Skip to Content

Literatura, música e muller na véspera do Día das Letras Galegas

O pasado xoves 16 de maio o alumnado de 1º da ESO puido asistir a unha dupla actuación no ximnasio do IES. Por unha banda, os diferentes grupos de 2º ESO realizaron unhas actuacións musicais e de baile, mentres que, por outra banda, o alumnado de 4º da ESO impresionou os seus compañeiros e compañeiras cunhas preciosas escenificacións de poemas realizados por autores e autoras coñecidas.

Para coñecer polo miúdo estas dúas actividades convidámosvos a entrar no blogue do proxecto Falemos de ti e de min, onde teredes cumprida información do desenvolvemento destes traballos, acceso ás letras compostas polo alumnado, imaxes e outros materiais que dan boa conta do grande labor realizado polos rapaces e rapazas destes cursos e o seu profesorado.

O IES de Soutomaior pechou unha semana dedicada ás Letras Galegas, nova no dixital Galicia Sur (23-05-2019).

Un xogo de investigación para reinvindicar o papel das mulleres na nosa historia colectiva

Que si, que si, que non é brincadeira! O noso instituto recibiu o pasado xoves 16 de maio a visita de nada máis e nada menos que María Pita, María Balteira, Isabel Barreto, Maruja Mallo, Sofía Casanova, Manuela e Aurora Liste, as irmás Touza, Elisa e Marcela, As Marías, María Vinyals, Concepción Arenal e Pepa A Loba. Mulleres pioneiras que axudaron a escribir a mellor historia de Galicia coa súa traxectoria e o seu exemplo en diversos campos e que forman parte xa da memoria do alumnado que participou o xoves 16 de maio no xogo de investigación Mulleres na Historia de Galicia.

En concreto, foi o alumnado de 4º da ESO Académicas quen preparou esta actividade para os rapaces e rapazas de 1º ESO. E non só a investigou e organizou previamente nin só supervisou a xornada, senón que se transformou naquelas grandes mulleres nunha marabillosa caracterización que será difícil de esquecer. 

A explicación e unha selección de fotografías da actividade están dispoñibles nesta crónica do blog do Proxecto Falemos, así como neste Álbum de Imaxes.

Brincamos e enredamos cos xogos populares construídos polo alumnado de 4º ESO

Na véspera do Día das Letras Galegas, o alumnado de 1º ESO gozou dunha xornada de xogos populares baixo a guía do alumnado de 4º ESO, que deseñou e construíu os seus propios xogos dende comezos de curso. Os birlos, a viradeira, o labirinto, o pináculo, as flaneiras... tomaron o patio e fixeron pasar uns momentos moi divertidos aos máis pequenos e pequenas do centro.

Tedes máis información e máis imaxes sobre esta actividade e da xornada nesta entrada do blog do Proxecto Falemos e mais nesta galería de fotografías.

Acto de entrega do XII Certame Verbas para Comunicar

Fonte da imaxe: Roi / Concello de Soutomaior.

O mércores 15 de maio tivo lugar no pavillón o acto de entrega (Galería de imaxes) dunha nova edición do Certame Verbas Comunicar, que convoca o Concello de Soutomaior con motivo do Día das Letras Galegas e que "pretende favorecer a participación da mocidade na creación de textos orixinais co obxectivo de normalizar e fomentar o uso da lingua galega entre este colectivo, fóra de contextos formais e rompendo posibles estereotipos", en palabras do alcalde Agustín Reguera, que entregou os premios xunto coa Concelleira de Educación, Fátima Vidal.

Participaron máis de 400 estudantes do noso IES e mais do Colexio Santiago Apóstolo nas súas dúas modalidades, texto e audiovisual, unha categoría que comeza a asentarse e a ofrecer uns traballos moi interesantes e creativos. Para o xurado foi ben difícil unha vez máis seleccionar os traballos premiados, o que dá boa conta da calidade destas "verbas" que expresan, denuncian, senten, xogan, ensinan, reinvindican, fantasean... en lingua galega.

Esta é a resolución do xurado en relación ao IES de Soutomaior:

Texto - Categoría A (12-14 anos)

  • 2º premio: Cómic, de Sabela Magariños (1º ESO A).
  • 4º premio: Morrendo na marea, de Clara Bernárdez (1º ESO B).

