Skip to Content

Orientación

Programa de transición Primaria-ESO

Lun, 13/06/2022 - 20:37 — admin

 

O Equipo de Orientación, Dikra, Aroa e Nerea explican como funciona o IES ao alumnado do Padín Truiteiro

Xa pensando no vindeiro curso 22/23, como cada ano, lévanse a cabo no IES distintas actuacións para coordinármonos cos centros de Primaria e facilitar a transición do alumnado de Primaria á ESO. Así por exemplo, é fundamental a coordinación entre os distintos profesionais que coñecen o alumnado, polo que programamos reunións cos centros adscritos, os CEIP Manuel Padín Truiteiro e Ponte Sampaio.

Ademais, o pasado xoves 8 recibimos a visita do seu alumnado de 6º de Primaria, rapaces e rapazas que a partir de setembro comezarán unha nova etapa educativa no noso instituto. 

Lucía e Rosalía recibiron o alumnado de Ponte Sampaio

Alumnado do CEIP de Ponte Sampaio

Nesta xornada de acollida participou o Equipo de Orientación ao completo, pero, ademais de Alba, Paula, Lucía Gargallo e Lucía Galván, o acto de acollida contou coa axuda do alumnado acompañante, Lucía e Rosalía (2º ESO A), Nerea Agrafojo (1º ESO A) e Dikra e Aroa (2º ESO D), que compartiron a súa experiencia e resolveron as dúbidas do alumnado de 6º de EP: explicaron aspectos relevantes sobre o funcionamento do centro e a nova etapa educativa, mostraron os espazos e as instalacións e algúns proxectos e mesmo as evolucións das acrobacias de acrosport do alumnado da ESO. 

Coñecendo proxectos de Tecnoloxía con Rosalía e Lucía

Nerea presenta a horta en compañía de Dikra e Aroa

 

 

Vémonos a partir de setembro! Benvid@s! 

Obradoiro de Teatro

Lun, 13/06/2022 - 19:52 — Orientación

Unha selección de alumnado de 3º e 4º da ESO e 1º de Bacharelato tivo ocasión de participar no taller de teatro impartido no IES por Saida Rkiek Sghiar. Saida, veciña de Soutomaior, cursou estudos de Arte Dramática na Escola Superior de Arte Dramática de Vigo, e é directora de escena, actriz e autora de varios libros relacionados coa Arte Dramática.

A primeira xornada serviu de introdución teórica ao concepto de performance e rematou con prácticas e introdución a ferramentas básicas para preparar unha performance.

A segunda xornada foi adicada plenamente á interpretación, cunha actuación centrada no uso dos teléfonos móbiles, que pretende reflectir o "secuestro emocional" que estes ocasionan moitas veces, especialmente cando abusamos deles.

 

 

 

 

Na imaxe, o alumnado na súa representación "abducidos polos teléfonos móbiles".

 

Bolsas NEAE (Necesidade Específica de Apoio Educativo)

Mar, 24/05/2022 - 16:45 — Orientación

O Ministerio de Educación abre o prazo para solicitar as bolsas para o alumnado con NEAE.

Solicitude: aberto o prazo, ata o 30 de setembro de 2022.

Poderedes ler a convocatoria ou acceder a información completa aquí e, de cumprir os requisitos, tramitala online e entregar a documentación no centro.

Poderá ser beneficiario, de cumprir os requisitos (renta e patrimonio, necesidade de atención específica), o alumnado que:

  • Presente necesidades educativas especiais derivadas de Discapacidade (33% ou mais), Trastorno Grave de Conduta, ou Trastorno grave da comunicación e da linguaxe asociado a NEE.
  • Trastorno do espectro autista.
  • Altas Capacidades.

Atendendo ás bases, o alumnado que non teña ningún dos citados diagnósticos precisará certificar Discapacidade para ser candidato á beca NEAE. A discapacidade debe estar acreditada polo equipo de valoracións da Consellería de Política Social. Se non se dispón de tal acreditación, o Departamento de Orientación non poderá informar favorablemente.

