blogue deadmin

Biblioteca Escolar

Bibliotecas escolares de Galicia

Queremos ser o teu cole

Queremos ser o teu cole!
Porque temos o convencemento de que a oferta educativa do Cole de Cea é o mellor para a túa filla ou fillo.
Aquí tes toda a información para o matricular no noso centro.

CALENDARIO

Reserva de praza para un centro adscrito 1 ao 15 de febreiro.

Publicación de postos escolares vacantes, antes do 1 de marzo.

Solicitude de admisión do 1 ao 20 de marzo (previsión transporte escolar).

Presentación de documentación acreditativa dos criterios de baremo do 22 de marzo ao 5 de abril.

Publicación de listaxes provisionais de admitidos e non admitidos antes do 25 de abril.

Publicación de listaxes definitivas de admitidos e non admitidos antes do 15 de maio.

Formalización de matrícula en Infantil e Primaria do 20 ao 30 de xuño

Formalización da matricula en ESO e Bacharelato do 25 de xuño ao 10 de xullo

Prazo extraordinario de formalización de matrícula en ESO e Bacharelato do 1 ao 10 de setembro.

INFORMACIÓN IMPORTANTE

O alumnado que xa está matriculado neste Centro ten, automaticamente, a reserva feita para o próximo curso 2019/2020.

Os anexos I (reserva de praza nun centro adscrito) e Anexo II (solictude de admisión) poderánse presentar a través da aplicación informática “admisionalumnado” (https://www.edu.xunta.es/admisionalumnado)

No caso de solicitar a admisión noutro Centro para o próximo curso, deberá facer a solicitude de admisión en dito Centro no prazo establecido a tal efecto e presentar unha copia de dita solicitude nesta Secretaría.

Cada alumno/a só pode presentar una única solicitude no centro no que solicite praza en primeiro lugar.

O alumnado ten garantía de permanencia nun centro, e se presenta solicitude noutro distinto ao que está, debe comunicalo ao centro de orixe.

O alumnado que ten reservada praza nun centro, se presenta solicitude de admisión noutro, deberá comunicar a renuncia á reserva antes do inicio do prazo de solicitude de admisión.

O prazo de presentación de solicitude de admisión: do 1 ao 20 de marzo.

Despois do prazo de admisión publicaranse as distintas listas de admitidos/as, número de prazas ofertadas e datas para a formalización de matrícula, así como calquera outra información necesaria.

DOCUMENTACIÓN (só para alumnado de nova incorporación)

Impreso de Matrícula (proporcionado polo centro)

Impreso para a Certificación Médica (proporcionado polo centro)

Fotocopia do Libro de Familia (follas onde están os país e o alumno/a)

Fotocopia do DNI do alumno (se o ten)

Fotocopia do DNI dos país

Fotocopia da Tarxeta Sanitaria ou Cartilla do Seguro

Certificado de empadroamento (pedilo no Concello)

6 fotografías tamaño carné (recentes)

Se procede doutro centro: Certificado de estudos que está a realizar

  • DECRETO 254/2012,  do 13 de decembro,  polo que se regula a admisión de alumnado en centros docentes  sostidos  con fondos  públicos  que  imparten  as  ensinanzas  de  segundo  ciclo  de  educación  infantil,  de  educación  primaria, de  educación  secundaria  obrigatoria  e  de  bacharelato  reguladas  na  Lei orgánica 2/2006, do 3 de maio, de educación.

  • ORDE do 12 de marzo de 2013 pola que se desenvolve o procedemento para a admisión do alumnado en centros docentes sustentados con fondos públicos que impartan ensinanzas de 2º ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación.

  • ORDE do 25 de xaneiro de 2017 pola que se modifica a Orde do 12 de marzo de 2013 pola que se desenvolve o procedemento para a admisión do alumnado en centros docentes sustentados con fondos públicos que impartan ensinanzas de 2º ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación.

Fotos do NOSO

Desperta a túa creatividade! Apaña o teu móbil ou a túa cámara de fotos e lánzate a descubrirnos as mellores imaxes do NOSO.

Queremos ver a perspectiva máis orixinal do cabaceiro que hai no teu pobo; o perfil dunha peza de pan de Cea, a congostra máis bonita da comarca ou o mandil que tes pendurado na cociña.

Tes ata o 30 de abril para enviar as túas fotos a ticscea@gmail.com co asunto "Fotos do NOSO". Acompañado co nome e curso da persoa que a fixo, un título da foto e o lugar onde foi feita.

