Skip to Content

Proxectos

O IES de Soutomaior participará en dous programas do Plan Proxecta 2019-2020

O noso centro foi seleccionado en dous programas do Plan Proxecta para o Curso 2019-2020 segundo a resolución provisional publicada hoxe pola Consellería de Educación, Universidade e Formación Profesional. Este Plan está orientado a fomentar a innovación educativa nos centros a través de programas educativos que desenvolvan as competencias clave como eixe do currículo e os elementos transversais, nos cales se inclúe a educación en valores.

En concreto, os programas aprobados son Educación Patrimonial e Escola Verde. No primeiro deles, baixo a Modalidade "Mirando polo Camiño", o alumnado (dende 1º da ESO a 1º de Bacharelato) pescudará sobre o patrimonio e os bens comúns do Camiño portugués desde o punto de vista antropolóxico, histórico, arqueolóxico, arquitectónico, xeográfico e lingüístico. Hai que de salientar que nesta modalidade só se admite un único centro en toda Galicia para cada un dos Camiños de Santiago e que, ademais, se enmarca dentro do desenvolvemento do Proxecto Interdisciplinar de Centro "Miña Casiña, meu lar".

No segundo dos programas, Escola Verde, foron seleccionados 10 centros escolares de todo o país, e pretende mellorar o comportamento ambiental do alumnado e o profesorado de todo o centro. Está coordinado polo Departamento de Bioloxía.

Mil Primaveras máis para a nosa lingua, pola igualdade de xénero e a celebración da diversidade

Galería de imaxes do acto aquí.

Onte foi día de festa grande en Pontevedra para o IES de Soutomaior. O proxecto Falemos de ti e min, desenvolvido durante o curso pasado, subiu ao escenario do Pazo da Cultura de Pontevedra para recoller o Premio Mil Primaveras ao Mellor Proxecto Novo xunto con outras cinco iniciativas que procuran poñer en valor e fomentar a lingua e incrementar o seu uso e prestixio na sociedade galega: o Modelo Burela do IES Perdouro; o Desafío 48 h do IES María Casares de Oleiros; Youtubeir@s dos SNL de 13 concellos, as tres universidades e a Deputación da Coruña; Eu presumo de galego do IES de Melide; e GCiencia, o portal da divulgación da ciencia en galego.

Dende o IES de Soutomaior agradecemos a acollida e o cariño da CTNL, colectivo convocante dos galardóns, e do Concello de Pontevedra, anfitrión do acto, e felicitamos aos outros centros de ensino e proxectos premiados por seren modelos de boas prácticas e referentes para nós no ámbito da normalización lingüística.

Mais, sobre todo, queremos destacar a implicación e o compromiso do alumnado do noso centro no desenvolvemento de Falemos de ti e min: sen eles/elas, verdadeiros artífices e destinatarios/as, o proxecto non sería posible. Moitos parabéns e mil grazas!

DISCURSO DE RECOLLIDA DO PREMIO MIL PRIMAVERAS

Eloi Gestido de la Torre (coordinador do proxecto)

En nome das persoas que formamos parte do Proxecto Falemos de ti e min, agradecemos o premio e felicitamos á Coordinadora de Traballadores e Traballadoras de Normalización da Lingua pola creación dos Mil Primaveras.

Sentimos moito orgullo por compartir este recoñecemento con cinco proxectos de tanta calidade, e que ademais son exemplo claro do bo facer a prol da nosa lingua e cultura.

Este acontecemento permítenos tamén agradecer publicamente o esforzo e apoio de todas as persoas e institucións que fixeron posible o Proxecto Falemos:

    • Especialmente, ímonos referir ao profesorado colaborador polo seu traballo e tantas horas e horas de dedicación,
    • e grazas, sobre todo, ao alumnado do instituto de Soutomaior, único protagonista deste proxecto e a quen vai dirixido realmente o premio.