Para estas e outras axudas, recoméndase ás familias de alumnado con especiais dificultades solicitar o recoñemento de discapacidade.

Solicitedes a bolsa ou non, aprovéitase para recomendar que acheguedes, en calquera momento do curso escolar, aquela documentación relacionada (cerficado de discapacidade, informes do SERGAS...) xa que nos axuda a facer un óptimo seguimento do alumnado.

Torneo de Xadrez Intercentros en Redondela

Sáb, 21/05/2022 - 11:07 — Orientación

Máis imaxes da xornada neste álbum fotográfico. 

   Alumnado de 1º e 2º de ESO acudiu á Alameda Castelao de Redondela para participar este vernes 20 de maio, no II Torneo de Xadrez Intercentros.

   Un total de 80 participantes de distintos centros da zona: os IES Mendiño, Floriani e Chapela; e os CEIP Santa Mariña, Cesantes, Quintela e Igrexa Chapela.

   Hai que destacar o carácter eminemente lúdico e educativo do torneo, que pretendía servir de iniciación e animar á práctica do xadrez, á marxe do resultado. Esto foi así, especialmente no caso do noso IES, no que acudimos cunha equipa pouco experimentada, que xogaban o seu primeiro torneo, coa premisa de pasalo ben e seguir aprendendo. A equipa formouse con alumnado que acudiu durante o curso a xogar os mércores á biblioteca. Ademais dos que puderon asistir nesta ocasión, hai outros alumnos/as que xogan ou queren aprender a xogar ao xadrez, polo que esperamos que este xerme vaia a máis.

   Ao rematar a actividade, entregáronse trofeos aos 3 primeiros alumnos/as clasificados e medallas a todos os participantes, e o Maestro FIDE  Xulio del Prado (de tan só 15 anos) deu unha pequena charla.

   Temos que destacar e agradecer a boa organización do torneo, a cargo da Concellería de Deportes de Redondela e o IES Pedro Floriani.

1º de ESO participa no Festival FIC Andaina

Lun, 02/05/2022 - 10:23 — Orientación

O alumnado de 1º de ESO acudiu ao FIC Andaina, o X Festival Internacional de curtametraxes e diversidade funcional, organizado pola asociación Andaina.

Tras unha poñencia e o visionado, puidemos votar a nosa favorita entre as 4 curtometraxes presentadas:

  • "Adopción especial”, que narrou as conversas dunha parella sobre a adopción dun neno/a con necesidades especiais.
  • “Orquesta Los Bengala”; onde o humor, a amizade e a familia xuntan forzas para axudar un dos protagonistas, que sofre demencia.
  • “Mordisquitos”; a historia dunha parella, co trasfondo da saúde mental.
  • “Intentando”; que xirou en torno ás conversas dun fillo co seu pai: a importancia de esforzarse, de non frustrarse e loitar por un mesmo, axudar os demais, respectar as diferenzas e non crerse superior a ninguén...

Aberto o prazo para Ensinanzas Superiores de Deseño, Conservación e Restauración, Arte Dramático e Música.

Mar, 26/04/2022 - 09:36 — Orientación

Publicáronse as instrucións para o acceso ás ensinanzas de réxime especial que se resumen a continuación.

A estas ensinanzas pódese acceder co título de Bacharelato (ou de ESO, só no caso das Ensinanzas Deportivas e algunha especialidade de Artes Plásticas e Deseño) e realizando unha proba específica ou sen o título aprobando unha proba (ademais da específica).

-  Ensinanzas superiores de Deseño (gráfico, interiores, produto e moda) para o curso 2022/23

  • Inscrición: do  22 de abril ó 23 de maio de 2022 incluídos.
  • Proba para os/as aspirantes que non cumpran o requisito de titulación de bacharelato para acceder ás ensinanzas artísticas superiores: o día 31 de maio no IES San Clemente de Santiago de Compostela.
  • Proba Específica: Celebrarase o 5 de xullo nas catro EASD de Galicia. 
  • Podes ver a oferta das Ensinanzas de Deseño aquí.
  • Le as instrucións completas para o acceso aquí.

