IES de Soutomaior

Encantoume participar na maqueta da célula porque traballamos en equipo, aprendemos a confiar nos demais e estudamos facendo a célula.

Pareceume sorprendente que nós gañáramos porque a nosa célula, segundo o que eu penso, non era a mellor. Pero estou moi contenta polo premio.

Gustaríame moito volver a facer máis maquetas e máis traballos en grupo.

Gústanme moito este tipo de concursos, xa que nos axuda a aprender e profundizar máis nas materias que estamos dando.

Sorprendeume moito haber gañado o primeiro premio xa que habían células moi ben feitiñas, por exemplo, a célula que quedou en segundo posto, a de Ana, Carmen e Valentina; sen dúbida foi a que máis me gustou.

Tamén me pareceron xeniais os premios que nos deron aos tres primeiros grupos.

Espero que se fagan máis actividades deste tipo.

Miriam Martínez Lorenzo (1º ESO B)

Está mañá repartiuse entre o alumnado de 4º ESO a Guía de viaxe a Roma e Florencia, o primeiro produto do Proxecto Roma, un proxecto interdisciplinar que procura dotar de contido didáctico á saída de fin de etapa traballando dentro e fóra das aulas sobre os monumentos, a historia, a arte, a literatura e o cinema como forma de achegamento á realidade que o alumnado vai coñecer.

Para coñecer mellor o desenvolvemento do proxecto, visitade o blogue da biblioteca e esta galería de imaxes, que dá boa conta das horas de traballo voluntario nas tardes de febreiro e marzo dos 28 rapaces e rapazas participantes.

Non será o único traballo que verá a luz nas próximas semanas, mais teñamos paciencia e agardemos ao regreso para ver as novas producións do alumnado e o profesorado colaborador (Cris, Eloi, Marta, María, Bea e Román). Agora, toca gozar da viaxe!

O alumnado de Bacharelato do IES de Soutomaior estreouse no Parlamento Xove 2019 con dous equipos que acadaron uns bos resultados na súa primeira participación neste torneo de debate que organiza a Dirección Xeral de Xuventude, Participación e Voluntariado. A fase clasificatoria tivo lugar durante esta fin de semana (15 e 16 de marzo) no centro Residencial Docente da Consellería de Educación en Culleredo.

Os equipos, que partiparon por vez primeira nun certame destas características como actividade complementaria da materia "Obradoiro de Habilidades Comunicativas", obtiveron uns resultados moi positivos. O equipo composto por Cecilia Alonso, Talía García, Alejandro Gómez e Marta Reguera gañou dous debates mais non pasou á fase final no desempate por puntos. O equipo composto por Judith Domínguez, Xiana Herrero, Rolando Lago e Paula Ramallo, acadou unha moi boa puntuación de 381 puntos sobre un total de 480, cunha media de 127 puntos nunha escala de 160, aínda que non gañou ningún dos debates que disputaron con centros que quedaron na parte alta da clasificación.

Os profesores Román Cerqueiro e Orlando Molares, coordinadores dos equipos, destacan a implicación e o traballo desenvolvido na fase previa de investigación sobre o tema de debate: "Deberiamos unificar as políticas de acollida de persoas refuxiadas en todos os estados membros da Unión Europea?". Ademais, amosan a súa satisfacción pola grande progresión que experimentou o alumnado ao longo do día conforme se ían sucedendo os debates, ademais da limpeza coa que competiron nunha xornada de convivencia e aprendizaxe con equipos chegados de toda Galicia. O alumnado, pola súa banda, gozou tanto da experiencia que xa pensa na edición do próximo ano.

Moitos parabéns, Cecilia, Judith, Talía, Alejandro, Xiana, Rolando, Paula e Marta! Estarmos orgullosos/as do traballo que fixestes e do ben que representastes o noso centro.

- "Alumnos de Soutomaior, en Parlamento Xove", artigo no Atlántico Diario, 24-03-2019.

O pasado venres 1 de marzo celebramos o primeiro entroido do IES cun Concurso-Desfile no que participaron 12 grupos que encheron a mañá de humor, imaxinación e coreografías e actuacións enxeñosas, choqueiras e reinvindicativas. Ademais, houbo photocall e un Meco, que nos foi metendo en ambiente nos días previos. 

Hai que agradecer a colaboración de todo o alumnado e o profesorado que fixo posible a celebración, en especial ao presentador (Fernando Blanco) e aos membros do xurado (Gabino Pérez, Orlando e Marta pola banda do profesorado e mais Antía Cortegoso e Anxo Martínez en representación do alumnado). Aínda que todos e todas os participantes no concurso recibiron un aplauso merecido polo bos momentos que nos fixeron pasar e os traballos dos días prevos, houbo grupos gañadores, que foron:

• 1º Premio: 1º Bacharelato.
• Accésit á mellor coreografía: 1º ESO B.
• Accésit á proposta máis orixinal: 2º ESO B.
• Accésit ao mellor disfraz: 2º ESO A.

Na Galería de Imaxes do Entroido 2019 tedes unha boa mostra do que foi a celebración.