ABERTO O PRAZO PARA A PRESENTACIÓN DE SOLICITUDES DE AXUDAS PARA A COMPRA DE LIBROS E MATERIAL ESCOLAR E PARA O ACCESO AO FONDO SOLIDARIO DE LIBROS DE TEXTO PARA O CURSO 2017-18.
Informámolos de que xa está aberto o prazo para presentar as solicitudes de axudas para a compra de libros e material escolar, así como para acceder ao Fondo solidario de Libros de Texto para o vindeiro curso 2017-18. O prazo rematará o vindeiro 23 de xuño. Os impresos poderán recollelos na Secretaría do Instituto ou baixalos desde o seguinte enlace:
Aconsellamos que inicien as solicitudes con tempo. Hai bastante prazo, pero sempre poden aparecer problemas coa documentación que teñen que achegar. Para poder participar das axudas do ano que vén, o alumnado deberá entregar cando se lle pidan os libros deste curso, tanto os procedentes do Fondo solidario como os comprados co cheque de Axudas libros. É condición indispensable. Como en anteriores ocasións, o alumnado que suspenda algunha materia na convocatoria de xuño, poderá levar á súa casa os correspondentes libros que devolverá en setembro.
Comentámoslles tamén que o centro, en moitos casos entregou máis libros dos correspondentes por renda ao alumnado e que procedían de excedentes acumulados doutros anos ou da entrega solidaria ao fondo, de maneira desinteresada de moitos de vostedes. O ideal sería ter unhas existencias suficientes para evitar que tiveran que comprar algún. Isto sería posible en pouco tempo se contásemos coa súa axuda solidaria e entregasen xuntos cos das axudas, os que mercaron vostedes. Teñan en conta que eses libros teñen unha validez moi curta, debido aos constantes cambios que se introducen neles e que finalmente terminan amontoados nas casas sen sacarlle utilidade. Son moitos os centros que conseguiron un fondo suficiente para ir complementando as axudas da Xunta.
Aproveitamos a ocasión para saudalos e recordarlles que calquera dúbida que teñan, poderá ser consultada na Secretaría do centro.
DIRECCIÓN DO IES PAZO DA MERCÉ