Texto - Categoría B (15-18 anos)

  • 2º premio: Estrela polar, de Laura Orge (1º BAC B).
  • 4º premio: Odio, de Marta Reguera (1º BAC B).

Audiovisual - Categoría A  (12-14 anos). Individual

Audiovisual - Categoría A  (12-14 anos). Grupal

  • 1º premio: A nosa lingua (Lucía Castrillo e Marta Bernárdez).
  • Accésit: Non ao racismo  (Ilyas Zitoun El Ouararii, Fiz Garrido Escudero, David Cernadas Montero).

Audiovisual - Categoría B (15-18 anos). Grupal

  • 1º premio: Mashica (Rime el Bahi, Yasmin Aboufaris e Ania Amoedo).
  • 3º premio: Denunciar é salvar (David Alján, Martín Otero e Andrés González).

Galería de Imaxes: as primeiras 22 fotografías son da autoría de Roi para o Concello.

"Soutomaior premia os seus novos escritores", nova no Faro de Vigo (15-05-2019).

A Panadaría e Mercedes Peón, dúas citas coa cultura galega máis transgresora e aclamada da actualidade

O martes 14 de maio o Proxecto Falemos de ti e min fixo posible que o alumnado do noso IES coñecese de preto dúas das propostas artísticas máis innovadoras, recoñecidas e internacionais da cultura galega actual. Dúas propostas que falan dunha cultura moderna, ecléctica, viva e rompedora, transmisoras ademais dunha mensaxe de compromiso coa igualdade, a diversidade sexual, a lingua e a tradición, principios nucleares deste proxecto integrado que se desenvolveu nos últimos meses no noso centro.

Pola mañá, o alumnado de 4º da ESO e de 1º de BAC desprazouse á Casa da Cultura Regina Míguez Doval para deleitarse coa representación da multipremiada obra de teatro Elisa e Marcela, realizada a cargo da compañía A Panadaría. Ao remate do acto, abriuse unha interesante sesión de coloquio coas actrices. Con elas puidemos coñecer con maior profundidade as persoas que forman A Panadaría. Tamén tivemos ocasión de intercambiar impresións sobre a obra representada e os valores que se transmiten.

Xa pola tarde, tivemos a visita de Mercedes Peón no noso centro. Baixo a presentación das alumnas Xiana, Cecilia e Judith, o alumnado de 1º de BAC puido recibir unha auténtica lección maxistral dunha das artistas máis importantes e recoñecidas do panorama musical galego actual. A sesión comezou cunha breve exposición realizada polas presentadoras, quen repasaron a traxectoria de Mercedes Peón. Logo, abriuse unha entrevista que rematou nun cómodo diálogo entre a artista e o público, quen puido coñecela de primeira man.

As crónicas e os álbums fotográficos destas dúas actividades están dispoñibles no blogue do Proxecto Falemos e na galería de imaxes da nosa páxina web:

Proxecto Falemos: exposicións e instalacións artísticas

Maruxa Mallo

Na mañá do luns 13 as exposicións e instalacións artísticas vinculadas ao Proxecto Falemos de ti e min tomaron os corredores e os espazos comúns do instituto para saír ao encontro da comunidade educativa e mostrar o resultado do traballo desenvolvido ao longo destes meses en diferentes cursos e materias.

Na páxina web de Falemos podedes achegarvos a estes proxectos cooperativos e transversais que, máis alá do carácter temporal do Programa da Semana das Letras Galegas, quedarán expostos de maneira permanente en versión dixital, impresa ou nas propias paredes do centro como fonte de coñecemento e futuras iniciativas e como mostra do bo facer investigador e artístico do alumnado e o profesorado participante. Moitos parabéns a todos/as eles/elas!

O alumnado de 1º Bacharelato visitou Galiciencia

O pasado xoves 9 de maio os Departamentos de Bioloxía e Xeoloxía e Física e Química organizaron a visita do alumnado de 1º Bacharelato A a Galiciencia 2019, a maior feira tecnolóxica de Galicia, que ten lugar no Parque Tecnolóxico de Galicia-Tecnópole (San Cibrao das Viñas, Ourense).

