Escolares

O luns 16 de maio todo o alumnado e profesorado do centro, asistiu a un concerto  moi especial no salón de actos do centro.

Pakolas, é autor, compositor, músico, e tamén, produtor de música pensada para os cativos e cativas. Os nenos e nenas cantaron e bailaron a ritmo de rock a historia de Ramona Órbita, unha súper muller labrega da Serra do Courel, xefa na horta e boa coa tecnoloxía, ecoloxista e inventora, posuidora dunha horta cibernética de patacas automáticas, e dona dunha incrible máquina do tempo, o seu mellor invento. Con ela viaxa ao futuro e ao pasado na procura de tecnoloxía para crear un mundo mellor, máis ecolóxico e con enerxías limpas.

No CEIP das Vendas da Barreira estamos de parabéns. Veñen de concedernos na resolución definitiva o programa de innovación educativa E-dixgal para 5º e 6º de educación primaria. Este programa supón un salto cualitativo na incorporación das TIC (tecnoloxías da información e comunicación) na aula, supón un cambio a nivel metodolóxico por parte do profesorado que se apoia nos contidos dixitais e permite a creación e adaptación dos mesmos para dar unha resposta moito máis adaptada ás necesidades do noso alumnado e un aforro de custos ás familias. As TIC aplicadas á educación supoñen para o noso alumnado o desenvolvemento da capacidade de comprensión, a lóxica e favorecen a aprendizaxe significativa.

Dende o centro estamos moi felices pois isto amosa o resultado do bo traballo. Nesta liña, e na procura de facer o noso cole un centro innovador seguimos traballando a reo para comprender as diferentes circunstancias de cada alumno/a e empregalas para crear escenarios de aprendizaxe adaptados, flexibles e que nos permitan personalizar o nivel de esixencia. Por iso, vimos de solicitar tamén a nosa adhesión no programa de innovación educativa de Plurilingüismo e en Voz Natura. Sentímonos moi orgullosos e orgullosas do equipo docente que actualmente conforma o noso centro, do traballo que se está a realizar e dos éxitos que chanzo a chanzo imos acadando. Parabéns!

Na aula de 2º e 3º de Educación Primaria tivemos un taller organizado polo CIM Conso-Frieiras para tratar a resolución de conflitos.

Os conflitos son unha realidade inherente na convivencia, inevitables nas nosas vidas e posiblemente esenciais para o desenvolvemento da sociedade. O importante e que realmente debe preocuparnos non é que existen senón de que xeito se resolven.

É importante aprender a resolvelos na aula, no tempo de lecer e tamén fóra do centro educativo. Coñecer e practicar o respecto mutuo, o respecto á diversidade de opinións, a solidariedade e a tolerancia; adquirindo habilidades protectoras fronte a violencia.

Coñecer a teoría e transmitila está moi ben, pero que tal se o levamos todos e todas a cabo?

Só queda agradecerlle a Mónica a súa implicación e paixón en todo aquilo que ven a ensinarnos en cada un dos talleres que imparte no noso cole. Moitas grazas!

O luns 21 de marzo celebramos o Día Mundial da Árbore cun taller da man do Axente Facultativo Medioambiental José Ángel Ares deseñado non só para implantar nos máis pequenos valores de respecto á natureza senón tamén para que coñeceran de primeira man as especies que temos na nosa contorna. As árbores son un ben prezado que debemos conservar pois por eles flúe a vida de todos os seres que poboan a Terra, son fonte de osíxeno e alimento. As árbores son fundamentais e vitais para a vida e a subsistencia. Despois do taller o alumnado tivo a oportunidade de ver unha motobomba e ata puideron facer unha pequena práctica coa mangueira. Qué ben o pasaron!!! Finalmente agasallaron a todo o alumnado do centro cun bolsa de tea ben fermosa. Grazas a Ares e Basalo por facernos pasar unha xornada tan divertida e interesante. Preme aquí para ver a galería de imaxes.

O CDR. Portas Abertas realizou no noso centro, o día 3 de Marzo, a actividade “Un lugar para todos”, coa fin de promocionar espazos de convivencia a través de obradoiros en centros educativos, para loitar contra os discursos xenófobos e racistas. Todo elo enmarcada dentro do Programa Galicia Acolledora. Nesta actividade participou todo o alumnado do centro. Co grupo dos maiores do centro levouse a cabo un taller no que se falou das dificultades que teñen as persoas que veñen doutro país e das limitacións coas que se atopan polo feito de ser estranxeiras. Posteriormente, realizaron o xogo do bingo por equipos para coñecer datos importantes sobre cada continente. Remataron a sesión falando de todo o que precisamos cando nos imos a outro país. Premede aquí para ver a galería fotográfica.