Skip to Content

Complementarias

Xornada de Formación do III Torneo de Debate Académico de Galicia

 

Esta mañá o alumnado de 1º de Bacharelato que cursa a materia optativa Obradoiro de Habilidades Comunicativas recibiu a formación preparatoria do III Torneo de Debate Académico de Galicia, no que o IES de Soutomaior contará con dous equipos.

Alba Formoso, profesora de oratoria, fundadora e presidenta da Escola de Debate e Oratoria TALKK, foi o encargada de impartir a formación, que se desenvolveu a través de videoconferencia debido ás restricións e medidas de seguridade obrigadas pola actual crise sanitaria. A pesar das limitacións do medio, o alumnado participou activamente nas propostas feitas por Alba Formoso, que introduciu as claves de iniciación ao debate, activou dinámicas que fixeron reflexionar o alumnado e deus a coñecer as características e a estrutura do torneo, que convocará na Coruña a 48 equipos e máis de 240 alumnos e alumnas entre o 25 de xaneiro e o 6 de febreiro.

Estes mesmo mércores publicarase a pregunta desta edición e a partir de entón comezará unha intensa fase de investigación sobre o tema proposto, a elaboración do argumentario e os discursos dos equipos e a súa posta en práctica. O camiño cara ao III TDAG aínda acaba de comezar.

O Plan Revitaliza volta ao noso centro

Esta semana o Plan Revitaliza achegou ao alumnado a problemática dos residuos para seguir afondando na conscienciación da súa xestión e da responsabilidade que temos todos e todas na súa redución e separación a través de alternativas necesarias como a compostaxe.

No marco deste programa educatrivo impulsado pola Deputación de Pontevedra, o Departamento de Bioloxía e Xeoloxía organizou dúas charlas orientadas ao alumnado de 1º ESO e 1º BACH.

Da man de Teixugo S. Coop Ambiental, os máis cativos e cativas coñeceron máis polo miúdo quen son os "intrusos no composteiro". Nesta actividade analizáronse os residuos impropios que se poden atopar nos composteiros, a súa orixe, composición e os seus efectos sobre o medio. O principal obxectivo da charla foi identificar os microplásticos e coñecer o seu impacto ambiental.

Por outra banda, o alumnado de Bacharelato conseguiu, a través de sinxelos capturadores de fauna e material de aumento e chaves dicotómicas, realizar a identificación de invertebrados presentes no composteiro, sinalando a súa función no proceso da compostaxe.

Boleto premiado no Sorteo Pro-Excursión París 2020

A alerta sanitaria decretada en marzo de 2020 truncou a ilusión do alumnado de 4º ESO, que ía celebrar a fin de etapa cunha viaxe a París para a cal estiveron traballando durante meses, tanto para financiarse como para coñecer e gozar plenamente da visita á capital francesa a través do Proxecto París.

A suspensión das actividades lectivas adiou o último sorteo organizado para acadar cartos para a viaxe, consistente nun programa para 2 persoas no Balneario Mondariz (aloxamento de 1 noite, almorzo buffet e unha actividade termal: Palacio da Auga ou Circuíto Celta).

Unha vez rematado o Estado de Alarma, procedeuse a facer o sorteo. O boleto premiado é:

  • Número 1109, vendido pola alumna Adriana Barros.

No caso de non aparecer antes do venres 10 de xuño a persoa gañadora, que debe presentar a rifa, o boleto suplente corresponde co:

  • Número 1740, vendido polo alumno Adán Piñeiro.

Para retirar o premio é preciso poñérse en contacto co centro no teléfono 886.159.801 ou no correo ies.soutomaior@edu.xunta.gal.

O que Adriana Eugenio viu dende a súa xanela

adriana
 
Adriana Eugenio, alumna de 1º ESO B, vén de ser premiada no Concurso O que ves desde a túa xanela (categoría 12-14 anos) que convocou a Deputación co obxectivo de "descubrir a paisaxe que vemos desde a nosa xanela: as rúas, as árbores, o mar e o campo", mais tamén para "abrir unha xanela aos lugares aos que nos gustaría regresar e que partillamos coa familia e as amizades".
 