Con todas as fotos faremos unha exposición no centro e entre elas elixiranse 12 para publicar nun calendario do Cole de Cea no vindeiro curso 2019-2020.

#FotosdoNoso #ONoso

Concurso do Samaín

in

 

Bases para os concursos de Samaín:

 

  1. Concurso de epitafios (E.S.O e 5º-6º E.P.).

    1. Pode participar todo o alumnado de E.S.O. e tamén o alumnado de 5º e 6º de Primaria.

    2. O prazo de participación está aberto até o 30 de novembro.

    3. A participación no concurso será INDIVIDUAL ou EN GRUPO (máximo 3 compoñentes).

    4. Os epitafios poden ser reais ou inventados. Valorarase especialmente a súa orixinalidade e/ou carácter singular, sempre mantendo o respecto e as boas formas.

    5. Os traballos irán acompañados dunha folla de texto onde aparezan os datos dos autores e o título da obra.

    6. Os traballos serán entregados ao titor/a ou a membros do E.D.L.

    7. Os traballos serán valorados por un xurado que decidirá os gañadores.

    8. Os traballos que cumpran os requisitos de participación exporanse e/ou publicaranse no lugar e data por determinar.

 

  1. Concurso de Banda Deseñada (Ed. Primaria).

    1. Pode participar todo o alumnado de Primaria.

    2. O prazo de participación está aberto até o 30 de novembro.

    3. A participación no concurso será INDIVIDUAL ou EN GRUPO (máximo 3 compoñentes).

    4. A Banda Deseñada debe ter un tema relacionado co SAMAÍN, o misterio, o medo, ou temas semellantes.

    5. O formato da banda deseñada será o seguinte:

      1. EXTENSIÓN: de 1 a 4 páxinas, tamaño A4 ou proporcional.

      2. TÉCNICA: libre, sobre papel de debuxo (non folios), tendo en conta que debe permitir a súa lexibilidade, reprodución e impresión.

    6. Os traballos irán acompañados dunha folla de texto onde aparezan os datos dos autores e o título da obra.

    7. Os traballos serán entregados ao titor/a ou a membros do E.D.L.

    8. Os traballos serán valorados por un xurado que decidirá os gañadores.

    9. Non se admitirán obras que non sexan orixinais.

    10. As BDs que cumpran os requisitos de participación exporanse e/ou publicaranse no lugar e data por determinar.

 

  1. Concurso de contos (E.S.O. e PRIMARIA)

    1. Pode participar todo o alumnado de Primaria e E.S.O.

    2. O prazo de participación está aberto até o 30 de novembro.

    3. A participación no concurso será INDIVIDUAL, EN GRUPO (máximo 3 compoñentes) ou COLECTIVA (unha obra por aula).

    4. Os traballos deberán ter un tema relacionado co SAMAÍN, o misterio, o medo, ou temas semellantes.

    5. Os traballos irán acompañados dunha folla de texto onde aparezan os datos dos autores e o título da obra.

    6. Os traballos serán entregados ao titor/a ou a membros do E.D.L.

    7. Os traballos serán valorados por un xurado que decidirá os gañadores.

    8. Non se admitirán obras que non sexan orixinais.

    9. As obras que cumpran os requisitos de participación exporanse e/ou publicaranse no lugar e data por determinar.

 

  1. Concurso de Lendas e contos populares recollidos (E.S.O e 5º-6º E.P.).

    1. Pódese participar tanto individualmente como por grupos dun máximo de 3 persoas.

    2. O prazo de participación está aberto até o 30 de novembro.

    3. As obras terán que ser recollidas a persoas da comarca. Pódense recoller en papel ou en formato dixital.

    4. As obras recollidas en papel serán entregadas aos membros do E.D.L., ou ao titor/a.

    5. En caso de ser gravacións, os arquivos serán enviados ao correo electrónico do Cole de Cea: ticscea@gmail.com ou entregados en pendrive ao titor/a ou membros do E.D.L.

    6. As obras irán acompañadas dun texto cos datos dos/as alumnos/as que a recolleron, título da obra, nome da persoa da que se recolleu e localidade onde foi recollida.

