Animación á lectura

Durante o mes de xaneiro a temática da Biblioteca foi o Universo, en conxunto coa temática do noso Proxecto Documental Integrado de centro. O estudo desta rama da ciencia resulta non só atractivo para o alumnado, senón que lles achega a visión da grandeza da natureza, lles proporciona coñecementos extra-curriculares, e esperta neles o espírito investigador e científico.

A través de materiais presentas na biblioteca e de actividades que se levaron a cabo nas aulas, o noso alumnado entrou en contacto co que hai máis ala do noso planeta, achegouse aos misterios dos viaxes espaciais e á vida dos astronautas, e a todo aquilo que durante a historia da humanidade fixo posible que hoxe saibamos todo o que sabemos sobre o cosmos.

Este mes creamos un recuncho na biblioteca sobre a diversidade. Con esta escolla pretendemos dar visibilidade á diversidade da nosa sociedade e así continuar apostando por unha educación e biblioteca inclusivas.

Primeiro chegou á lúa... e despois a Marte! Non hai como ter o firme propósito de marcarnos obxectivos na vida e ter metas claras para reforzar o noso compromiso con nós mesmos/as.

O pasado venres 24 de novembro Celtia Figueiras da Xanela do Maxín fíxonos pasar uns momentos fantásticos acompañados das familias, do alumnado e de todo o equipo docente. Lúa, a gatiña protagonista da historia de monicreques percorre un longo camiño cheo de atrancos pero, con moito esforzo, consegue lograr o seu soño: converterse en astronauta. Porque tal e como afirmou Les Brown "hai que apuntar ao infinito, aínda que falles, aterrarás entre as estrelas".

Celtia agasallounos tamén cun exemplar do seu libro ilustrado por Marcelo P. Fernández que, en breve poderedes levar de empréstito.

O noso agradecemento para a ANPA do noso centro por organizar unha actividade tan interesante e co obxectivo de promover entre o noso alumnado habilidades, actitudes e valores a favor da igualdade de xénero.

A maxia de ler pode levarnos a lugares sorprendentes, a facer cousas que pensamos que nunca seríamos capaces de facer, e a explorar as nosas capacidades.

Na biblioteca de Toni temos moi claro que o noso obxectivo principal é achegar ao alumnado a todas as oportunidades que lles poden brindar os libros.

Por iso este curso, na primeira quenda de MOCHILAS VIAXEIRAS, Toni animou aos nosos nenos e nenas e ás súas familias non só a desfrutar da lectura dos libros que temos na biblio, senón tamén a participar nunha exposición de manualidades familiar, aproveitando os libros sobre manualidades cos que contamos nos nosos estantes. Os resultados están sendo unha marabilla! Ademais, como non podía ser doutro xeito nesta viaxe espacial, están contando as súas experiencias semanalmente nos seus cadernos de bitácora.

O xoves 19 de outubro desenvolveuse no noso centro un contacontos pola igualdade, unha das actividades que nos ofreceu o Programa Donas de Si, enmarcado dentro do Plan Proxecta.

Este, consistiu en desenvolver un proxecto relacionado coa visibilidade e empoderamento das mulleres como pezas fundamentais do desenvolvemento da sociedade galega e como punto de partida para traballar nas nosas aulas a igualdade e os estereotipos de xénero.

Nesta proposta, narrativa e plástica, o escritor Enrique Mauricio e a ilustradora Tania Solla presentaron ao alumnado do noso centro a obra de Rosalía de Castro, ademais de ensinarnos pautas para crear as nosas propias ilustracións de Rosalía. Resultou unha sesión ben interesante!