En palabras do xurado, o traballo de Adriana destaca "pola súa calidade artística amosando destreza na técnica da acuarela, a beleza dos trazos e o seu realismo".
 
Moitos parabéns, Adriana! Estendemos a nosa felicitación ás familias e ao profesorado de Plástica por animar e acompañar estes traballos de expresión artística dos rapaces e as rapazas durante o confinamento.

A Xeración da Igualdade protagoniza o 8 de marzo no instituto

O Comando Igualdade organizou unha pegada de lemas a prol da igualdade e un photocall para que miremos o mundo con ollada violeta. Ademais, ao longo desta semana aparecerán máis textos en diferentes espazos do instituto. Non deixedes de ver as fotos e coñecer as demandas da que sen úbida ningunha vai ser a Xeración da Igualdade nesta ligazón.

Así mesmo, a Biblioteca sumouse a esta data de reinvindicación preparando unha selección de lecturas que podedes coñecer entrando no seu blogue

Pompidou no Proxecto París

A experimentación, a creatividade e o traballo en equipo rachou moitos tópicos que existen sobre a arte contemporánea grazas ao obradoiro que se desenvolveu o pasado mércores na Biblioteca.

O alumnado anticipou a visita ao Centro de Arte Georges Pompidou que terá lugar a finais de marzo e coñeceu, aprendeu e gozou coas propostas dos Jeff Koons, Duchamp, Joseph Beauys, Louise Bourgeois, Matisse, Delaunay, Yves Klein, a escola da Bauhaus..., e coas súas propias creacións, xa que por un día exprimentaron con materiais, formas, cores... como ben se pode ver na crónica da sesión e nas súas caras de curiosidade, paixón e felicidade. 

Obradoiros da Semana da Ciencia

Ao teatro coas Troianas

De conversa con Iria Misa

O pasado venres 28 de febreiro visitounos a escritora Iria Misa, autora de obras xuvenís como Xa non estou aquí (2016) e O segredo do solpor (2018)... mais, sobre todo, de Mamá, quero ser Ziggy Stardust, unha novela que deixou unha forte pegada no alumnado de 1º ESO na materia de Lingua Galega. 

Máis imaxes aquí.

Iria Misa mantivo unha conversa moi ben guiada polos moderadores Breixo, Uxía e Zaira, encargados de facer as primeiras preguntas e dar paso ás consultas dos compañeiros e compañeiras. Soubemos así as motivacións que levaron a Iria a escribir esta novela, como comezou a escribir e publicar e como entende a escritura, a fermosa pegada deste libro nos lectores e lectoras e nela mesma...

Tamén estiveron moi presentes con nós Aine, Thomas..., os protagonistas de Mamá, quero ser Ziggy Stardust, que encarnan unha realidade que está aí, a da infancia transexual, a dos prexuízos que nos impoñen dende moi pequenos para sinalarnos como debemos actuar e como debemos ser por nacermos nenos ou nenas, a das violencias que sofren as persoas que non seguen os roles establecidos... Mais tamén, grazas á firmeza de Aine, á complicidade e comprensión da súa nai, a empatía de moitos outros personaxes ou a David Bowie, que para Iria Misa foi e é un referente moi importante á hora de escribir esta historia, entendemos que debemos perseverar naquilo que cremos e en ser nós mesmos para facer unha sociedade mellor, onde os afectos, a empatía e o respecto á diversidade afectivo-sexual e de todo tipo venzan a ignorancia e a discriminación.

Ao final, a hora pasou voando, fixemos moitas preguntas e aínda fariamos máis, a sinatura de libros que seguiu foi longa e quedamos coas ganas de repetir un novo encontro con iria Misa, a quen lle agradecemos moito a súa visita, a súa proximidade e o seu cariño.

Distribuir contido


by Dr. Radut