    7. A temática estará relacionada coa idea do SAMAÍN, o misterio, o medo, ou temas semellantes.

    8. As obras serán valoradas por un xurado que decidirá os gañadores.

    9. Non se admitirán obras que non sexan de orixe popular e/ou tradicional.

    10. Os traballos que cumpran os requisitos de participación exporanse e/ou publicaranse no lugar e data por determinar.

 

  1. Concurso de curtas (E.S.O).

    1. Pódese participar tanto individualmente como por grupos dun máximo de 3 persoas.

    2. O prazo de participación está aberto até o 30 de novembro.

    3. Os vídeos serán enviados a ticscea@gmail.com ou entregados aos membros do E.D.L., ou ao titor/a en formatos de vídeo que podan ser reproducidos en diferentes sistemas. E irán acompañados dun documento de texto cos datos dos autores e o título da obra.

    4. Características xerais das curtas:

      1. A curta non poderá superar os 3 minutos de duración.

      2. A temática dos vídeos será libre introducindo a idea do SAMAÍN, o misterio, o medo, ou temas semellantes.

      3. Realización exclusivamente mediante a cámara do teléfono móbil podendo logo, editarse con ferramentas externas.

      4. As curtas deben ser orixinais (non comercializadas ou premiadas con anterioridade), incluídos os títulos de crédito se os houbese, e gravados na máxima resolución e calidade posibles.

      5. Tanto para o audio como para a escrita débese empregar o idioma galego.

    5. Os vídeos serán valorados por un xurado que decidirá os gañadores.

    6. Os vídeos que cumpran os requisitos de participación proxectaranse no lugar e data por determinar.

 

Concurso: O Noso Outono

Concurso O Noso Outono
 
O Equipo de Actividades Extraescolares e o Equipo de Dinamización Lingüística do centro animan ás familias a participar no concurso artístico #ONosoOutono. A Actividade consiste na elaboración dunha obra artística para celebrar a chegada do outono e o Samaín.
 
Existen dúas modalidades para participar. Pódese presentar unha peza en cada unha delas.
 
#Collage: Realizarase sobre unha cartolina de tamaño máximo A3. O material debe estar ben pegado para poder expoñela en vertical.
 
#Escultura: Pódense empregar arames como base ou pegar os materiais entre si.
 
Os materiais empregados deben ser típicos do outono: follas, castañas, cascas de noz, landras, cabazas, carrabouxos, ourizos...
 
A data límite para entregar os traballos é o 5 de novembro.
 
#concurso#outono#arteescolar

n/d

Intervención de Ramón Caride no Serán do Cole de Cea

SERÁN DO COLE DE CEA 25 Maio 2018

Intervención de Ramón Caride Ogando

Boa tarde, antes de nada, moitas grazas por permitirme participar nestes actos, a pesar de que eu nin canto nin toco instrumento ningún tan ben coma calquera dos outros e das outras participantes

É para min un privilexio estar aquí. Aínda que, como saberedes, eu non fun alumno deste cole. Eu fun dos últimos rapaces deste concello en estudar, até os dez anos, nunha escola unitaria, en concreto na da parroquia de Pereda, terra da miña familia materna. A miña primeira mestra, e seguramente a máis decisiva na miña vida, foi María Esther Cortés, a quen sempre lle estarei agradecido.

E non menos agradecemento lle debo agora ao claustro de profesores deste Colexio Virxe da Saleta, por ter iniciado as celebracións destes 50 anos, no pasado mes de Xaneiro, dándolle o meu nome á súa fermosa biblioteca. Eu nunca imaxinara semellante cousa, e aínda menos en Cea, onde case perdera as esperanzas. Até tal punto é verdade isto, que cando no xa algo lonxano ano 1992, como algúns dos que estades aquí lembraredes, acadei o premio Blanco-Amor de novela, o diario La Región publicou unha noticia co seguinte titular: "EL Concello de Cea felicitará a Ramón Caride Ogando por la concesión del Premio Blanco Amor", e como a tal felicitación aínda non me chegou a día de hoxe, nin sequera se me ocurríu protestar polo retraso. E non se pode dicir que semellante adiamento se deba ás mudanzas no grupo de governo municipal, porque tampouco as mudanzas foron tantas.

Pero non desesperemos...

En calquera caso, que lle adiquen a un unha biblioteca é unha alegría, pero tamén unha responsabilidade agradable, e un estímulo impagable. Escribir é un traballo solitario, e ás veces ingrato. O resultado adoita ser incerto, e as dúbidas nunca rematan. Escribir é dalgún xeito como falar, pero ás veces non sabes se falas con alguén, se falas diante dun espello ou se só estás a falar diante dunha parede que che devolve o eco das túas palabras. Gastas horas e gastas enerxía, e non sempre o resultado é o esperado. Logo de tanto traballo e de tantas voltas, a maioría dos escritores ou escritoras dependen do azar ou dos caprichos dun editor, non sempre xustificados, por canto a oferta de manuscritos en calquera sistema literario supera con moito á demanda de libros polo mercado.

