre Irma Ruth e o seu pobo de orixe: San Luís de Potosí.

Acollemos a Irma amosándolle todos os traballos que realizaramos cos nosos mestres. O acto estivo presidido por un dos animaliños que máis lle gustan á escritora: "Os gatos". Contounos que ese cariño cara os micos, venlle de cando era moi pequena xa que o seu pai lle regalara un co que xogaba a todas horas. Na actualidade ten dous gatos. Na Asociación Libre San Luís de Potosí, que ela preside, dedícanse a coidar e recoller os gatos da rúa e a dalos en adopción a outras familias.

Tamén nos falou do traballo que realizan na fundación de rehabilitación de adictos que ela creou fai anos. Emprega a poesía para traballar con estas persoas e así animalos a retomar os seus estudos.

Ademais de escribir, quédalle tempo para dar clases en diferentes universidades, nunha delas ensina criminalística e balística aos futuros policías.

Sacounos de dúbidas sobre a Cova das Andoriñas, xa que nos dixo que os paxaros que alí habitan son morcegos que de día se pegan ás paredes da gruta e de noite saen pola súa boca de entrada.

Por último, descubrimos que un dos pratos típicos de San Luís de Potosí é a "enchilada de frijoles con aguacate".

Irma é unha persoa polifacética. Unha actividade coa que ela desfruta moito é contando contos. A nós deleitounos cunha fermosa historia mexicana que nos ensina o "Por que os coellos teñen as orellas tan longas?". Pasámolo xenial escoitándoa e véndoa en acción.

Desde aquí queremos dar as grazas a Irma e aos membros do Círculo Poético por este encontro na nosa biblioteca.

Nace en San Luis Potosí, México o 26 de abril de 1966.

Ten unha ampla formación Académica: Licenciada en Español e en Economía.  Especializada en Avaliación de Proxectos de Inversión, Turísticos e Gobernamentais. Especialización en Orientación Educativa. Mestría en Educación, campo: Formación de Docentes e Práctica profesional. Mestría en Economía Social, Mestría en Criminalística. Doutora en Literatura e Linguaxe. Catedrática de diferentes universidades e institucións de Educación Superior.

Articulista en diferentes revistas e xornais nacionais.

Fundadora e Presidenta da Asociación LIBRE SAN LUIS.

Impartiu conferencias en diferentes institucións educativas a nivel Local, Nacional e Internacional. Entre os países destacan: España, Italia, Francia y Suíza.

Participante en diferentes encontros nacionais e internacionais de escritores.

Representante Legal da Colección Haberes e Saberes. Edicións educativas da Universidade Pedagóxica Nacional, Unidade 241.

Foi galardonada no ano 2010 coa estatuiña “La Orensana”, recoñecemento outorgado á súa obra poética pola cidade Ourense.

Creadora do proxecto social: ‘Rehabilitándonos en el contexto’ desde 1982 á actualidade en rehabilitación a xóvenes que son adictos. Presidenta do Consello Consultivo e Social do Instituto das Mulleres do Estado de San Luis Potosí período 2009-2012. Así mesmo, é fundadora e presidenta da Asociación Libre San Luis.

Contacontos rexistrada no Centro das Artes Centenario de San Luis Potosí.

LIBROS PUBLICADOS:

1. Viene la muerte cantando, 1999
2. Breves poemas de amor, para un funeral en vida, 2000
3. Esencias Humanas, 2003
4. De Cuentos, Poemas y algo más, como Coeditora, 2006.
5. Reminiscencias, 2006.
6. Palabras…de Mujer. 2007
7. Voces de muerte sonaron. 2008
8. Entorno Sociopolítico y Económico de México. En coautoría con el Dr. Agustín Ramírez García. Edit. Ediciones Ramírez. México, 2008.
9. Reminiscencias, segunda edición, corregida y aumentada. 2009
10. Palabras Potosinas. La escritura en camino, como coeditora. 2010
11. Principios de Geopolítica y estudios de la economía mundial. En coautoría con el Dr. Agustín Ramírez García. Edit. Ediciones Ramírez. México, 2009.
12. Casi de cuento: Del brazo, por la calle, por el barrio, por el mundo. En coautoría con el dramaturgo Jorge Alberto Quiroga Malo. 2010.
13. Los silencios de Frida. Editorial el Taller del Poeta. Pontevedra, España, 2011.
14. Rostros emergiendo de la tierra, como coeditora. México, 2010.
15. San Luis Potosí y Ourense cantan a la niñez. Como enlace cultural entre México y España. Edit. El Taller del Poeta, Pontevedra, España. 2010.
16. Tríada. En coautoría con la poeta potosina Teresa de la Fuente y el poeta cubano Ángel Collado. Edit. El Taller del Poeta, Pontevedra, España. 2011
17. Toda-Vía. Libro artesanal elaborado en papel hecho a mano. Presentado en España.  2012
18. Tras-Pasos. Libro ganador con mención Honorífica en la Edición 61 de los Premios 20 de Noviembre, emisión 2012.
19. He sido acusada: Por el placer de recordar. Edit. Haberes y Saberes. México. 2014
20. Buscando a Dios en tiempo de elecciones. Editorial Torbellino. México. 2015.
21. Poerelatos de una ciudadana y un poema suelto. Editado por el Sindicato Nacional de Trabajadores de la Educación Octubre, 2016.
22. Los arqueos del gato. En proceso de edición

A súa obra foi traducida ao  inglés, portugués, italiano, galego, chino cantonés e integrada en varias antoloxías. Asemade foi comentada en diferentes revistas e periódicos nacionais e internacionais.

RECURSOS

•  Vida e Obra en Google Presentacións.

Este ano, en sexto de Ed. primaria, estamos a desenvolver un proxecto documental titulado “Da man de Baldomero, pintura e escultura imos coñecer”. Con este traballo estudaremos distintos materiais e técnicas plásticas, así como estilos pictóricos e escultóricos.

A principios de febreiro, realizamos un obradoiro de plástica, dirixido polo prestixioso pintor ourensán Baldomero Moreiras. Con el realizamos un collage de pombas zurita e polipava.

No mes de marzo volverá a ensinarnos máis cousas

Asemade, aproveitamos para facerlle esta entrevista. .

ENTREVISTA BALDOMERO MOREIRAS

P. Cando comenzaches a pintar?
R. De neno , na escola, o mestre dábame xices  de cores e pintaba e debuxaba no encerado  de cor negro que tiñamos en clase.

P. Inspíraste sempre en algo concreto?
R. Si sobre todo en Galicia, a natureza, os animais, os cabalos…

P. De non ser pintor. Que serías?
R. Pois... pintor.

P. Por que fixeches as bolas de neve?
R. Porque son dun personaxe sacado do libro de Merlín e familia de Álvaro Cunqueiro

P. Que opinas de que na escola aprendamos cousas con cadros de pintores famosos?
R. Paréceme moi ben, é unha idea estupenda.

P. Das bolas de neve que fixemos nós, cal che gusta máis?
R. A que máis me gusta e a das pombas  da Paz.

P. Paréceche tempo suficiente unha sesión de plástica á semana en Ed. Primaria?
R. Coido que deberiades ter polo menos tres horas semanais, pois a pintura e o debuxo son cousas moi boas.

O polifacético escritor Fran Alonso adicounos nas VII Xornadas de bibliotecas escolares de Galicia que se desenvolveron no mes de novembro en Santiago de Compostela, o último dos seus traballos destinado ao público infantil: "Poemas birollos para ler cos ollos".

O alumnado de 6º curso, como mostra de agradecemento pola súa atención, dedícalle un poema recitado desde o recanto de lecer da nosa biblioteca... esperamos que lle guste.

Nova na páxina de Edicións xerais

A editorial Xerais publicou na súa web unha nova sobre a interpretación que fixemos do poema de Fran Alonso.

• https://blog.xerais.gal/2017/o-alumnado-de-6o-de-primaria-do-ceip-manuel-sueiro-de-ourense-elabora-unha-cancion-composta-a-partir-dos-libros-de-poesia-infantil-de-fran-alonso/