Recibimos con moita ilusión este recoñecemento polo seu significado. Pero estarán de acordo connosco en que o maior premio será, sen dúbida, que os obxectivos do proxecto callen realmente no alumnado e que esta xeración e as futuras sexan quen de:

    • Valorar a nosa lingua e cultura
    • Acadar a Igualdade efectiva entre homes e mulleres
    • E, dunha vez por todas, expresar con normalidade a diversidade

Moitas grazas

PRENSA

  • "Seis proxectos reciben o premio "Mil Primaveras" pola posta en valor da lingua", Faro de Vigo (22-09-2019)
  • "Premio Mil Primaveras", La Voz de Galicia (22-09-2019).
  • "GCiencia recolle en Pontevedra o Premio Mil Primaveras", GCiencia (22-09-2019).

Revistas do IES de Soutomaior, a crónica do(s) noso(s) principio(s)

A revista do centro chegou puntual á fin do curso para ser a crónica viva do intenso labor desenvolvido no instituto no seu primeiro ano de vida, ademais de para ser canle da creatividade da comunidade educativa e potenciar o uso e a presenza da lingua galega entre nós.

Neste labor comunal acompañounos durante todo o curso o Blog da revista do IES de Soutomaior, unha plataforma dixital que complementou este proxecto no que colaboraron rapaces e rapazas, o profesorado e moitas máis persoas que fixeron connosco este camiño ilusionante que comezamos aló polo mes de setembro. 

Como sinala a Dirección do IES no Editorial da revista este foi o "principio", termo que conxugamos en plural para falarmos dos "principios" do noso proxecto educativo, que se proxectan nas páxinas desta revista.

Agradecemos a colaboración de todas as persoas que fixeron posible estes proxectos e agardamos xa por futuras entregas.

REVISTA DIXITAL DO IES DE SOUTOMAIOR

(PREME NA IMAXE PARA ACCEDER)

 

 BLOG DA REVISTA DO IES DE SOUTOMAIOR

(PREME NA IMAXE PARA ACCEDER)

Falemos de ti e min, Premio Mil Primaveras a proxectos de posta en valor e fomento do galego

O proxecto integrado de centro Falemos de ti e min: A cultura galega desde unha perspectiva integradora que se desenvolveu no noso IES durante este curso académico 2018-2019 vén de ser recoñecido na I Edición dos Premios Mil Primaveras na categoría "proxecto novo".

Estes galardóns, creados pola Coordinadora de Traballadores/as de Normalización da Lingua (CTNL), teñen como finalidade valorar, recoñecer e difundir accións, campañas, programas e proxectos que teñen como obxectivo principal a posta en valor e o fomento da lingua. O xurado destacou na súa resolución que Falemos de ti e min é un proxecto interdisciplinar que se desenvolveu durante todo o curso, que se dirixe a todo o alumnado e que é transversal pois implicou a todos os departamentos didácticos con actividades comúns e específicas a todos os niveis traballando con múltiples produtos finais e en formatos diferentes.

Ademais, valorou moi positivamente que a promoción da lingua se asocie con outros valores e causas sociais xustas, como a igualdade de xénero e a defensa da diversidade sexual, funcional e cultural, xa que se baseou en catro eixos de contidos: lingua galega, manifestacións culturais galegas, perspectiva de xénero e diversidade sexual, funcional e cultural. O proxecto desenvolveuse ao longo de todo o curso e naceu como forma de traballo con continuidade nos vindeiros anos.

Nesta I Edición dos Premios Mil Primaveras, Falemos de ti e min acompaña na nómina de proxectos galardoados a iniciativas referentes na promoción do idioma como Youtubei@s, GCiencia, o Modelo Burela (IES Perdouro), o Desafío 48h (IES María Casares) e Eu Presumo do Galego (IES de Melide), que vos animamos a coñecer.

Estes premios non teñen dotación económica e consisten no recoñecemento e na ampla difusión das accións, programas ou proxectos escollidos polo xurado. Para axudar a dar a coñecer os proxectos premiados, organizarase un acto público de entrega que terá lugar en Pontevedra o 21 de setembro.