- Ensinanzas superiores de Conservación e Restauración de Bens Culturais para o curso 2022/23

  • Inscrición: do  22 de abril ó 23 de maio de 2022 incluídos.
  • Proba para os/as aspirantes que non cumpran o requisito de titulación de bacharelato: 
  • O día 31 de maio  no IES San Clemente, de Santiago de Compostela. 
  • Proba específica: o 5 de xullo, na Escola Superior de Conservación e Restauración de Bens Culturais de Galicia.
  • Podes ver a oferta aquí.
  • Le as instrucións completas para o acceso aquí.

- Ensinanzas superiores de Arte Dramática para o curso 2022/23

  • Inscrición: do  22 de abril ó 23 de maio de 2022 incluídos.
  • Proba para os/as aspirantes que non cumpran o requisito de titulación de bacharelato: 
  • O día 31 de maio  no IES San Clemente, de Santiago de Compostela. 
  • Proba específica: as probas específicas de acceso ás ensinanzas superiores de Arte Dramática darán comenzo o día 4 de xullo na Escola Superior de Arte Dramática de Galicia.
  • Podes ver a oferta  aquí.
  • Le as instrucións completas para o acceso aquí.

-  Ensinanzas superiores de Música para o curso 2022/23

  • Inscrición: do  22 de abril ó 23 de maio de 2022 incluídos.
  • Proba para os/as aspirantes que non cumpran o requisito de titulación de bacharelato para acceder ás ensinanzas artísticas superiores: o día 31 de maio no IES San Clemente de Santiago de Compostela.
  • Proba Específica: a partir do 14 de xuño de 2022 en cada un dos conservatorios superiores de música de Galicia, según calendario e horario establecido polo conservatorio. 
  • Le as instrucións completas para o acceso aquí.

BACHARELATO: que materias escoller para o curso 2022/23?

Mér, 23/03/2022 - 11:39 — Orientación

Descarga o documento adxunto como axuda para as eleccións sobre as materias de 1º e 2º de Bacharelato. Ofrece un resumo dos contidos das materias, que son as materias de continuidade, e un recordatorio dos aspectos a ter en conta á hora de escoller as materias.

 

A oferta definitiva das materias poderá variar cada curso escolar segundo cambios normativos (LOMLOE) ou a demanda do alumnado.

Importante: adiántase o prazo para solicitar as BOLSAS MEC para ensinanzas postobrigatorias no curso 2022-2023

Dom, 20/03/2022 - 22:10 — Orientación

Publicouse a convocatoria de bolsas de carácter xeral para o curso académico 2022-2023 para o alumnado que vaia cursar ensinanzas postobrigatorias. Isto afecta a todo ao alumnado que vai cursar estudos de BACHARELATO ou FP (graos medio e superior) o próximo curso, así como os que van acceder á Universidade.

Prazo de solicitude Bolsas MEC: do 30 de marzo ao 12 de maio. Ampliación: até o 16 de maio.

É necesario que pidas a bolsa neste prazo, aínda que non se abrira o período de matrícula nos estudos que che interesan, non saibas o que vas estudar ou mesmo non saibas con seguridade se vas estudar ou non. Se cres que cumpres os requisitos, é importante que fagas a solicitude: pon os estudos máis probables e cara a setembro poderás cambialos.

Aquí podes ver todos os requisitos que tes que cumprir para ter dereito a recibir a bolsa (requisitos xerais, económicos e académicos).

A solicitude preséntase en liña, a través da páxina web do Ministerio, onde podes consultar toda a información.

Poden solicitar estas bolsas quen se vaia matricular no curso 2022/2023 en:
  • Primeiro e segundo curso de Bacharelato.
  • Formación Profesional de grao medio e de grao superior.
  • Ensinanzas artísticas profesionais.
  • Ensinanzas deportivas.
  • Estudos de idiomas en Escolas Oficiais.
  • Ensinanzas artísticas superiores.
  • Estudos relixiosos superiores.
  • Estudos militares superiores.
  • Cursos de preparación para probas de acceso á FP impartidos en centros públicos e privados concertados.
  • Formación Profesional Básica. 
  • Ensinanzas universitarias.

