ANPA

Grazas á ANPA do noso centro o pasado luns 11 de decembro gozamos da obra "O Apalpador e a nena sen medo" baseada nun poema de Sechu Sende.

O Apalpador trae cada ano desde o Courel castañas, presentes e aquilo que non temos. Por iso, a Nena sen medo lle escribiu unha carta moi especial, pedíndolle o que a ela lle faltaba, o seu desexo: palabras para encher o corazón e coas que poder voar en soños. Palabras en galego.

Foi unha actuación máxica, amena e divertida da que gozaron tanto alumnado como familias.

O luns 4 de decembro tivemos no centro unha formación básica de primeiros auxilios a cargo da Cruz Vermella. Foi unha xornada onde familias e docentes aprendemos ou repasamos aspectos básicos nesta materia.

Os primeiros auxilios son aqueles xestos ou medidas que se adoptan inicialmente cun accidentado/ ou enfermo/a repentino, no mesmo lugar dos feitos, ata que se poida obter unha asistencia especializada.

Durante a sesión, practicáronse algunhas actuacións básicas de primeiros auxilios como: atragantamentos, queimaduras, e reanimación cardiopulmonar (RCP).

Lembramos que en situacións que requiren unha intervención de urxencia hai que observar unha conduta PAS (protexer, avisar e socorrer) sempre por esta orde.

Os equipos médicos serán os que nos darán instrucións do que debemos facer e non debemos facer nada sen consultalo primeiro tal e como ademais se recolle no protocolo de urxencias sanitarias e enfermidade crónica da propia Consellería de Cultura, Educación, FP e Universidades.

Unha vez máis a ANPA do CEIP Plurilingüe das Vendas da Barreira ten o pracer de convidarnos a un contacontos con monicreques para o Nadal.

A actividade terá lugar o vindeiro luns 4 de decembro ás 12:30 no Salón de Actos do centro. Agardámosvos!

A ANPA do CEIP Plurilingüe das Vendas da Barreira ten o pracer de convidar a toda a comunidade educativa do centro a unha obra de títeres sobre a igualdade. A actividade terá lugar o 24 de novembro ás 12:30.

Despois de dar a volta ao mundo, Lúa sorprende a familia e amizades cunha gran nova: Agora quere ir a Marte!

Malia todos os atrancos e dificultades, Lúa non está disposta a renunciar ao seu soño de ser astronauta e fará todo o posible para logralo e poder así viaxar a Marte.

Unha actividade para fomentar a igualdade de oportunidades entre homes e mulleres.

Hai e houbo grandes mulleres científicas, investigadoras e astronautas, que o son o referente de Lúa para seguir adiante e enfrontarse aos impedimentos que se lle queren impoñer.