Xa que logo, moitos parabéns a todo o alumnado e ao profesorado implicados polo traballo feito e o recoñecemento!

E Mil Primaveras máis para a nosa lingua!

Revista de prensa:

CTNL, Resólvense os Premios Mil Primaveras (26-06-2019).

Praza Pública, Seis proxectos que poden servir como modelo para asegurar 'Mil Primaveras' máis para a lingua galega (28-06-2019).

Cultura Galega, Fállanse os premios 'Mil primaveras' para poñer en valor a lingua (27-06-2019).

Sermos Galiza, Modelo Burela, Youtubeir@s e GCiencia, entre as gañadoras da primeira edición dos Premios Mil Primaveras (27-06-2019).

Nós TV, Youtubeir@s, GCiencia, Desafío 48h, Eu presumo de galego, Modelo Burela e Falemos de ti min, Premios Mil Primaveras da CTNL (27-6-2019).

GCiencia, GCiencia gaña o Premio Mil Primaveras ao fomento do galego (27-06-2019).

O alumnado dos Clubs de Lectura avalía a experiencia e despídese ata o próximo curso

Ao longo do curso fomos dando boa conta da marcha dos diferentes clubs que se activaron este ano no noso instituto e que implicaron a rapaces e rapazas de todos os cursos arredor dos libros e a lectura, entendida esta coma un acto social, lúdico e compartido no que agromaron vivencias e emocións únicas. 

Na mañá do luns 3 de xuño realizaron a sesión de avaliación final e completaron a enquisa un total de 32 participantes. Segundo as súas respostas, a experiencia foi moi positiva e parece que as boas sensacións os animará a repetir no curso que vén; de seguro que o boca a orella fará o resto e en setembro miraremos novas caras nos clubs. Se queredes coñecer máis polo miúdo a avaliación da actividade, non tedes máis que premer nesta ligazón.

Moitos parabéns ao alumnado participante! Vémonos en setembro!

I Semana da Diversidade Afectiva e Sexual

Entre o luns 20 e o venres 24 de maio celebrouse a I Semana da Diversidade Afectiva e Sexual do IES de Soutomaior, que deixou unha pegada importante na comunidade educativa e que chegou para quedar e medrar nos vindeiros cursos. Organizada polo Comando Igualdade, a iniciativa desenvolveuse no marco do Proxecto Falemos de ti e min e complementou outras accións e actividades que se foron desenvolvendo ao longo do curso.

O programa desta semana fixo visible a diversidade sexual e afectiva no noso instituto con actividades diversas que combinaron a reflexión, a denuncia dos prexuízos e os estereotipos, a reinvindicación dos dereitos do colectivo LGTBI..., e sempre trans-formando o centro dende un enfoque participativo e aberto, lúdico e festivo, de celebración e goce da diversidade, do colorido e dos sorrisos.

Nas seguintes ligazóns podedes coñecer o día a día do que foi esta I Semana da Diversidade Afectiva e Sexual: luns 20, martes 21, mércores 22, xoves 23 e venres 24.

Falemos de ti e min a través da BD e despedida dos Clubs de Lectura da Biblioteca

O Proxecto Falemos de ti e min tamén se concretou nun club de lectura de banda deseñada, Marcando a Diferenza, que dende o mes de outubro reuniu alumnado de diferentes cursos ao redor de obras que abordaron temáticas como a diversidade funcional, a diversidade de orientación sexual, a inmigración, as inxustizas, a guerra, a demencia senil, etc. As lecturas destes cómics achegaron vivencias e emocións doutras vidas que en moitas ocasións transitan de modo case invisible ao noso carón e que provocaron un grande impacto nun alumnado que, coas súas reflexións, converteu este club de lectura nunha experiencia moi enriquecedora. Podedes seguir o seu percorrido ao longo do curso nesta entrada do blog do proxecto.