Bolsas para alumnado con NEAE: aínda non sabemos o prazo, pero é posible que se adianten tamén este curso, polo que, se é o caso, lembra solicitar o certificado de Discapacidade, e entregar no Dpto. de Orientación esta e calquera outra información actualizada.

Orientación ESO

Ven, 11/03/2022 - 12:13 — Orientación

O Departamento de Orientación programa sesións de Información Académica, para axudar o alumnado e as familias con dúbidas sobre as eleccións que deberán facer próximamente de cara ao curso 2022/23.

O alumnado será informado en horario lectivo, do 15 ao 25 de marzo.

As sesións para as familas interesesadas serán presenciais (1 persoa máximo por unidade familiar) e é necesario inscribirse cubrindo este FORMULARIO (data máxima: día previo á sesión).

DATAS das sesións para as familias:

4º de ESO para Familias: luns 21, de 19:30 a 20:45.

- Contidos: criterios de titulación e opcións futuras. Ciclos de FP, Ensinanzas de Réxime Especial, Bacharelato e Graos Universitarios. Bolsas MEC e NEAE. Premios extraordinarios da ESO.

3º de ESO para Familias: xoves 24, de 20h a 21h.

- Contidos: criterios de promoción e titulación na ESO. Itinerarios en 4º de ESO e Bacharelato. Acceso á Universidade (Graos) e Ciclos de FP. Ensinanzas de Réxime Especial. Bolsas NEAE.

2º de ESO para Familias: luns 21, de 18h a 19h.

- Temas: características da ESO.  Bolsas NEAE. Aspectos que se deben ter en conta na matrícula de 3º de ESO. Que poderei estudar despois de 4º de

Ademais, aproveitamos para recordarvos que podedes inscrivirvos aquí para a sesión da Escola de Familias que organiza a OMIX do Concello, o martes 22 ás 18,30h, cos seguintes contidos: Establecemento de normas e límites, prevención e intervención ante condutas violentas. Violencia intrafamiliar

Infinitas - 8M

Xov, 03/03/2022 - 19:15 — admin

Mañá dá comezo o programa do 8M, Día Internacional da  Muller, da Concellería de Igualdade e o CIM de Soutomaior, coa sesión de contacontos "Carabranca", a cargo da artista polifacética Iria Pinheiro. 

Baixo o lema "8M INFINITAS", a campaña deste ano céntrase na diversidade dos feminismos e seguirá o 11 de marzo coa proxección de "Nós, infinitas", documental realizado por Raquel Fernández e Coral Piñeiro no que coñeceremos as reflexións de diferentes mulleres de Soutomaior sobre a igualdade e os retos das mulleres actuais. Entre elas, contaremos cos testemuños de Lucía Castrillo e Sofía Martínez, alumnas de 4º ESO do noso centro.

Xa o venres 18, a biblioteca municipal acollerá unha conferencia sobre a evolución do movemento feminista dende a transición. impartida por Raquel Fernández. Gustaríanos destacar a presenza no programa desta ex-alumna do CPI Manuel Padín Truiteiro, especialista en Historia Contemporánea e impulsora da iniciativa @mulleresgalegas, que podedes coñecer nesta entrevista que lle fixo o Nós Diario.

Ademais, gustaríanos destacar que o cartel do programa foi deseñado por Elba Alján, tamén ex-alumna do Padín, Técnica en Ilustración e premio extraordinario nas ensinanzas artísticas profesionais na modalidade de deseño. Elba describe así esta ilustración: "Nela podemos ver un grupo de amigas coas que podemos identificarnos. Están en harmonía sentadas nun dos muros da Peneda, deixando así ver unha paisaxe da Ría de Vigo sobre a que destaca a Ponte de Rande. A  escena sucede durante a  noite e pódese ver unha representación do ciclo lunar completo (que forma un infinito), xa que estes dous elementos sempre estiveron ligadas á muller pola súa misticidade e influencia sobre os nosos períodos, así tamén lembrándonos as meigas".

Distribuir contido


by Dr. Radut