Formación

Este martes acudimos a Santiago as xornadas anuais ás que todos os centros participantes no programa de Clubs de Lectura asistimos cada ano. Durante este día compartimos experiencias dentro desta actividade que cada centro prepara con mimo para os seus alumnos/as. Descubrimos novas ferramentas para achegar a lectura ao alumnado con necesidades educativas especiais, como a Lectura Fácil. Escoitamos testemuñas de autores que grazas ás súas experiencias na infancia coa lectura e os libros chegaron a converterse eles mesmos en escritores. Compartimos ideas e actividades que poden servirnos para seguir fomentando a lectura nos nosos alumnos, e formas de que esta lectura vaia máis aló de entender palabras senón de traballar conceptos fora do académico e abrirlles novos horizontes.

Dentro da liña “Bibliotecarios” do noso PFPP para o curso 23-24 seguimos traballando sobre o concepto integrador da Biblioteca Escolar. A biblioteca é unha ferramenta indispensable para desenvolver no noso alumnado capacidades como pensar, crear, imaxinar e moitas outras. E, a gamificación como estratexia é unha ferramenta moi motivadora. 

Tendo iso presente estamos convencidos que xogar é unha das formas preferidas do noso cerebro para aprender. E na biblioteca non nos iamos quedar atrás con este tema. Os nosos profes crearon este recuncho na biblioteca, ben provisto con xogos de mesa e de enxeño para desfrutar mentres facemos uso deste espazo. Estamos encantados co resultado!

Sabedes o que son os POLOS CREATIVOS? Este concepto abrangue a creación e uso dentro do marco educativo de espazos e materiais innovadores, e especializados, organizados didacticamente para fomentar a creatividade, a consecución de proxectos, resolución de problemas, construcións... Trátase dun novo xeito de aprendizaxe conxunto, colaborativo e comunitario, enfocado tamén no ámbito da investigación e da experimentación. Unha visión moi ampla de técnicas de ensinanza e aprendizaxe que comprende dende prácticas e retos tecnolóxicos ata proxectos máis artesanais. 

https://www.edu.xunta.gal/portal/poloscreativos

Este ano o noso centro está inmerso na inclusión deste tipo de materiais na nosa práctica docente, e entre a moita formación que estamos recibindo, acaban de chegar ao cole estes "KITS SINGULARES", con pequenas propostas para comezar a empregar estes materiais nas aulas, tedes ganas de ver o que conteñen? Estade atentos á nosa web porque pronto os nenos e nenas do cole comezarán a crear!

O luns 4 de decembro tivemos no centro unha formación básica de primeiros auxilios a cargo da Cruz Vermella. Foi unha xornada onde familias e docentes aprendemos ou repasamos aspectos básicos nesta materia.

Os primeiros auxilios son aqueles xestos ou medidas que se adoptan inicialmente cun accidentado/ ou enfermo/a repentino, no mesmo lugar dos feitos, ata que se poida obter unha asistencia especializada.

Durante a sesión, practicáronse algunhas actuacións básicas de primeiros auxilios como: atragantamentos, queimaduras, e reanimación cardiopulmonar (RCP).

Lembramos que en situacións que requiren unha intervención de urxencia hai que observar unha conduta PAS (protexer, avisar e socorrer) sempre por esta orde.

Os equipos médicos serán os que nos darán instrucións do que debemos facer e non debemos facer nada sen consultalo primeiro tal e como ademais se recolle no protocolo de urxencias sanitarias e enfermidade crónica da propia Consellería de Cultura, Educación, FP e Universidades.

O 28 de novembro asistimos ao Congreso Internacional de Educación Inclusiva, unha xornada de reflexión e debate na que se puxeron de manifesto propostas orientadas á mellora da resposta educativa que, dende a visión da inclusión, permita adecuar e optimizar a práctica docente para satisfacer as necesidades educativas de todo o alumnado.

Para isto, resulta necesario identificar as barreiras que dificultan o proceso de ensino-aprendizaxe e aplicar as medidas precisas para afrontar cada situación.

Tal e como sinalou o conselleiro de Cultura, Educación, FP e Universidades, Román Rodríguez, dende o centro compartimos a idea de que a innovación e a inclusión son requisitos para asegurar que a educación avanza paralela ao ritmo social.