Así mesmo, ao tempo que se despedía Marcando a Diferenza, os clubs de lectura de BD de 1º e 2º da ESO chegaron tamén á fin do curso coa lectura de Dad, de Nob, e Valiente, de Svetlana Chmakova, respectivamente. E fixérono cunha fermosa acción simbólica que recolle moi ben o espírito das lecturas deste ano: levantando muros "contra contra as desigualdades, contra as inxustizas, contra o acoso, o machismo, o racismo e todas esas actitudes que non queremos no centro".

Por último, o Equipo da Biblioteca quere agradecerlles ás bibliotecas escolares do IES de Poio, do IES Porto do Son e do CPI San Vicente A Baña o préstamo de exemplares dalgunhas obras de lectura dos diferentes clubs e proxectos do centro, xa que a optimización destes recursos públicos facilitou moito esta campaña de animación á lectura no noso centro.

Rastrexo Vasquida García: meigas, herbas e Inquisición

Durante meses, o alumnado de bacharelato estivo preparando unha preciosa actividade que puxo en escena o 16 de maio para os seus compañeiros e compañeiras de 3º e 4º de ESO: un rastrexo sobre a vida de Vasquida García polo monte e arredores da praia da Xunqueira.

Vasquida García foi unha muller do século XVI condenada por bruxería pola Inquisición con 100 azoutes e a expropiación das súas terras. O noso alumnado quixo contar a súa verdadeira historia, a dunha muller menciñeira coñecedora das dotes curativas das plantas que viviu fóra dos camiños marcados para as mulleres daquela época.

Recomendamos vivamente acceder a esta entrada do blog do Proxecto Falemos para coñecer como se desenvolveu esta iniciativa ao longo de boa parte deste curso e como decorreu unha xornada cuxos protagonistas, organizadores/as e participantes, gardarán xa para sempre na súa memoria.

Literatura, música e muller na véspera do Día das Letras Galegas

O pasado xoves 16 de maio o alumnado de 1º da ESO puido asistir a unha dupla actuación no ximnasio do IES. Por unha banda, os diferentes grupos de 2º ESO realizaron unhas actuacións musicais e de baile, mentres que, por outra banda, o alumnado de 4º da ESO impresionou os seus compañeiros e compañeiras cunhas preciosas escenificacións de poemas realizados por autores e autoras coñecidas.

Para coñecer polo miúdo estas dúas actividades convidámosvos a entrar no blogue do proxecto Falemos de ti e de min, onde teredes cumprida información do desenvolvemento destes traballos, acceso ás letras compostas polo alumnado, imaxes e outros materiais que dan boa conta do grande labor realizado polos rapaces e rapazas destes cursos e o seu profesorado.

O IES de Soutomaior pechou unha semana dedicada ás Letras Galegas, nova no dixital Galicia Sur (23-05-2019).

Un xogo de investigación para reinvindicar o papel das mulleres na nosa historia colectiva

Que si, que si, que non é brincadeira! O noso instituto recibiu o pasado xoves 16 de maio a visita de nada máis e nada menos que María Pita, María Balteira, Isabel Barreto, Maruja Mallo, Sofía Casanova, Manuela e Aurora Liste, as irmás Touza, Elisa e Marcela, As Marías, María Vinyals, Concepción Arenal e Pepa A Loba. Mulleres pioneiras que axudaron a escribir a mellor historia de Galicia coa súa traxectoria e o seu exemplo en diversos campos e que forman parte xa da memoria do alumnado que participou o xoves 16 de maio no xogo de investigación Mulleres na Historia de Galicia.

En concreto, foi o alumnado de 4º da ESO Académicas quen preparou esta actividade para os rapaces e rapazas de 1º ESO. E non só a investigou e organizou previamente nin só supervisou a xornada, senón que se transformou naquelas grandes mulleres nunha marabillosa caracterización que será difícil de esquecer. 

A explicación e unha selección de fotografías da actividade están dispoñibles nesta crónica do blog do Proxecto Falemos, así como neste Álbum de Imaxes.

Distribuir contido


by Dr. Radut