O noso alumnado asistiu en primeiro lugar a unha charla sobre como facer unha escolla correcta das nosas fontes de enerxía que, xunto co exercicio e o descanso, é a clave dunha boa saúdae. Logo, acudiron a un obradoiro sobre os mitos do cerebro impartido por Manuel Vicente, condutor do programa Efervesciencia da Radio Galega. Finalmente, o grupo deu un paseo pola carpa, que acolleu 79 proxectos científicos de centros de ensino secundario e primario, a maior parte deles orientados á alimentación saudable, á mellora da calidade de vida, á seguridade viaria e á redución do impacto ambiental, temáticas que centraron a XIV edición deste evento.

Programa de actividades da Semana das Letras Galegas

logoO Proxecto Interdisciplinar de Centro Falemos de ti e min eclosionará na Semana das Letras Galegas cun completo programa de actividades que aborda a cultura galega dende unha perspectiva integradora en torno a catro eixos vertebradores: lingua, cultura, perspectiva de xénero e diversidade sexual, funcional e cultural.

Teatro, exposicións, proxectos de investigación, actividades lúdico-deportivas e xogos populares, literatura, moita música..., e aínda máis, encherán as aulas e corredores do centro e mesmo a nosa contorna. Para coñecer máis polo miúdo o proxecto, convidámosvos a achegarvos á súa páxina. E non deixedes de visitar o seu blog, no cal poderedes seguir os preparativos e outras actividades que se foron realizando dende o comezo do curso.

Falemos de ti e de min, falemos dun nós-outr@s inclusivo, diverso e plural.

Presentación pública do Proxecto Roma

A viaxe a Italia do alumnado de 4º ESO chegou definitivamente á súa fin coa presentación pública do traballo que se realizou ao longo dos últimos meses no marco do Proxecto Roma.

Paula Canosa, David Alján, Laura Fresneda, Marco Campos e Sabela Lorenzo foron os encargados de lles dar voz ao grupo de alumnos e alumnas que durante semanas compartiron horas de aprendizaxes, sorrisos e bromas e moito compañeirismo. Clases e tardes "libres" no instituto que forxaron e estreitaron amizades que irán unidas xa para sempre a unha ilusión compartida, a excursión a Roma e Florencia, o soño da promoción que remata etapa neste Curso 2018-2019. 

Xa fora nun Obradoiro de Mosaicos, paseando por unha cidade de película, admirando e coñecendo os monumentos que os agardaban nas rúas e prazas romanas e florentinas, elaborando as infografías que logo formaron parte dunha fermosísima e moi profesional Guía de Viaxe ou probándose diante das cámaras para realizar moitas das tomas que forman parte deste vídeo, hai que destacar o compromiso do alumnado, que converteu este proceso educativo e a viaxe nunha experiencia enriquecedora e irrepetible. Moitos parabéns polo traballo feito! Foi un pracer acompañarvos!

Ci vidiamo presto, ragazzi e ragazze!

presentación 3 presentación 4

Máis imaxes do acto neste álbum de fotos.

Completo programa de actividades para comezar o terceiro trimestre

Cartaz do Programa Somos Artistas

No mes de abril desenvolveuse un intenso programa de actividades extraescolares e complementarias que marcou o paso do segundo ao terceiro trimestre no noso instituto. Organizadas por diferentes departamentos, alcanzaron a todos os cursos e serviron para traballar diferentes contidos curriculares, temas transversais e a educación en valores.

Para coñecelas máis polo miúdo, premede nos diferentes títulos das charlas, saídas e programas realizados neste mes:

Así mesmo, desenvolveuse o proxecto Somos Artistas para o alumnado de Educación Plástica e Visual de 4º ESO e de Debuxo Artístico de 1º de Bacharelato. Os obradoiros, promovidos pola OMIX en colaboración co Departamento de Educación Plástica e impartidos por Itziar Ezquieta e Begoña Paz, decana e vicedecana da Facultade de Belas Artes de Pontevedra (UVigo), teñen agora a súa continuación nas aulas e en breve coñeceremos as intervencións artísticas do noso alumnado.

Distribuir contido


by Dr. Radut