Con motivo da Semana do Libro o noso alumnado recitou poemas de Rosalía de Castro, Anisia Miranda, Gloria Fuertes, Álvaro Cunqueiro, etc. aquí vos deixamos unha fermosa escolma.
Dentro da liña “Bibliotecarios” do noso PFPP para o curso 23-24 seguimos traballando sobre o concepto integrador da Biblioteca Escolar. A biblioteca é unha ferramenta indispensable para desenvolver no noso alumnado capacidades como pensar, crear, imaxinar e moitas outras. E, a gamificación como estratexia é unha ferramenta moi motivadora.
Tendo iso presente estamos convencidos que xogar é unha das formas preferidas do noso cerebro para aprender. E na biblioteca non nos iamos quedar atrás con este tema. Os nosos profes crearon este recuncho na biblioteca, ben provisto con xogos de mesa e de enxeño para desfrutar mentres facemos uso deste espazo. Estamos encantados co resultado!
Ensinar a coidar o medio ambiente é ensinar a coidar a vida. Na biblioteca do cole temos claro que todas as aprendizaxes son importantes e vitais para un desenvolvemento persoal e social completo. A adquisición dos valores morais dende ben pequenos axudaranos a crear un mundo mellor, e unha parte crucial deles é o respecto e coidado do medio no que vivimos.
Un libro é unha fonte inesgotable de diversión e aprendizaxe. Os nosos nenos e nenas téñeno moi claro, e así o demostraron aprendendo sobre a creación dunha parte fundamental dos libros: a portada.
Esta semana, para conmemorar o día do libro, quixemos homenaxear a todos os autores e editores dos que podemos desfrutar na nosa biblioteca recreando cos nosos propios corpos as portadas dalgúns dos seus libros. Os resultados, ademais de ser moi didácticos, foron moi divertidos. Esperamos que vos gusten moito!
En outubro, o alumnado do noso centro recibiu un envío dende o espazo exterior de Toni, a mascota da biblioteca. Unha mochila chea de recursos na que, entre outras cousas, atopou libros de manualidades. Os nosos pequenos e pequenas en conxunto coas súas familias foron facendo algúns traballiños ao longo do curso nos que amosaron as súas dotes artísticas creando arte con material de refugallo.
Fomentouse así a imaxinación, a liberdade creativa e a eficiencia no uso dos recursos. Recursos reutilizables cos que familias e alumnado se divertiron creando. Aquí vos deixamos unha escolma orixinal e chea de creatividade.
O alumnado de 4º 5º e 6º de primaria recibiu esta semana unha mensaxe importantísima de Toni, a nosa mascota. Resulta que Toni está inmerso nunha viaxe interespacial, e está recrutando a lectores expertos para o seu club. Para lograr entrar nel, os nenos e nenas candidatos tiveron que superar unha serie de probas para adiviñar o primeiro libro no que deberán somerxerse. Seguiremos informando sobre as aventuras destes mozos e mozas!
A vindeira semana, con motivo da celebración da Semana do Libro, queremos celebrar un recitado de poemas virtual entre o alumnado, baixo o lema "Recuperando voces perdidas". Cada alumno/a recibirá un poema dun autor ou autora ilustre, e a tarefa consistirá en investigar como era a súa voz e gravar un vídeo recitando ditos versos imitando o seu ton de voz. Os vídeos deberán ser remitidos ao correo do centro, entre os días 22 e 26 de abril, e serán colgados na nosa web durante a semana seguinte. Estamos desexando ver os resultados!
Este mes, é a quenda do cómic. Un xénero que combina elementos literarios e gráficos ideal para achegar a lectura ao noso alumnado. Non vos perdades tódalas novidades que temos!
Que paren as rotativas! o novo xornal "MINIREPORTEIROS DO NOSO" está en marcha, e os nosos xornalistas non paran de escribir artigos contándonos cousas sobre as novidades, acontecementos e celebracións da nosa escola e da contorna. Con motivo da Semana da Prensa, o alumnado está aprendendo moitas cousas sobre as noticias en soporte físico e dixital, e coa intención de recuperar neles o interese por este último, decidimos comezar a crear o noso propio xornal/revista, que esperemos podamos desfrutar todos proximamente.
Encántanos que os nenos e nenas aprendan pero tamén nos encanta que se divirtan, exploren, creen e imaxinen tanto como sexa posible. Por iso, este mes dende a Biblioteca de Toni recomendamos libros cheos de ideas e inspiración artística, para que os nosos usuarios alimenten a súa creatividade e, se queren, poñan en práctica algunha das ideas que lles poden xurdir.