Supoño que un dos meus méritos, en todo caso, é ser nativo de Cea, aínda que ninguén escolle onde quere nacer porque isto nunca se dá a escoller; é unha cuestión puramente aleatoria. Aínda así, nacín, ou nacéronme, en Cea e son escritor. Non hai tantos escritores en Cea coma panadeiras, pero hai artistas e escritores abondo para nomear calquera biblioteca, que tampouco hai tantas coma fornos; así que dar o propio nome á deste Cole e ser obxecto de semellante homenaxe e de tanto agarimo e esforzo como puxestes nestes actos, sempre será un mérito inmerecido, mália os moitos anos que levamos zugando na memoria e nas verbas aprendidas en Cea, nos medos e nos anseios da primeira infancia, revividos unha vez e outra, mesmo sen un mesmo decatarse, nunha morea de libros e de soños.

Pero en realidade teño para min que quen recibe unha homenaxe non pasa de ser un punto de referencia, un pretexto necesario para que moita xente con ganas de traballar e de facer cousas positivas, se xunte e traballe en común. Neste caso a responsabilidade do homenaxeado e dobremente gozosa, e a débeda cos colegas ensinantes deste centro, aínda máis impagable. O cole de Cea, coma outros da contorna polos que andiven estes meses, é unha referencia de amor á tradición, respecto á lingua, actualización tecnolóxica e de métodos, entusiasmo e capacidade de experimentar, cousas das que tan necesitados andamos os galegos e as galegas, e que por sorte, non faltan no ensino público, tan maltratado en moitas ocasións polos que nos governan, ou ás veces nos desgovernan.

Remato pois, dando as grazas de corazón. Aínda que sexa cuns meses de retraso, o certo é que tardei menos, así e todo, do que tardou o Concello. Xa son parte deste Centro que sempre será o meu, e considérome moi afortunado de podelo proclamar. Xa sabedes onde me tedes, para o que precisedes, compañeiras e compñeiros. QUE SIGA A FESTA!

Outro Misterio No Cole de Cea

Os misterios non paran no noso cole!

Se o pasaches ben con #MisterioNoColedeCea prepárate a vivir unha nova e emocionante aventura con #OutroMisterioNoColedeCea.
Leva a #Xiana a coñecer á #RataRita e axúdalle a atopar a saída do cole.

Lembra que o xogo está nun arquivo "exe" e é posible que o teu antivirus ou o teu sistema operativo dean algún aviso, pero trátase dun arquivo totalmente confiable.
#xogos #games #misterio #coledecea

DESCARGA

Grazas, grazas, grazas.

O Cole de Cea quere agradecer a colaboración de todas as persoas e colectivos implicados na celebración do noso #50aniversario:

Grazas a todas as familias e veciñanza dos concellos por ceder as súas fotos para a expo #FotoMemoria.

Grazas ao Concello de Cea e ao Concello de Piñor por colaborar na produción artística dos eventos do aniversario, en colaboración coa ANPA CEPI.

A todo o profesorado e persoal do centro que está a colaborar na realización da exposición e do documental, así como na organización dos dous eventos.

Aos establecementos: Kanela Drink, Bar Paxariño, Farmacia Hilda, Sol y Luna, Perruquería Marisol e Bar Ojea por axudar á difusión do evento “O Reencontro” e pola venda de tickets e camisetas.

Ao noso antigo alumnado e profesorado e a toda a comunidade educativa actual polo entusiasmo e o amor que manifestan pola nosa escola. Sodes a alma do cole de Cea.

A todas as persoas que puxeron cara e voz no documental "1 día, 50 anos" para contar a historia do noso centro educativo.

Ademais, dende o centro queremos informar de que o importe íntegro dos tickets para a festa do Reencontro destinarase ao aluguer da carpa, ao servicio de catering e ao menú.

Misterio no Cole de Cea - O noso primeiro videoxogo

ATENCIÓN ATENCIÓN!! XA TEMOS XOGO DO Cole de Cea

Temos a honra de vos anunciar que o cole de Cea estrea o seu primeiro videoxogo!
#MisterionoColedeCea

Xa podes descargalo e xogar no teu PC.

Tan só clica na seguinte ligazón e descarga o arquivo executable. DESCARGA

Ignora as advertencias que fai google, o arquivo é totalmente confiable.

 Descomprímeo nunha carpeta e.. a xogar!

Distribuir contido